(សៀមរាប)៖ ក្រុមការងារនាយកដ្ឋានអភិរក្សប្រាសាទក្រៅឧទ្យានអង្គរ បានរៀបចំពិធីក្រុងពលីសែនព្រេនបួងសួងសុំសេចក្តីសុខចម្រើន ដើម្បីរុះរើខ្លោងទ្វារខាងលិចនៃប្រាសាទចៅស្រីវិបុល មុននឹងជួសជុលឱ្យដំណើរការបានរលូន សុវត្ថិភាព និងជោគជ័យក្នុងការបំពេញការងារអភរិក្សសម្បត្តិដូនតា។
ពិធីនេះធ្វើឡើងនាថ្ងៃទី១៥ ខែកុម្ភៈ ឆ្នាំ២០២១។ តាមការបញ្ជាក់របស់ឯកឧត្តម គឹម សុធិន អគ្គនាយករងអាជ្ញាធរជាតិអប្សរាឱ្យដឹងថា ខ្លោងទ្វារខាងលិចនេះ គឺរងនូវការខូចខាតដោយសារអាយុកាល ធម្មជាតិ និងការបំផ្លាញរបស់មនុស្សក្នុងសម័យសង្គ្រាមផង ធ្វើឱ្យរលុះរចនាសម្ពន្ធសំណង់ខូចរូបរាងខ្លោងទ្វារ។
កិច្ចការដំបូង ក្រុមការងារនឹងរុះរើសំណង់ខ្លោងទ្វារនេះសិន រួចទើបដំណើរការជួសជុលឱ្យស្របតាមបទដ្ឋានធម្មនុញ្ញអង្គរ។
ក្នុងឱកាសនោះដែរ ឯកឧត្តមអគ្គនាយករងក៏បានណែនាំដល់ក្រុមការងារ ឆ្មាំ ពលករទាំងអស់ ឱ្យខិតខំបំពេញការងារឱ្យបានល្អប្រសើរក្នុងនាមជាអ្នកជំនាញថែរក្សាអង្គរ៕
