ទស្សនៈមិត្តអ្នកអាន៖ កម្ពុជា បញ្ជាក់ជំហរជាថ្មីអំពីឯករាជក្យ អធិបតេយ្យ អព្យាក្រឹត្យអចិន្ត្រៃយ៍និងមិនចូលបក្សសម្ព័ន្ធ


ប្រមុខរាជរដ្ឋាភិបាលកម្ពុជា ជា​ថ្មីម្តង​ទៀត​បាន​អះអាង​ថា កម្ពុជា​គ្មាន​មូល​​ដ្ឋាន​កងទ័ព​បរទេស​ណា​មួយ​នៅ​តាមដែន​សមុទ្រ​ ឬកំពង់​ផែ​សមុទ្រឡើយ ហើយ​​ក៏មិន​អនុញ្ញាតឲ្យ​ប្រ​ទេស​​ណា​មួយ​មក​បោះ​ទីតាំងមូលដ្ឋាន​ទ័​ពនៅកម្ពុជាដើម្បី​ប្រឆាំង​ជាមួយ​ប្រទេសដទៃ​ទៀតដែរព្រោះ​វា​ផ្ទុយ​នឹង​រដ្ឋធម្មនុញ្ញ​។​ រដ្ឋធម្មនុញ្ញនៃព្រះរាជាណា​​​ចក្រកម្ពុជា​ឆ្នាំ​១៩៩៣ ជំពូកទី១ អំពី​អធិប​តេយ្យ មានមាត្រាមួយ​ចែង​​ថា ​ព្រះរាជាណាចក្រកម្ពុជា ជា​រដ្ឋ​ឯករាជក្យ អធិបតេយ្យ សន្តិភាព អព្យាក្រឹត្យ អចិ​ន្ត្រៃយ៍មិន​ចូល​បក្ស​សម្ព័ន្ធ និង​ជារដ្ឋ​ដែល​មិន​អាច​បំបែក​បាន។ ​ប៉ុន្តែផ្ទុយទៅវិញបើមានប្រទេសណាមួយចង់ចូលមកសំចត និងធ្វើសមយុទ្ធនៅកម្ពុជា គឺអាចដាក់ពាក្យស្នើសុំបាន លោកនាយករដ្ឋមន្ត្រី ហ៊ុន សែន ប្រកាស​ស្វាគមន៍គ្រប់ពេល។

បើ​រដ្ឋ​ធម្មនុញ្ញ​ព្រះរាជាណាចក្រកម្ពុជាបាន​ចែង​យ៉ាង​ដូច្នេះ ហើយ​ប្រមុខ​ដឹកនាំ​រដ្ឋាភិបាល ​ក៏​បាន​បញ្ជាក់​ជំហរ​អព្យា​ក្រឹត្យអំពីឯករាជក្យ​ភាព​របស់​ខ្លួនជា​រដ្ឋ​អធិបតេយ្យ​មិន​ចូល​បក្ស​សម្ព័ន្ធម្តងហើយ​ម្តងទៀត ហេតុអ្វី​​នៅ​តែ​មា​ន​បរទេស​លើកឡើង​ដដែល​ជា​ដដែល​ថា កម្ពុជា​មាន​មូលដ្ឋាន​យោធា​របស់​ចិននៅត្រង់​នេះ​ត្រង់​នោះមិន​ឆ្ពោះ​​ត្រង់​ណា?

