ប្រសាសន៍កោតសរសើររបស់ ឯកឧត្តម សាយ សំអាល់ ចំពោះអាជ្ញាធរខេត្តដែលតែងតែចូលរួមនៅក្នុងបុព្វហេតុបរិស្ថាន


“ផ្សារភ្ជាប់ទំនាក់ទំនងរវាងមនុស្ស​ និងធម្មជាតិ”​ គឺជាប្រធានបទនៃទិវាបិរស្ថានជាតិ​ និងបរិស្ថានពិភពលោក​ ៥មិថុនា​ ដែលបានប្រារព្ធធ្វើនៅខេត្តកែប​ នាព្រឹកថ្ងៃទី១៧​ ខែឧសភា​ ឆ្នាំ២០១៧​នេះ​ ក្រោមអធិបតីភាពឯកឧត្តម​ សាយ​ សំអាល់​ រដ្ឋមន្ត្រីក្រសួងបរិស្ថាន​ និងមានការចូលរួមពីគណៈអភិបាលខេត្តកែប​ មន្ទីរ​ អង្គភាពជុំវិញខេត្ត​ រួមនឹងមន្ត្រីរាជការ​ សិស្សានុសិស្សប្រមាណជាង​ ៥០០នាក់។
នាឱកាសនោះ​ ឯកឧត្តមរដ្ឋមន្ត្រី​ បានមានប្រសាសន៍កោតសរសើរ​ និងវាយតម្លៃខ្ពស់ចំពោះអាជ្ញាធរខេត្តដែលតែងតែចូលរួមនៅក្នុងបុព្វហេតុបរិស្ថាន​ គ្រាដែលឯកឧត្តម​រដ្ឋមន្ត្រី​ ក៏បានសំណូមពរទៅដល់គ្រឹះស្ថានសិក្សានៅក្នុងខេត្តទាំងអស់​ សូមយកនូវឱកាសនៃការប្រារព្ធទិវានេះ រៀបចំដោយខ្លួនឯងតាមសាលានីមួយៗ ដោយត្រូវលើកយកនូវសារៈសំខាន់នៃធនធានធម្មជាតិនៅក្នុងខេត្តរបស់ខ្លួនមកបង្ហាញដល់សិស្សានុសិស្ស។ ជាមួយគ្នានេះ ឯកឧត្តមរដ្ឋមន្រ្តី បានមានប្រសាសន៍ថា ការចូលរួមរបស់អជ្ញាធរខេត្តនៅក្នុងបុព្វហេតុបរិស្ថាន និងការរៀបចំក្រុងអោយមាននិរន្តរភាពបរិស្ថានទីក្រុង គឺជាការលើកមុខមាត់ក្រុងអោយក្លាយទៅជាទីក្រុងទេសចរណ៍ និងដើម្បីរក្សាបាននូវមុខងារសេដ្ឋកិច្ច បង្កើតបាននូវឱកាសការងារដល់យុវជនកម្ពុជា ដែលនេះគឺជាជញ្ជាំងដ៏រឹងមាំក្នុងការរក្សាបាននូវសុខសន្តិភាពរបស់មាតុភូមិ។
ទន្ទឹមនឹងនោះ​ គណៈអធិបតី​ រួមមហាជនទូទៅ​ ក៏បានអញ្ជើញដាំកូនឈើជាងមួយម៉ឺនដើមនៅក្នុងបរិវេណវិទ្យាល័យ​ ប៊ុន​ រ៉ានី​ ហ៊ុន​ សែន​ ចរិយាវង្ស​ និងប្រគល់ជូនពលរដ្ឋយកទៅដាំតាមលំនៅដ្ឋានផងដែរ៕