នៅព្រឹកថ្ងៃទី២៣ ខែមីនា ឆ្នាំ២០២០ ឯកឧត្តមឧបនាយករដ្ឋមន្រ្តី ហោ ណាំហុង បានអនុញ្ញាតអោយ ឯកឧត្តម ឌីមីទ្រី ឆ្វេតកូវ (Dmitry Tsvetkov) ឯកអគ្គរដ្ឋទូតរុស្ស៊ីប្រចាំព្រះរាជាណាចក្រកម្ពុជា ជួបសំដែងការគួរសម និងជម្រាបលា។ ឆ្លៀតឱកាសនេះដែរ ឯកឧត្តមឧបនាយករដ្ឋមន្រ្តី និងឯកឧត្តមឯកអគ្គរដ្ឋទូតរុស្ស៊ី បានពិភាក្សាការងារដែលមានខ្លឹមសារដូចខាងក្រោម៖
1. ឯកឧត្តមឧបនាយករដ្ឋមន្រ្តី បានលើកសរសើរឯកអគ្គរដ្ឋទូតរុស្ស៊ី ដែលបានខិតខំរួមចំណែកធ្វើឲ្យមិត្តភាព និងកិច្ចសហប្រតិបត្តិការកម្ពុជា-រុស្ស៊ី បានរីកចម្រើនជាបន្ដបន្ទាប់ ក្នុងពេលបេសកកម្មរបស់ ឯកឧត្តម នៅកម្ពុជាអស់រយៈពេល៦ឆ្នាំ និងមានប្រសាសន៍ថា កម្ពុជានិងរុស្ស៊ីមានទំនាក់ទំនងល្អ និងចំណងមិត្តភាពយូរអង្វែង។ កន្លងមកប្រជាជនរុស្ស៊ីបានជួយកម្ពុជាយ៉ាងច្រើនក្នុងគ្រាដ៏លំបាកបំផុតកន្លងមក ដើម្បីកសាងនិងអភិវឌ្ឍប្រទេសកម្ពុជា។ ប្រទេសយើងទាំងពីរមានទំនាក់ទំនងដ៏ល្អ ព្រមទាំងមានកិច្ចសហប្រតិបត្តិការដ៏រឹងមាំលើវិស័យជាច្រើន កិច្ចព្រមព្រៀងទ្វេភាគី និងអនុស្សារណៈយោគយល់គ្នាប្រមាណ ៥១ ត្រូវបានចុះហត្ថលេខាលើវិស័យជាច្រើន ចាប់តាំងពីឆ្នាំ ២០១៥ មានជាអាទិ៍ ពាណិជ្ជកម្ម វិនិយោគ ធនាគារ កសិកម្ម បរិស្ថាន និងសន្តិសុខ។ល។
បច្ចុប្បន្ននេះ ភាគីទាំងពីរមានកិច្ចព្រមព្រៀង និងអនុស្សារណៈ យោគយល់គ្នាចំនួន ១៤ ដែលកំពុងត្រូវបានចរចា ដែលកិច្ចព្រមព្រៀងមួយចំនួនអាចនឹងត្រូវចុះហត្ថលេខានាពេលអនាគត រួមមានវិស័យអប់រំ ច្បាប់ យុវជន ទេសចរណ៍។ល។
2. ឯកឧត្តមឧបនាយករដ្ឋមន្រ្តី បានលើកថា ពាក់ព័ន្ធនឹងកិច្ចសហប្រតិបត្តិការពហុភាគី គណៈកម្មការអន្តរ រដ្ឋាភិបាលស្តីពី កិច្ចសហប្រតិបត្តិការពាណិជ្ជកម្ម សេដ្ឋកិច្ច វិទ្យាសាស្ត្រនិងបច្ចេកទេស ត្រៀមខ្លួនរួចជាស្រេចដើម្បីរៀបចំសម័យប្រជុំលើកទី១១ នៅថ្ងៃទី ១៧-១៨ ខែសីហា ឆ្នាំ ២០២០ នៅទីក្រុងភ្នំពេញ ក្នុងទិសដៅពង្រឹងនិងពង្រីកទំនាក់ទំនងកិច្ចសហប្រតិបត្តិការលើគ្រប់វិស័យឲ្យកាន់តែរឹងមាំថែមទៀត។
3. កម្ពុជាសង្ឃឹមថារុស្ស៊ីដែលធ្វើជាប្រធានអង្គការកិច្ចសហប្រតិបត្តិការសៀងហៃ នឹងគាំទ្រកម្ពុជាដើម្បីជាអ្នកសង្កេតការណ៍នៃអង្គការនេះ។
4. ឯកឧត្តមឧបនាយករដ្ឋមន្រ្តី ក៏បានលើកថា ក្នុងក្របខ័ណ្ឌសហភាពសេដ្ឋកិច្ចអឺរ៉ាស៊ី កម្ពុជាសង្ឃឹមថា រុស្ស៊ីនឹងគាំទ្រកម្ពុជាក្នុងការចរចាកិច្ចព្រមព្រៀងពាណិជ្ជកម្មសេរីជាមួយ សហភាពសេដ្ឋកិច្ចអឺរ៉ាស៊ី។
