(វិមាន៧មករា) នារសៀលថ្ងៃពុធ ០៤រោច ខែមិគសិរ ឆ្នាំឆ្លូវ ត្រីស័ក ព.ស២៥៦៥ ត្រូវនឹងថ្ងៃទី០៨ ខែធ្នូ ឆ្នាំ២០២១នេះ ឯកឧត្តម ឯក សំអុល សមាជិកគណៈអចិន្រ្តៃយ៍ និងជាប្រធានគណៈកម្មាធិការត្រួតពិនិត្យ នៃគណៈកម្មាធិការកណ្ដាល គណបក្សប្រជាជនកម្ពុជា និងឯកឧត្តម វ៉ាង វិនធៀន ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិនប្រចាំនៅកម្ពុជា បានអញ្ជើញចូលរួមជាអធិបតីភាពក្នុងពិធី ផ្សព្វផ្សាយខ្លឹមសារសំខាន់ៗ នៃសម័យប្រជុំពេញអង្គលើកទី៦ របស់គណៈកម្មាធិការមជ្ឈិមបក្សកុម្មុយនិសចិន អាណត្តិទី១៩ និងខ្លឹមសារសង្ខេបសៀវភៅឯកឧត្តម ស៊ី ជីនភីង ស្តីពី “អភិបាលកិច្ចប្រទេសចិនភាគ៣”។
ឯកឧត្តម ឯក សំអុល ថ្លែងថា ចំពោះបទបង្ហាញអំពីខ្លឹមសារសំខាន់ៗ នៃសម័យប្រជុំពេញអង្គលើកទី៦ របស់គណៈកម្មាធិការមជ្ឈិមបក្សកុម្មុយនិស្តចិន អាណត្តិទី១៩ ឯកឧត្តមសូមកោតសរសើរ និងអបអរសាទរចំពោះសមិទ្ធផលសំខាន់ៗ និងបទពិសោធន៍ជាប្រវត្តិសាស្រ្តរបស់គណបក្សកុម្មុយនិសចិនក្នុងរយៈពេលមួយសតវត្សរ៍នេះ។ គណបក្សកុម្មុយនិស្ដចិនបានបង្រួបបង្រួម និងដឹកនាំប្រជាជនចិនក្នុងកិច្ចខិតខំប្រឹងប្រែងដើម្បីអនុវត្តមាគ៌ាបដិវត្តន៍ ការកសាងប្រទេស និងកំណែទម្រង់គ្រប់កាលៈទេសៈនៃប្រវត្តិសាស្រ្តដ៏យូរអង្វែងរបស់ខ្លួន ហើយបានដឹកនាំប្រទេសពីដំណាក់កាលនៃការតស៊ូដើម្បីឯករាជ្យ ការងើបឈរឡើង ធ្វើឱ្យប្រទេសចិនមានការអភិវឌ្ឍ និងមានភាពខ្លាំងក្លា និងបានក្លាយជាមូលដ្ឋានដ៏រឹងមាំសម្រាប់ការអភិវឌ្ឍបន្ត និងសម្រេចបានសមិទ្ធផលធំៗ ជាច្រើនទៀតជូនជាតិ និងប្រជាជន ។
ការសម្រេចជោគជ័យនូវគោលដៅមួយសតវត្សរ៍លើកទី១ នៃការកសាងសង្គមមួយប្រកបដោយវិបុលភាពបង្គួរលើគ្រប់វិស័យ គឺជាមូលដ្ឋានដ៏រឹងមាំសម្រាប់ការចាប់ផ្តើមដំណើរប្រកបដោយការជឿជាក់ដើម្បីសម្រេចបាននូវគោលដៅសតវត្សរ៍លើកទី២ នៃការប្រែក្លាយប្រទេសចិនទៅជាប្រទេសសង្គមនិយមទំនើបដ៏អស្ចារ្យគ្រប់វិស័យ និងបន្តឆ្ពោះទៅរកគោលដៅចុងក្រោយនៃការសម្រេចបានតាមសុបិន្តចិន។
ឆ្លៀតក្នុងឱកាសនោះផងដែរ ឯកឧត្តម ឯក សំអុល ជូនពរឱ្យចំណងមិត្តភាពដែកថែបរវាងកម្ពុជា និងចិន ស្ថិតស្ថេរជាអមតៈ។
ជាទីបញ្ចប់នេះ ឯកឧត្តមជូនពរឯកឧត្តម វ៉ាង វិនធៀន ឯកអគ្គរដ្ឋទូតចិនប្រចាំនៅកម្ពុជា និងសហការី សូមមានសុខភាពល្អបរិបូរណ៍ និងជោគជ័យ ក្នុងការបំពេញបេសកកម្មការទូតនៅកម្ពុជា និងសូមជូនពរឯកឧត្តម លោកជំទាវ លោក លោកស្រី ទាំងអស់ សូមទទួលបាននូវសុខភាពល្អ និងជោគជ័យគ្រប់ភារកិច្ច។
