រាជធានី ភ្នំពេញ៖ គណ:គ្រប់គ្រងនៃសាលាមធ្យមសិក្សាគរុកោសល្យមត្តេយ្យមជ្ឈឹម បានរៀបចំកម្មវិធី អបអរសាទរខួបលើកទី១០៩ នៃទិវាអន្តរជាតិនារី ៨ មីនា ដើម្បីរម្លឹកខួបស្ដីពីការតស៊ូរបស់នារីទូទាំង សាកលលោក ក្នុងការទាមទារ សិទ្ធិសេរីភាព ប្រជាធិបតេយ្យ និងការអនុវត្តភាពស្មើគ្នារវាង បុរស និងស្រ្តី ក៏ដូចជាលើក ទឹកចិត្តដល់អ្នកគ្រូៗ និងគរុសិស្សជាស្ត្រីក្នុងការបំពេញការងារក្នុងវិស័យអប់រំ យុវជន និង កីឡា។
ពិធីអបអរសាទរនេះ បានប្រព្រឹត្តទៅក្រោមអធិបតីភាព ឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និង កីឡា។ ក្នុងឱកាសនោះដែរ ឯកឧត្ដមបានកោតសរសើរ ថ្លែងអំណរគុណ និងលើកទឹកចិត្តដល់គណ:គ្រប់គ្រងសាលា ព្រមទាំងគរុសិស្សដែលភាគច្រើនគឺជាស្ត្រី ក្នុងការបំពេញការងារកន្លងមកប្រកបដោយជោគជ័យ និងមានការទទួលខុសត្រូវខ្ពស់។
ឯកឧត្ដមបានមានប្រសាសន៍បន្តលើកទឹកចិត្តដល់គរុសិស្សមត្តេយ្យទាំងអស់ថាការសាងសង់អាគារមួយឱ្យរឹងមាំឡើងបានលុះត្រាតែយើងសាងសង់មូលដ្ឋានគ្រឹះឲ្យបានរឹងមាំសិន។ឯគ្រូបង្រៀនវិញមិនសំខាន់បង្រៀននៅកម្រិតណាទេ សំខាន់គឺត្រូវចេះឲ្យច្បាស់ ដូច្នេះគ្រូមត្តេយ្យសិក្សា គឺពិតជាធនធានមួយមានតម្លៃខ្លាំងណាស់សម្រាប់ការកសាងមូលដ្ឋានគ្រឹះនៃចំណេះដឹងដល់កុមារទាំងឡាយឲ្យបានសម្រេចគោលដៅក្នុងការសិក្សាដោយជោគជ័យ ទៅថ្នាក់លើទៀត។
បន្ទាប់ពីការសំណេះសំណាលចប់ ឯកឧត្ដមបណ្ឌិតក៏បានជូននូវប័ណ្ណសរសើរជូនដល់ គរុសិស្សដែលជាជំនួយការអប្បមាទ និងក្រុមសិល្បៈ មត្តេយ្យមជ្ឈឹមដើម្បីជាការលើកទឹកចិត្តក្នុងពេលបំពេញការងារកន្លងមកផងដែរ៕
០៧ មីនា ២០២០ | សាលាមធ្យមសិក្សាគរុកោសល្យមត្តេយ្យមជ្ឈឹម
