គម្រោងផ្លូវល្បឿនលឿន ភ្នំពេញ-បាវិត នឹងត្រូវបើកការដ្ឋានសាងសង់ នៅថ្ងៃទី៧ ខែមិថុនា ឆ្នាំ២០២៣ ក្រោមអធិបតីភាព ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ។
នៅក្នុងបទសម្ភាសន៍ ជាមួយអ្នកសារព័ត៌មាន នៅថ្ងៃទី២១ ខែមេសា ឆ្នាំ២០២៣ នេះ ឯកឧត្តម ស៊ុន ចាន់ថុល បានថ្លែងបញ្ជាក់ថា៖ គម្រោងផ្លូវល្បឿន លឿនភ្នំពេញ-បាវិត នឹងត្រូវបើកការដ្ឋានសាងសង់ ក្រោមអធិបតីភាពដ៏ខ្ពង់ខ្ពស់ របស់ សម្តេចតេជោ នាយករដ្ឋមន្ត្រី នៅថ្ងៃទី៧ មិថុនា ២០២៣។
ឯកឧត្តម ស៊ុន ចាន់ថុល បានបញ្ជាក់ទៀតថា៖ នេះគឺជាមោទនភាពជាតិយើង ដែលមានផ្លូវល្បឿនលឿនទី១ ហើយ ឥឡូវ មានផ្លូវល្បឿនលឿនទី២ ហើយ សព្វថ្ងៃ ក៏មានការសិក្សាគម្រោងផ្លូវល្បឿនលឿន ភ្នំពេញ-សៀមរាប នឹងបញ្ចប់ នៅចុងខែឧសភា ឆ្នាំ២០២៣។
ផ្លូវល្បឿនលឿន ភ្នំពេញ-ក្រុងបាវិត គឺជាគម្រោងផ្លូវល្បឿនលឿនទី២ របស់ កម្ពុជា ដែលនឹងសាងសង់ លើផ្លូវថ្មីសុទ្ធ ដែលចំងាយ ១៣៨ គីឡូម៉ែត្រ ពីខាងកើតទន្លេមេគង្គ បូកនឹងស្ពាន ជាងពីរគីឡូ បួនគន្លងទៅ ពីរមកពីរ ហើយមានកំពស់ ៣៧,៥០ ម៉ែត្រ ។ ផ្លូវនេះត្រូវសាងសង់ជា ៤ គន្លង តួផ្លូវមាន ទទឹង ២៥,៥ ម៉ែត្រ ដែលគ្រោងចំណាយថវិកា ប្រមាណ ១.៦៣៨ លានដុល្លារ ដែលរួចរាល់នៅចុងឆ្នាំ២០២៦ ឬដើមឆ្នាំ២០២៧ ។
គួរបញ្ជាក់ថា គម្រោងសាងសង់ផ្លូវល្បឿនលឿន ភ្នំពេញ- ក្រុងបាវិត នឹងបង្កើន កិច្ចសហប្រតិបត្តិការ រវាងប្រទេសទាំងពីរ កម្ពុជា-វៀតណាម ជាពិសេសលើ ការតភ្ជាប់ វិស័យហេដ្ឋារចនាសម្ព័ន្ធដឹកជញ្ជូន សំដៅចូលរួមចំណែកក្នុងការ លើកកម្ពស់វិស័យសេដ្ឋកិច្ច និងទេសចរណ៍ផងដែរ៕
