(ភ្នំពេញ)៖ ឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានលើកឡើងថា កម្ពុជាស្វាគមន៍ចំពោះការចូលរួមពីគ្រប់ភាគី និងគ្រប់ផ្នែកទាំងអស់ ក្នុងការឧបត្ថម្ភគាំទ្រដល់ការងារបោសសម្អាតមីនមនុស្សធម៌នៅកម្ពុជា ឆ្ពោះទៅរកម្ពុជាមួយគ្មានមីនឆ្នាំ២០២៥។
នេះជាការលើកឡើងរបស់ឯកឧតត្តមទេសរដ្ឋមន្រ្តី នៅថ្ងៃទី០៧ ខែមេសា ឆ្នាំ២០២២នេះ ក្នុងឱកាសអញ្ជើញជាអធិបតីក្នុងពិធីចុះអនុស្សរណៈនៃការយោគយល់គ្នារវាងអាជ្ញាធរមីន និងក្រុមហ៊ុន VIRTUS MEDIA PTE LTD លើភាពជាដៃគូ និងកិច្ចសហប្រតិបត្តិការចូលរួមសកម្មភាពមីននៅកម្ពុជា។
ក្នុងនោះក៏មានការចូលរួមផងដែរ ដល់ការលើកកម្ពស់ និងបង្កើនការផ្សព្វផ្សាយអំពីសកម្មភាពមីនមនុស្សធម៌នៅកម្ពុជាទាំងក្នុង និងក្រៅប្រទេស និងការងារបោសសម្អាតមីនមនុស្សធម៌នៅកម្ពុជា ក្រោមការងារសម្របសម្រួលរបស់អាជ្ញាធរមីន។ ពិធីចុះហត្ថលេខានេះ មានការអញ្ចើញចូលរួមពីលោកឧកញ៉ា Tan Khee Meng ប្រធានសភាពាណិជ្ជកម្ម និងធុរកិច្ចម៉ាឡេស៊ីប្រចាំនៅកម្ពុជា (MBCC)។
លោក Mohan Bandam ប្រធានសារព័ត៌មាន Khmer Times និងជាអនុប្រធាន MBCC ដែលជាអ្នកចុះហត្ថលេខានាថ្ងៃនេះ បានគូសបញ្ជាក់ថា «យើងមិនត្រូវគិតថា យើងមកពីណាទេ ប៉ុន្តែអ្វីដែលសំខាន់ យើងត្រូវគិតថា តើយើងអាចធ្វើអ្វីបានខ្លះក្នុងការចូលរួមឲ្យកម្ពុជាសម្រេចបាននូវគោលដៅគ្មានមីនឆ្នាំ២០២៥»។
លោកបន្តទៀតថា លោកបានមករស់នៅប្រទេសកម្ពុជា តាំងពីឆ្នាំ១៩៩៣ និងបានឃើញយ៉ាងច្បាស់អំពីវឌ្ឍនភាព និងកិច្ចខិតខំប្រឹងប្រែងរបស់រាជរដ្ឋាភិបាលដល់ការងារបោសសម្អាតមីននៅកម្ពុជា ព្រមទាំងមានការចូលរួមគាំទ្រយ៉ាងច្រើនពីដៃគូអភិវឌ្ឍន៍ និងម្ចាស់ជំនួយ ជាពិសេសថ្មីៗនេះ មានការចូលរួមពីវិស័យឯកជន និងសប្បុរសជនទៀតផង។
ក្នុងនាមរាជរដ្ឋាភិបាលកម្ពុជា ឯកឧត្តមទេសរដ្ឋមន្រ្តី បានលើកឡើងថា កម្ពុជាសូមស្វាគមន៍ចំពោះការចូលរួមពីគ្រប់ភាគី និងគ្រប់ផ្នែកទាំងអស់ ក្នុងការឧបត្ថម្ភគាំទ្រដល់ការងារបោសសម្អាតមីនមនុស្សធម៌នៅកម្ពុជា ឆ្ពោះទៅរកម្ពុជាមួយគ្មានមីនឆ្នាំ២០២៥ ពីព្រោះការងារបោសសម្អាតមីន គឺជាបេសកកម្មរួមរបស់យើងទាំងអស់គ្នា ហើយនៅពេលបេសកកម្មរបស់យើងបានបញ្ចប់ជាមួយគ្នា ថ្ងៃថ្មីនឹងមកដល់ វានឹងក្លាយជាថ្ងៃមួយផ្តល់សុខសុវត្ថិភាព និងគ្មានគ្រោះថ្នាក់ដោយសារមីន/គ្រាប់ ជាពិសេសការរកស៊ី និងការវិនិយោគនានារបស់វិស័យឯកជននឹងទទួលបានសុវត្ថិភាពខ្ពស់។
ឯកឧត្តមទេសរដ្ឋមន្រ្តី បានថ្លែងអំណរគុណយ៉ាងជ្រាលជ្រៅក្នុងគោលបំណង ទឹកចិត្តសប្បុរស និងការតាំងចិត្ត ចូលរួមជាមួយរាជរដ្ឋាភិបាល តាមរយៈអាជ្ញាធរមីន គាំទ្រដល់ការងារបោសសម្អាតមីនមនុស្សធម៌នៅកម្ពុជា និងបានធ្វើឲ្យកាន់តែមានសុវត្ថិភាពបន្ថែមទៀតដល់ការរស់នៅរបស់ប្រជាពលរដ្ឋ ដែលកំពុងត្រូវបានគំរាមកំហែងដោយគ្រាប់មីន និងសំណល់ជាតិផ្ទុះពីសង្រ្គាម៕
