សហគមន៍កសិកម្មបណ្តុំកសិករនៅខេត្ត បន្ទាយមានជ័យ ទទួលបានឧបករណ៍សម្រាប់ព្រោះស្រូវចំនួន ៥០ឈុត ដែលជាអំណោយ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីរួមចំណែកជួយជំរុញការដាំដុះស្រូវបានលឿន តាមបច្ចេកទេសថ្មីស្របនិងទៅនឹងការរីក ចម្រើនរបស់ប្រទេសជាតិនោះ។
ថ្លែងនៅក្នុងពិធីប្រគល់ឧបករណ៍ព្រោះស្រូវ ដល់បណ្តាសហគមន៍កសិកម្មបណ្តុំកសិករ និងស្ថាប័នឯកជន ចំនួន៥០ឈុត ដែលជាអំណោយរបស់សម្តេចតេជោ ហ៊ុន សែន ដែលបាន ធ្វើឡើងនៅមន្ទីរកសិកម្មរុក្ខាប្រមាញ់ និងនេសាទខេត្ត កាលពីថ្ងៃ១៥រោច ខែបុស្ស ឆ្នាំជូត ទោ ស័កព.ស ២៥៦៤ ត្រូវនឹងថ្ងៃពុធ ទី១៣ ខែមករា ឆ្នាំ២០២១ ឯកឧត្តម អ៊ុំ រាត្រី អភិបាលខេត្ត បន្ទាយមានជ័យបានមានប្រសាសន៍ថា ក្នុងនាមឱ្យអាជ្ញាធរខេត្ត និងប្រជាកសិករក្នុងខេត្ត បន្ទាយមានជ័យ សូមថ្លែងអំណរគុណយ៉ាងជ្រាលជ្រៅជូនចំពោះសម្តេចតេជោ ហ៊ុន សែន ដែលបានផ្តល់អំណោយដ៏ថ្លៃថ្លា ជាគ្រឿងឧបករណ៍សម្រាប់បម្រើវិស័យកសិកម្ម ការដាំដុះដំណាំស្រូវ ដែលជាផ្នែកមួយជួយជំរុញឱ្យកសិករ មានលទ្ធភាពប្រើប្រាស់ឧបករណ៍សម្រាប់ បង្កបង្កើនផលស្រូវកាន់តែទំនើបនោះ។
អភិបាលខេត្តបន្ទាយមានជ័យ បានបន្តទៀតថា អំណោយដ៏មានតម្លៃនេះ វានឹងចូលរួម ចំណែកក្នុងការលើកកម្ពស់ប្រសិទ្ធភាពការងារ ចំណេញពេល និងពលកម្ម ជាពិសេសចូលរួម លើកកម្ពស់ ការធ្វើទំនើបកម្មកសិកម្ម តាមរយៈការប្រើប្រាស់គ្រឿងយន្តកសិកម្ម ដើម្បីបង្កើនសមត្ថភាពផលិត ធានាទាំងបរិមាណផ្គត់ផ្គង់ និងគុណភាព ស្របតាមប្រសាសន៍របស់សម្តេចតេជោ ហ៊ុន សែន នាយករដ្ឋមន្ត្រី ដែលក្រសួងមន្ទីរកសិកម្ម រុក្ខាប្រមាញ់ និងនេសាទ កំពុងតែជំរុញយ៉ាងសកម្មចលនាបង្កបង្កើនផល ដើម្បីធានាសុវត្ថិភាពស្បៀងសម្រាប់គ្រួសារ និងសម្រាប់សង្គម។
ជាមួយនោះដែរឯកឧត្តម អ៊ុំ រាត្រី ក៏បានក្រើនរម្លឹកដល់បណ្តាសហគមន៍កសិកម្មបណ្តុំកសិករ ដែលទទួលបាននូវឧបករណ៍សម្រាប់ព្រោះស្រូវនេះ ត្រូវតែបង្កើនការដាំដុះដំណាំ ស្រូវឱ្យអស់លទ្ធភាព ហើយត្រូវរួមគ្នាថែរក្សាឧបករណ៍ព្រោះស្រូវនេះ ឱ្យបាននៅគង់វង្ស ដើម្បីប្រើប្រាស់បានយូរអង្វែង៕
