ថ្ងៃចន្ទ ១៥រោច ខែអាសាឍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២០ ខែកក្កដា ឆ្នាំ២០២០ នៅទីស្ដីការក្រសួង ឯកឧត្តម រស់ វណ្ណា រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំផ្សព្វផ្សាយអំពីដំណើរការ ប្រព័ន្ធស្វ័យប្រវត្តិកម្មផ្តល់លិខិតអនុញ្ញាតឱ្យនាវាចូលតាមកំពង់ផែនៃព្រះរាជាណាចក្រកម្ពុជា ដោយមានការចូលរួមពីថ្នាក់ដឹកនាំក្រសួង តំណាងក្រុមហ៊ុន តំណាងធនាគារ និងមន្ត្រីជំនាញពាក់ព័ន្ធផងដែរ។
កិច្ចប្រជុំនេះធ្វើឡើងក្នុងគោលបំណង ផ្សព្វផ្សាយអំពីដំណើរការប្រព័ន្ធស្វ័យប្រវត្តិកម្មផ្តល់លិខិត អនុញ្ញាតឱ្យនាវាចូលតាមកំពង់ផែនៃព្រះរាជាណាចក្រកម្ពុជា ដល់គ្រប់ភាគីពាក់ព័ន្ធដែលទទួលបន្ទុកផ្តល់លិខិតអនុញ្ញាតធ្វើនាវាចរណ៍ចូលតាមកំពង់ផែដូចជា៖ ប្រតិបត្តិការ និងនីតិវិធីបំពេញទម្រង់ បែបបទចូលចតនាវា ក៏ដូចជានីតិវិធីនៃការទូទាត់ថ្លៃសេវា តាមប្រព័ន្ធអនឡាញ ជាមួយធនាគារឯកទេសវីង ដើម្បីធានាបាននូវតម្លាភាព ប្រសិទ្ធភាព ចំណេញពេលវេលា ផ្ដល់ភាពជឿទុកចិត្តដល់អ្នកផ្ដល់ និង អ្នកប្រើប្រាស់សេវា គ្រប់ទីកន្លែង គ្រប់ពេលវេលា ព្រមទាំងកាត់បន្ថយនីតិវិធីស្មុគស្មាញដែលធ្វើឱ្យយឺត យ៉ាវក្នុងការផ្តល់លិខិតអនុញ្ញាតឱ្យនាវាចូល ជាពិសេសសម្រួលដល់អតិថិជនដែលជាភ្នាក់ងារនាវា ក្នុង ការបង់កម្រៃសេវាស្នើសុំលិខិតអនុញ្ញាតឱ្យនាវាចូល និងងាយស្រួលក្នុងគ្រប់គ្រងការចូលរបស់នាវា ដែលធ្វើនាវាចរណ៍ រក្សាសន្តិសុខ សុវត្តិភាព ចូលរួមចំណែកការពារបរិស្ថាន។
ថ្លែងក្នុងកិច្ចប្រជុំនាឱកាសនោះ ឯកឧត្ដមរដ្ឋលេខាធិការបានបញ្ជាក់ថា៖ បច្ចេកវិទ្យាព័ត៌មានវិទ្យាដើរ តួយ៉ាងសំខាន់ក្នុងការធ្វើទំនើបកម្មការផ្ដល់សេវាសាធារណៈ ការកសាងទីក្រុងឆ្លាតវៃ (Smart City) ការលើកកម្ពស់និងប្ដូរទម្រង់ក្នុងការបំពេញការងារជាដើម។
ឯកឧត្តមរដ្ឋលេខាធិការបានបន្ថែមទៀតថា៖ ការរៀបចំប្រព័ន្ធបច្ចេកវិទ្យាសម្រាប់ធ្វើការដាក់ពាក្យ និង ទូទាត់ប្រាក់ថ្លៃសេវា តាមប្រព័ន្ធអនឡាញនេះជាជោគជ័យថ្មីមួយទៀតរបស់ក្រសួងសាធារណការ និងដឹកជញ្ជូន ក៏ដូចជារាជរដ្ឋាភិបាលក្នុងកម្មវិធីគោលនយោបាយកែទម្រង់ស៊ីជម្រៅរបស់ខ្លួន ក្នុងការ បង្ខិតសេវាសាធារណៈទៅកៀកប្រជាពលរដ្ឋ។
ឯកឧត្ដមរដ្ឋលេខាធិការបានឱ្យដឹងថា ភ្នាក់ងារនាវាចរណ៍ត្រូវពិនិត្យឯកសារឱ្យបានម៉ត់ចត់និងគ្រប់ជ្រុង ជ្រោយ ជាពិសេសត្រូវធានាថាតើមានឯកសារគ្រប់គ្រាន់ និងបានចុះបញ្ជីជាមុនហើយឬនៅ មុននឹងផ្តល់ លិខិតអនុញ្ញាតឱ្យនាវាចូលទៅតាមបណ្តាកំពង់ផែ ដើម្បីជៀសវាងបញ្ហានៅពេលក្រាយ។
ជាទីបញ្ចប់ ឯកឧត្ដមរដ្ឋលេខាធិការ បានសម្ដែងនូវការកោតសរសើរក្រុមការងារជំនាញពាក់ព័ន្ធនៃអគ្គ នាយកដ្ឋានដឹកជញ្ជូនផ្លូវទឹក សមុទ្រ និងកំពង់ផែ ជាពិសេសក្រុមការងារ IT របស់នាយកដ្ឋានព័ត៌មាន វិទ្យា និងទំនាក់ទំនងសាធារណៈ ដែលបានខិតខំប្រឹងប្រែងបំពេញការងារ និងបានសហការណ៍គ្នាអស់ពី កម្លាំងកាយចិត្ត និងពេលវេលាដើម្បីរៀបប្រព័ន្ធនេះឱ្យចេញជារូបរាងឡើង និងបានស្នើឱ្យក្រុមការងារ ជំនាញពាក់ព័ន្ធទាំងអស់បន្តវប្បធម៌សហការដ៏ស្អិតរមួតនេះបន្តទៀតដើម្បីបំពេញចំណុចខ្វះខាត សំដៅឱ្យប្រព័ន្ធនេះមានសុក្រឹតភាព និងមានភាពជឿទុកចិត្ត ក្នុងការបម្រើសេវាសាធារណៈ និងបម្រើឱ្យឧត្ដម ប្រយោជន៍របស់ជាតិមាតុភូមិ៕
