តំណាងរាស្រ្តមណ្ឌលរាជធានីភ្នំពេញ បាន​ប្រគល់អំណោយហ្សាកាត់ជូនបងប្អូនប្រជាពលរដ្ឋក្រីក្រ ចំនួន ៥៥គ្រួសារ មកពីភូមិទាំង ៥ ក្នុង​សង្កាត់ច្រាំងចំរេះ១ ខណ្ឌឫស្សីកែវ រាជធានី​ភ្នំពេញ​


នៅព្រឹកថ្ងៃទី២២ ខែវិច្ឆិកា ឆ្នាំ២០២០ លោកជំទាវ ម៉ាណ ណាវី តំណាងរាស្រ្តមណ្ឌលរាជធានីភ្នំពេញ​ និង​ជា​អនុប្រធាន​​សមាគម​​អភិវឌ្ឍន៍​នារី​ឥស្លាម​កម្ពុជា​ រួមជាមួយលោកជំទាវ ម៉ាន ចិន្តា រដ្ឋលេខា ធិការក្រសួងកិច្ចការនារី និង​ជា​អនុប្រធាន​សមាគមអភិវឌ្ឍន៍​នារី​ឥស្លាម​កម្ពុជា​ លោកជំទាវ​ យេី​ អាស៊ី​គីន​ អនុរដ្ឋលេខាធិការក្រសួងកសិកម្ម រុក្ខា​ប្រមាញ់​ និង​នេសាទ​ និង​ជា​អគ្គលេខាធិការ​សមាគមអភិវឌ្ឍន៍​​នារីឥស្លាមកម្ពុជា នឹង​យុវជន​សម្ពន្ធ័យុវជនមុស្លិមកម្ពុជា​ រាជធានីភ្នំពេញ​ បាន​ប្រគល់អំណោយហ្សាកាត់ជូនបងប្អូនប្រជាពលរដ្ឋក្រីក្រ ចំនួន ៥៥គ្រួសារ មកពីភូមិទាំង ៥ ក្នុង​សង្កាត់ច្រាំងចំរេះ១ ខណ្ឌឫស្សីកែវ រាជធានី​ភ្នំពេញ​ ។
លោកជំទាវ ម៉ាណ​ ណាវី​​ បានមានប្រសាសន៍ពាំនាំ​នូវសេចក្ដីនឹករលឹកពីសំណាក់សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាលសម្តេចទាំងទ្វេរបានគិតគូរអំពីសុខទុក្ខរបស់បងប្អូនប្រជាពលរដ្ឋទាំងអស់ដោយក្តីនឹករលឹក និងការផ្តាំផ្ញើសាកសួរសុខទុក្ខពីសំណាក់ ឯកឧត្តម អូស្មាន ហាស្សាន់ ទេសរដ្ឋមន្រ្តីទទួល បន្ទុកបេសកកម្មពិសេស ទៅ​កាន់​បងប្អូន​ប្រជា ពលរដ្ឋ ។ លោក​ជំទាវ​បាន​បន្ត​ទៀត​ថា​ក្រោម​ការ​ដឹកនាំ​របស់រាជរដ្ឋាភិបាលដែលមានសម្ដេចអគ្គមហាសេនាបតីតេជោ ហ៊ុន​ សែន​ ជា​ប្រមុខ​ដឹកនាំ​ បាន​បង្ក​រលក្ខណៈ​ងាយ​ស្រួល​គ្រប់​បែប​យ៉ាង​ ដល់​បងប្អូន​ប្រជាពលរដ្ឋ​សាសនិក​ឥស្លាម​កម្ពុជា​ ប្រកបដោយសុខដុមរមនីយកម្មផ្នែកសាសនា ។
ក្នុងឱកាសនោះដែរលោកជំទាវ ក៏​បានក្រើនរំលឹកដល់បងប្អូនប្រជាពលរដ្ឋអោយបន្តថែរក្សាអនាម័យ រស់នៅស្អាត និងអនុវត្តរាល់វិធានការនានារបស់រាជរដ្ឋាភិបាលកម្ពុជា ដែលបានដាក់ចេញក៏ដូចជាក្រសួងសុខាភិបាលក្នុងការទប់ស្កាត់ការរីករាល ដាលជំងឺកូវីដ-១៩ ។
សូមបញ្ជាក់ផងដែរថា អំណោយហ្សាកាត់ដែលចែកជូនប្រជាពលរដ្ឋក្រីក្រ ចំនួន៥៥​ គ្រួសារ ​​ ក្នុង​មួយគ្រួសារទទួលបាន​ អង្ករ ១០គឺឡូ​ក្រាម ទឹកដោះគោ ៥ កំប៉ុង មី កន្លះកេស ទឹកត្រី ៣ ដប ទឹកត្រចៀកកាំ ១យួរ​ សាប៊ូ ១ កញ្ជប់ ថវិការ ២ មុឺនរៀល និង​ថវិកា​របស់​ឯកឧត្តម អូស្មាន ហាស្សាន់ ទេសរដ្ឋមន្រ្តីទទួលបន្ទុកបេសកកម្មពិសេស ចំនួន​ ២ ម៉ឺនរៀលបន្ថែមទៀតផងដែរ ។