ភ្នំពេញៈ បើទោះបីជាសេដ្ឋកិច្ចរបស់កម្ពុជា បានរងការប៉ះទង្គិចពីការផ្ទុះជំងឺ Covid-19 ធនាគារពិភពលោក (World Bank) ក្នុងរបាយការណ៍ថ្មីរបស់ខ្លួនស្តីពី «តំបន់អាស៊ីបូព៌ានិងប៉ាស៊ីហ្វិក ក្នុងសម័យកាល Covid-19 កំណើនសេដ្ឋកិច្ចកម្ពុជា នឹងស្តារឡើងវិញមកនៅ ៥,៩ភាគរយក្នុងឆ្នាំ២០២១ ។
ប្រសិនបើផលប៉ះទង្គិចនេះ ហៀរទៅដល់វិស័យសំណង់ និងអចលនទ្រព្យដែលជាផ្នែកសំខាន់ៗ នាំមកនូវកំណើនសេដ្ឋកិច្ចរបស់កម្ពុជា ក្នុងខណៈដែលទីផ្សារហិរញ្ញវត្ថុមានចលាចល វាអាចនឹងជះឥទ្ធិពលអាក្រក់មែនទែន ដល់កំណើនរបស់កម្ពុជា។ ការស្ទុះងើបឡើងវិញ នៃសកម្មភាពសេដ្ឋកិច្ចនៅប្រទេសចិន និងនៅទីផ្សារធំៗផ្សេងទៀតក្នុងឆ្នាំ២០២១ នឹងធ្វើឱ្យចក្ខុវិស័យសេដ្ឋកិច្ចរបស់កម្ពុជា មានភាពប្រសើរឡើងវិញនៅឆ្នាំក្រោយនេះ។
ធនាគារអភិវឌ្ឍអាស៊ី (ADB) បានព្យាករណ៍ថា សេដ្ឋកិច្ចកម្ពុជាអាចនឹងហក់ឡើងវិញដល់៥.៧%ក្នុងឆ្នាំ២០២១ខាងមុខ ប្រសិនបើវិបត្តិនៃជំងឺកូរ៉ូណា ឬ Covid-19 បញ្ចប់។
នាយិកាធនាគារអភិវឌ្ឍអាស៊ីប្រចាំប្រទេសកម្ពុជា លោកស្រី Sunniya Durrani Jamal បានលើកឡើងថា “សកម្មភាពសេដ្ឋកិច្ច នឹងត្រឡប់មករកសភាពដើមវិញ ប្រសិនបើជំងឺរាតត្បាត Covid-19 បញ្ចប់ ហើយសេដ្ឋកិច្ចកម្ពុជារំពឹងថា នឹងហក់ឡើងដល់៥.៧ភាគរយ។
លោកស្រីបន្តថា ដើម្បីឆ្លើយតបនឹងបញ្ហាប្រឈមដោយជំងឺកូវីដនេះ រដ្ឋាភិបាលកម្ពុជាបានចាត់វិធានការបន្ទាន់មួយចំនួន ដូចជា គាំទ្របវត្សរ៍ដល់កម្មករកម្មការិនីកាត់ដេរ ការសម្រាលពន្ធ បំណុលដល់អាជីវកម្មនានាជាដើម។ មិនតែប៉ុណ្ណោះក៏មានការរៀបចំថវិកាបម្រុងចាំបាច់ ដើម្បីកាត់បន្ថយផលប៉ះពាល់សេដ្ឋកិច្ចដោយសារវិបត្តិនេះផងដែរ។
ការិយាល័យស្រាវជ្រាវម៉ាក្រូសេដ្ឋកិច្ចអាស៊ាន (AMRO) ដែលចេញផ្សាយនៅក្នុងរបាយការណ៍ចុងក្រោយរបស់ខ្លួន បានបង្ហាញពីស្ថានភាពរួម នៃចក្ខុវិស័យកំណើនសេដ្ឋកិច្ចរបស់ប្រជាជាតិអាស៊ាន +៣ សម្រាប់ឆ្នាំនេះ និងឆ្នាំក្រោយចំពេលដែលបណ្តាលមកពីជំងឺរាតត្បាត Covid-19 ។
របាយការណ៍បានឱ្យដឹងថា កំណើនសេដ្ឋកិច្ចរបស់ប្រទេសកម្ពុជា នៅឆ្នាំនេះត្រូវបានព្យាករថា នឹងសម្រេចបានកំនើនត្រឹមតែ២,៧ភាគរយ ប៉ុន្តែនឹងកើនឡើងដល់៦,៨ ភាគរយនៅឆ្នាំក្រោយ។