5. ឯកឧត្តមឧបនាយករដ្ឋមន្រ្តីសង្ឃឹមថា ប្រធានាធិបតីរុស្ស៊ីនឹងអញ្ជើញមកចូលរួមកិច្ចប្រជុំកំពូលអាស៊ី-អឺរ៉ុបលើកទី១៣ នៅខែវិច្ឆិកា ឆ្នាំ២០២០ នៅទីក្រុងភ្នំពេញ ប្រទេសកម្ពុជា ដែលនេះជាវេទិកាដ៏សំខាន់ដើម្បីពង្រឹងទំនាក់ទំនងកិច្ចសហប្រតិបត្តិការលើគ្រប់វិស័យឲ្យកាន់តែរឹងមាំថែមទៀតរវាងបណ្តាប្រទេសអាស៊ីនិងអឺរ៉ុប ដែលនឹងអាចមានប្រមុខរដ្ឋ/រដ្ឋាភិបាលប្រមាណ ៥១ ប្រទេសចូលរួម។
6. ឯកឧត្តមឧបនាយករដ្ឋមន្រ្តី បានលើកថា ទំហំពាណិជ្ជកម្មរវាងកម្ពុជា-រុស្ស៊ី មានចំនួន 55.39 លានដុល្លារអាមេរិក នៅឆ្នាំ២០១៩ សង្ឃឹមថា ទំហំពាណិជ្ជកម្មរវាងកម្ពុជា-រុស្ស៊ី នឹងមានការកើនឡើងថែមទៀត នៅឆ្នាំ២០២០នេះ។
7. អ្នកទេសចររុស្ស៊ីមកទស្សនាកម្ពុជា មានចំនួន 55653 នាក់ នៅឆ្នាំ២០១៩ សង្ឃឹមថា ចំនួនអ្នកទេសចរ រុស្ស៊ីមកកម្ពុជា នឹងបន្តកើនឡើងជាបន្តបន្ទាប់នៅបណ្តាឆ្នាំខាងមុខ។
8. ឯកឧត្តមឧបនាយករដ្ឋមន្រ្តី បានថ្លែងអំណរគុណរុស្ស៊ីដែលបានជួយកម្ពុជាយ៉ាងច្រើនលើគ្រប់វិស័យ និង ផ្តល់អាហារូបករណ៍ចំនួន ២០ កន្លែង ដល់និស្សិតកម្ពុជាដើម្បីសិក្សានៅរុស្ស៊ីសម្រាប់ឆ្នាំសិក្សា ២០១៩-២០២០ ដោយការសិក្សានៅរុស្ស៊ីមានសារសំខាន់ណាស់ សម្រាប់ការអភិវឌ្ឍធនធានមនុស្សនៅកម្ពុជា។
9. ឯកឧត្តម ឯកអគ្គរដ្ឋទូតរុស្ស៊ី បានសំដែងនូវការកោតសរសើរយ៉ាងខ្លាំងចំពោះការអភិវឌ្ឍនៅកម្ពុជាលើគ្រប់វិស័យ ដែលមានកំណើនសេដ្ឋកិច្ច ក្នុងរង្វង់ ៧ភាគរយ ជាច្រើនឆ្នាំកន្លងមក ទោះបីជាកម្ពុជាមិនមែនជាប្រទេសផលិតប្រេងកាតនិងហ្គាស ដូចប្រទេសដទៃក៏ដោយ។
-ឯកឧត្តម ឯកអគ្គរដ្ឋទូតរុស្ស៊ី មានការរីករាយណាស់ ក្នុងរយៈពេលបេសសកម្មរបស់ ឯកឧត្តម កិច្ចព្រមព្រៀង និងអនុស្សារណៈយោគយល់គ្នា ចំនួន៥១ បានចុះហត្ថលេខារវាងកម្ពុជា និងរុស្ស៊ី ធ្វើអោយកិច្ចសហប្រតិបត្តិការ របស់យើងកាន់តែស៊ីជម្រៅ។
-ឯកឧត្តមសង្ឃឹមថា ប្រធានាធិបតីរុស្ស៊ីនឹងអញ្ជើញមកចូលរួមកិច្ចប្រជុំកំពូលអាស៊ី-អឺរ៉ុបលើកទី១៣ នៅកម្ពុជា ពេលខាងមុខនេះ។
-ឯកឧត្តមបញ្ជាក់ថា រុស្ស៊ីគាំទ្រកម្ពុជាពេញទំហឹង ដើម្បីធ្វើជាអ្នកសង្កេតការណ៍អង្គការកិច្ចសហប្រតិបត្តិការសៀងហៃ។
-ក្រុមការងារកម្ពុជា-រុស្ស៊ីបានចាប់ផ្ដើមការចរចាកិច្ចព្រមព្រៀងពាណិជ្ជកម្មសេរីជាមួយ សហភាពសេដ្ឋកិច្ច
អឺរ៉ាស៊ីរួចហើយ។
