ក្រុម​ហ៊ុន​កាត់​ដេរ​សម្លៀក​បំពាក់​ចំនួន​២​ស្ថិត​នៅ​ក្នុង​ទីក្រុង​ភ្នំពេញបាន​ងាក​មក​ផលិត​ម៉ាស់ស្រប​ពេ​ល​ដែល​តម្រូវ​ការ​ទីផ្សារ​​ម៉ាស់​កំពុង​កើ​ន​ឡើ​ង​


ក្រុម​ហ៊ុន​កាត់​ដេរ​សម្លៀក​បំពាក់​ចំនួន​២​ដែល​មាន​ទីតាំង​ស្ថិត​នៅ​ក្នុង​ទីក្រុង​ភ្នំពេញបាន​ងាក​មក​ផលិត​ម៉ាស់​បន្ថែមស្រប​ពេល​ដែល​តម្រូវ​ការ​ទីផ្សារ​ម៉ាស់​កំពុង​កើន​ឡើង​។ ក្រុម​ហ៊ុន​ទាំង​ពីរ​នោះគ្រោង​នឹង​ដំណើរ​ការ​ផលិត​ម៉ាស់​ក្នុង​រង្វង់​ពី​២ម៉ឺន​ទៅ៨ម៉ឺន​ម៉ាស់​ក្នុង​១ថ្ងៃដោយ​ចាប់​ផ្តើម​ពី​ចុង​ខែ​មេសា​នេះខណៈ​ដែល​ក្រុម​ហ៊ុន​ចំនួន​២​ផ្សេង​ទៀតក៏​ទើប​ទទួល​បាន​ភ្លើង​ខៀវ​ពី​រដ្ឋា​ភិបាល​កម្ពុជា​ដើម្បី​ផលិត​ម៉ាស់ចាប់​ពី​ចុង​ខែ​មេសានិង​ពាក់​កណ្តាល​ឆ្នាំ​២០២០​នេះ​ដែរស្រប​ពេល​ដែល​តម្រូវ​ការ​ម៉ាស់​កំពុង​កើន​ឡើង​។

រោងចក្រកាត់ដេរសម្លៀកបំពាក់ទាំងពីរខាងលើនេះ

ទី១.ក្រុមហ៊ុន Roo Hsing Garment Co.LTD ដែលមានទីតាំងស្ថិតនៅខណ្ឌឬស្សីកែវ រាជធានីភ្នំពេញ។

ទី២. ក្រុមហ៊ុន Global Apparel Textile (Cambodia) Manufacturing LTD ដែលមានទីតាំងស្ថិតនៅខណ្ឌដង្កោ រាជធានីភ្នំពេញ។

ក្រុមហ៊ុនទាំងពីរនេះ គឺជាក្រុមហ៊ុនវិនិយោគលើរោងចក្រកាត់ដេរសម្លៀកបំពាក់ដែលមានកម្មករចន្លោះពី១ពាន់ទៅ២ពាន់នាក់ ទើបនឹងបានស្នើសុំទៅរដ្ឋាភិបាលកម្ពុជា បន្ថែមមុខសញ្ញាផលិតម៉ាស់ដោយក្នុងមួយថ្ងៃក្រុមហ៊ុន Roo Hsing Garment គ្រោងនឹងផលិតឲ្យបានចន្លោះពី៦ទៅ៨ម៉ឺនម៉ាស់។ ចំណែកឯក្រុមហ៊ុន Global Apparel Textile (Cambodia) Manufacturing LTD វិញ គ្រោងនឹងផលិតម៉ាស់ឲ្យបាន២១៦០០ម៉ាស់នៅក្នុងមួយថ្ងៃ។

ក្រុមហ៊ុនទាំងពីរនេះ នឹងចាប់ផ្តើមដំណើរការផលិត ចាប់ពីចុង ខែមេសា នេះតទៅ។ នេះបើយោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា CDC។ដោយឡែក ក្រៅពីក្រុមហ៊ុនទាំងពីរខាងលើនេះ ក្រុមហ៊ុនចំនួន២ផ្សេងទៀត ក៏ទើបទទួលបានភ្លើងខៀវពីរដ្ឋាភិបាលកម្ពុជា ដើម្បីធ្វើការផលិតម៉ាស់សម្រាប់នាំចេញផងដែរ។ ក្នុងនោះ ក្រុមហ៊ុន HK Burltexដែលមានទីតាំងស្ថិតនៅក្នុងសួនឧស្សាហកម្មវឌ្ឍនៈ ក្នុងខណ្ឌដង្កោ រាជធានីភ្នំពេញ ដែលមានទុនវិនិយោគជាង៣លានដុល្លារ គ្រោងនឹងផលិតម៉ាស់ឲ្យបាន៦០ម៉ឺនម៉ាស់នៅក្នុងមួយថ្ងៃ ចាប់ពីចុងខែមេសានេះតទៅ។ចំណែកឯក្រុមហ៊ុនមួយទៀត ឈ្មោះ Andersen Industries ដែលមានទីតាំងនៅស្រុកអង្គស្នួល ខេត្តកណ្តាលក៏គ្រោងនឹងធ្វើការផលិតម៉ាស់ឲ្យបាន១ម៉ឺនម៉ាស់ក្នុងមួយថ្ងៃ ចាប់ពីពាក់កណ្តាលឆ្នាំ២០២០នេះតទៅ។លោក សុខ ចិន្តា​សោភារដ្ឋ​មន្រ្តី​ប្រតិភូ​អម​នាយក​រដ្ឋ​មន្ត្រីនិង​ជា​អគ្គលេខាធិការ​ក្រុម​ប្រឹក្សា​អភិវឌ្ឍន៍​កម្ពុជា​ CDC បានប្រាប់បណ្តាញពត៌មានថា ក្រៅពីក្រុមហ៊ុនថ្មីៗទាំង៤ខាងលើនេះកម្ពុជានៅមានរោងចក្រផលិតម៉ាស់ដ៏ធំមួយទៀតស្ថិតនៅក្នុងខេត្តព្រះសីហនុ។

ក្រុមហ៊ុនខាងលើនេះជាក្រុមហ៊ុនផលិតម៉ាស់សុទ្ធសាតនិងបានដំណើរការតាំងពីមុនមានការផ្ទុះឡើងនៃជំងឺកូវីដ១៩នេះទៅទៀត។ បើតាមលោក សុខ ចិន្តាសោភា ក្រៅពីនេះកម្ពុជាក៏នៅមានក្រុមហ៊ុនផលិតសំភារៈពេទ្យដូចជា ខោ អាវ និងមួក ស្ថិតនៅក្នុងខេត្តកំពង់ចាម និងក្រុងបាវិតខេត្តស្វាយរៀងផងដែរ។ ដើម្បីផ្គត់ផ្គង់ក្នុងស្រុក និងនាំចេញទៅក្រៅប្រទេស។ ដោយឡែកពីលោកនាយករដ្ឋមន្ត្រី ហ៊ុន សែន វិញមកទល់ពេលនេះ កម្ពុជាបានត្រៀមរោងចក្រផលិតម៉ាស់ខ្លួនឯងរួចហើយដែលចាប់ពីពេលនេះទៅកម្ពុជាអាចផលិតម៉ាស់បានជាង១លាន២សែនម៉ាស់ហើយនឹងបង្កើនសមត្ថភាពផលិតអោយបានច្រើនថែមទៀត៕