មែនទែនទៅ ពាក្យចចាមអារាមជុំ​វិញរឿង​មូលដ្ឋាន​ទ័ព​ចិន​នៅ​កម្ពុជា វា​​ជា​ការប្រជែង​អំណាច​គ្នា​រវាងចិន​ និង​សហរដ្ឋ​អាមេរិក ​ក្នុង​ល្បែង​ភូមិ​សាស្ត្រ​នយោបាយ​នៅ​ឥណ្ឌូចិន​។ ​​បើ​​មើល​ឲ្យ​ច្បាស់​ទៅ ការ​ផ្សព្វផ្សាយ​ពាក្យ​ច​ចាម​អារាម​​ពី​ការ​សង់​​មូល​ដ្ឋាន​ទ័ព​ចិន​នៅ​កម្ពុជា គឺធ្វើ​ឡើង​​ព្រោះ​តែ​អាមេរិក​បារម្ភ​ពី​ផល​ប្រយោជន៍​របស់​ខ្លួន​ឯងច្រើន​ជាង​បារម្ភ​ពី​​កម្ពុជា​។ វត្តមាន​មូលដ្ឋាន​ទ័ព​ជើង​ទឹក​ចិន​នៅ​កម្ពុជា ​ប្រសិន​បើ​មាន​មែន​នោះ វា​នឹង​ផ្ដល់​​ប្រ​យោជន៍ដល់​​​ចិន។ ផល​ប្រយោ​ជន៍​​នេះ ​មិន​ត្រឹម​តែ​ធ្វើ​ឲ្យ​អាមេរិក​ខាត​បង់​ទេ តែ​វា​អាច​ក្លាយ​ទៅ​ជា​ហានិភ័យ​ស​ម្រាប់​​អាមេរិក​​ថែម​ទៀត​។ ទោះយ៉ាង​នេះក្តី កម្ពុជា​បាន​ប្រកាស​ជំហរយ៉ាង​ម៉ឹងម៉ាត់​ម្តង​ហើយ​ម្តង​ទៀត​ថា កម្ពុជា​ ជា​រដ្ឋ​ឯករាជ្យ​អធិបតេយ្យ អព្យាក្រឹត្យមិន​ចូល​បក្សសម្ព័ន្ធ ដូច្នេះ​កម្ពុជា នឹង​មិន​អនុញ្ញាតឲ្យ​មាន​មូលដ្ឋា​ន​ទ័ពបរទេស​​នៅលើ​ទឹក​ដី​ខ្លួន ហើយ​​ក៏អនុញ្ញាត​ឲ្យ​មាន​មូលដ្ឋាន​ទ័ពរបស់​​ខ្លួន​នៅលើ​ទឹក​ដី​ប្រទេសដទៃ​ដែរ លើ​កលែង​តែក្នុង​ក្របខណ្ឌ​រក្សា​សន្តិភាព​របស់​អង្គការ​សហប្រជាជាតិ​ប៉ុណ្ណោះ។

​​​​​ចិន បច្ចុប្បន្នជាមហាអំណាចសេដ្ឋកិច្ចទី២ លើពិភលោក តាមពីក្រោយសហរដ្ឋអាមេរិកអាមេរិក​។ ហើយការព្យា​​ករណ៍គេរំពឹងថា មហា​យក្ស​ចិន នឹងឡើង​មក​ជំនួស​​សហរដ្ឋអាមេរិក​យកលេខ១ នៅ​ក្នុងឆ្នាំ២០២២។ ដោ​យសារតែការវិនិយោគរបស់ចិន​កើតមាននៅគ្រប់ទីកន្លែងលើពិភពលោក ពិសេសេការមកវិនិយោគនៅ​ក​ម្ពុ​ជា ដែល​ជាទីតាំងភូមិសាស្ត្រនយោបាយផង បានធ្វើឲ្យមហាអំណាចសហរដ្ឋអាមេរិក ​មានការព្រួយបារម្ភពីឥទ្ធិពលរបស់ចិន ដែល​កំពុងស្ទុះហក់ឡើងទាំងវិស័យសេដ្ឋកិច្ច ពាណិជ្ជកម្ម និងយោ​ធា​។

ដើម្បីទប់ទល់​ការហក់​ឡើង​របស់​មហាយក្សចិន ​អាមេរិក បានប្រើគ្រប់មធ្យោបាយ ​ដើម្បីរារាំងការរីក​ធំធាត់​​រប​ស់មហា​យក្សចិនក្នុង​គោលដៅការពារ​ផលប្រយោ​ជន៍​ខាងភូមិសាស្ត្រនយោបាយរបស់ខ្លួន ដូចជា ​ការ​ធ្វើ​សង្គ្រាម​ពាណិជ្ជកម្ម​ជាមួយ​​​ចិន ​ការ​ដណ្តើម​កាន់​កាប់​ទីតាំង​ភូមិសាស្ត្រនយោ​បាយដែល​មិន​ដែល​មាន​ក្នុង​ប្រវត្តិ​សា​ស្ត្រ​​សកល​លោក។ ការ​បំផុស​ផ្សព្វផ្សាយ​ពាក្យ​ចចាម​អារាម និងការ​ប្រឌិត​ព័ត៌​មាន​មិន​ពិត​ជា​ច្រើន​ វាយ​ប្រហារទំនាក់​ទំនង​ពាណិជ្ជកម្ម​រវាង​កម្ពុជា-​ចិន ​ឲ្យ​ទៅជា​រឿងអសន្តិសុខផ្នែក​យោធា​ក្នុង​តំបន់ បាន​កើត​មាន​នៅ​ស្ទើរ​គ្រប់​សារព័ត៌មាន​ធំៗរបស់​អាមេរិកកាល​ពី​ឆ្នាំ​មុន​។

