អភិបាលខេត្តត្បូងឃ្មុំ ចុះពិនិត្យរមណីយដ្ឋានធម្មជាតិទឹកធ្លាក់ខួបប្រាំងខួបវស្សា «ទឹកធ្លាក់ហោង» ដើម្បីកែលម្អសោភ័ណភាពឡើងវិញ ស្រូបយកកំណើនភ្ញៀវទេសចរណ៍


(ត្បូងឃ្មុំ)៖ ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំ បានដឹកនាំឯកឧត្តម លោកជំទាវ អភិបាលរងខេត្ត ប្រធានមន្ទីរជុំវិញខេត្ត កងកំលាំងប្រដាប់អាវុធ សសយក និងមន្ត្រីពាក់ព័ន្ធ ចុះពិនិត្យរមណីយដ្ឋានទឹកធ្លាក់ហោង ស្ថិតក្នុងឃុំកំពាន់ ស្រុកមេមត់ ខេត្តត្បូងឃ្មុំ ដើម្បីកែលម្អសោភ័ណភាពឲ្យមានភាពស្រស់ស្អាត និងទាក់ទាញ។
ក្រោយពិនិត្យ ឯកឧត្តមបណ្ឌិត ជាម ច័ន្ទសោភ័ណ បានចាត់ឲ្យមន្ទីរជំនាញ សហការជាមួយអាជ្ញាធរដែនដី ធ្វើការសាងសង់ស្ពានឆ្លងអូរ ដាំកូនឈើ និងរៀបចំទីតាំងបរិវេណជុំវិញអោយបានស្អាត ឲ្យក្លាយទៅជារមណីយដ្ឋានគំរូប្រចាំខេត្ត តាមផែនការរបស់រដ្ឋបាលខេត្ត ដើម្បីទាក់ទាញស្រូបយកភ្ញៀវទេសចរណ៍ មកកំសាន្តតំបន់ធម្មជាតិទឹកធ្លាក់ខួបប្រាំងខួបវស្សាននេះ។
ឯកឧត្តមបណ្ឌិត អភិបាលខេត្ត បានអំពាវនាវដល់អ្នកពាក់ព័ន្ធទាំងអស់រួមគ្នារៀបចំតំបន់អភិវឌ្ឍទឹកធ្លាក់ និងល្អាងថ្មហោង ឲ្យមានសម្រស់ធម្មជាតិស្រស់ត្រកាលជាទីកំសាន្តដ៍សែនមនោរម្យបែបធម្មជាតិ សម្រាប់ភ្ញៀវទេសចរណ៍ជិតឆ្ងាយ មកសម្រាកលំហែកាយនៅទីនេះ។
សូមជម្រាបថា៖ រមណីយដ្ឋានទឹកធ្លាក់ហោង ជារមណីយដ្ឋានធម្មជាតិ ក្នុងចំណោមរមណីយដ្ឋានជាច្រើនទៀតក្នុងខេត្តត្បូងឃ្មុំ ស្ថិតក្នុងឃុំកំពាន់ ស្រុកមេមត់ មានចម្ងាយប្រមាណ ៣៨គីឡូម៉ែត្រពីទីរួមខេត្ត។
ទឹកធ្លាក់ហោង គឺជាតំបន់ភ្នំក្រំថ្ម ហើយរូងថ្មរាប់សិបម៉ែត្រការេ ដែលមានល្បាក់ទឹកធ្លាក់ជាច្រើនថ្នាក់ ហើយមានទេសភាពស្រស់បំព្រង និងខ្យល់អាកាសបរិសុទ្ធ។ ភ្ញៀវទេសចរតែងតែនាំគ្នាទៅទស្សនាទេសភាពពិតៗ និងហែលទឹកកម្សាន្តលេងជាមួយល្បឿនទឹកហូរ នាខែវស្សា ក៍ដូចជាំទៅដើម្បីអធិដ្ឋានព្រះពុទ្ធបដិមា និងពរជ័យពីព្រះសង្ឃដែលនៅទីនោះ៕