ភ្នំពេញ៖ គ្រូបង្គោលនៃសាលាមធ្យមសិក្សាគរុកោសល្យមត្តេយ្យមជ្ឈឹមបានទទួលវគ្គបណ្ដុះបណ្ដាលពីរបៀបបង្រៀនតាមប្រព័ន្ធអេឡិចត្រូនិកដើម្បីអភិវឌ្ឍសមត្ថភាពគ្រូបង្គោលឱ្យចេះប្រើប្រាស់ប្រព័ន្ធអេឡិចត្រូនិកបម្រើដល់ការបង្រៀនយកទៅអនុវត្តផ្ទាល់ជាមួយសិស្សដើម្បីធានាបានថាសិស្សានុសិស្សនៅតែអាចទទួលបានការអប់រំប្រកបដោយគុណភាពហើយស្របតាមទិសដៅក្រសួងអប់រំ យុវជន និងកីឡា។
វគ្គបណ្ដុះបណ្ដាលនេះដែរត្រូវបានរៀបចំជាពីរក្រុមគឺក្រុមរដ្ឋបាល សម្រាប់សម្របសម្រួលកម្មវិធីខ្លឹមសារមេរៀន និងគ្រប់គ្រងថ្នាក់រៀនតាមGoogle meetនិងGoogle Classroom។
ពិធីបើកវគ្គបណ្ដុះបណ្ដាលនេះបានប្រព្រឹត្តទៅក្រោមអធិបតីភាពឯកឧត្ដមបណ្ឌិតសភាចារ្យហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។ឆ្លៀតក្នុងឱកាសនោះឯកឧត្ដមក៏បានលើកឡើងថា “ចាប់ពីពេលនេះតទៅបច្ចេកវិទ្យាជាផ្នែកមួយនៃកម្មវិធីសិក្សាសម្រាប់គ្រឹះស្ថានបណ្ដុះបណ្ដាលគ្រូ” ដូច្នេះគ្រូចេញថ្មីទាំងអស់ត្រូវតែចេះប្រើប្រាស់ប្រព័ន្ធGoogle Suite(G-Suite) ហើយក្រសួងនឹងដាក់បញ្ចូលទៅក្នុងសាលាគ្រប់កម្រិតតែម្ដង៕
២៩ កក្កដា ២០២០ | សាលាមធ្យមសិក្សាគរុកោសល្យមត្តេយ្យមជ្ឈឹម