សហរដ្ឋ​អាមេរិក​បាន​បង្កើត​​ព័ត៌មាន​ក្លែងក្លាយថា ប្រទេសចិន និងកម្ពុជាបានលួចចុះកិច្ចព្រមព្រៀងសម្ងាត់ ផ្តល់ឲ្យ​​ចិននូវកម្មសិទ្ធផ្តាច់មុខប្រើប្រាស់មូលដ្ឋានយោធាជើងទឹករាមនៅខេត្តព្រះសីហនុ។ ការផ្សព្វ​ផ្សាយ​ព័ត៌មាន​ក្លែង​​ក្លាយនេះ ត្រូវបានរដ្ឋាភិបាលកម្ពុជា ​បដិសេធទាត់ចោលជារឿយៗ​។
ជាការកត់សម្គាល់ ​នៅក្នុង​ប្រវត្តិ​សាស្ត្រ​រាប់​ពាន់​ឆ្នាំ​របស់​ប្រទេស​ចិន គឺ​ចិន​មិនដែល​មាន​មហិច្ឆតា ឬបា​ន​ដាក់​នឹម​អាណានិគម​លើ​ប្រទេស​ណាមួយ​ឡើយ មាន​តែការ​ធ្វើ​ជំនួញ​ជាមួយ​បណ្តា​ប្រទេស​នានា​​​ប៉ុណ្ណោះ។ ផ្ទុយ​មក​វិញ គេ​សង្កេត​ឃើញសហរដ្ឋ​អាមេរិក​ បាន​ដាក់​ពង្រាយ​មូល​​ដ្ឋាន​យោធារបស់​ខ្លួន​ជា​ច្រើន​នៅជុំវិញ​ពិភពលោក ពិ​សេ​ស​​​​គ្រាន់​តែ​នៅ​តំបន់​អាស៊ីប៉ាស៊ីហ្វិក​ មានដូច​ជា​មូល​ដ្ឋាន​ទ័ព​នៅជប៉ុន ហ្វីលីពីន ថៃ…ជា​ដើម​។​ល។ តើមូលដ្ឋាន​យោ​ធា​របស់​សហរដ្ឋ​អាមេរិកទាំង​​នេះ មិនមែន​ជាការគំរាមកំហែងដល់​សន្តិសុខនៅក្នុងតំបន់ទេឬ?

កាលពី​ឆ្នាំ​ទៅមិញ មន្ត្រីជាន់​ខ្ពស់​ក្រសួងការពារជាតិកម្ពុជា បាន​ដឹកនាំ​អ្នក​សារព័ត៌មាន​ជាតិ-អន្តរជាតិសរុប​ជិត ១០០នាក់​ ចុះ​ទៅ​ពិនិត្យ​មើល​នៅ​ទីតាំង​ជាក់​ស្តែង​ ដែលអាមេរិក​ បាន​ចោទ​ប្រកាន់ជុំវិញ​រឿង​ទីតាំងមូលដ្ឋា​ន​ទ័ពចិន​នៅកម្ពុជា។​ ​ក្រោយការចុះពិនិត្យ អ្នកសារព័ត៌មានជាតិ និងអន្តរជាតិ មិន​បាន​រក​ឃើញ​អ្វី​ដែល​ជា​ការ​សង្ស័យ​របស់​សារព័ត៌មាន​សហរដ្ឋ​អាមេរិកផ្សាយឡើយ។
ការប្រឌិត​ព័ត៌មានក្លែង​ក្លាយជុំ​វិញ​រឿង​មូល​ដ្ឋាន​យោធាចិន​នៅកម្ពុជា​ គឺ​ជា​ព័ត៌មាន​បំប៉ោង បំភ្លៃ បំផ្លើស ដូច​ប្រ​​សាសន៍​​របស់​ប្រមុខ​រាជរដ្ឋាភិបាល​លើក​ឡើង​​​ថា ការចោទប្រកាន់លើរាជរដ្ឋាភិបាលកម្ពុជា​​គឺជាចេតនាដ៏អា​ក្រក់បំផុតដែលចង់បំផ្លាញកេរ្តិ៍ឈ្មោះកម្ពុជាដើម្បីផលប្រយោជន៍ភូមិសាស្ត្រនយោ​បាយ និងដើម្បីមហិច្ឆតាដ៏ខ្មៅ​កខ្វក់​របស់​ពួកគេតែប៉ុណ្ណោះ៕