(ហ្យាកាតា)៖ នៅថ្ងៃទី៥ ខែកញ្ញា ឆ្នាំ២០២៣នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា បានអញ្ជើចូលរួមអាហារពេលព្រឹកការងារត្រីភាគីជាមួយ ឯកឧត្តម ផាម មីញជីញ (Pham Minh Chính) ប្រទេសវៀតណាម និងឯកឧត្តម សនសៃ ស៊ីផាន់ដន (Sonexay Siphandone) នាយករដ្ឋមន្ត្រីប្រទេសឡាវ នៅទីក្រុងហ្សាកាតា ប្រទេសឥណ្ឌូនេស៊ី ទីដែលមេដឹកនាំប្រទេសភូមិផងរបងតែមួយអញ្ជើញចូលរួមកិច្ចប្រជុំកំពូលអាស៊ានលើកទី៤៣ និងកិច្ចប្រជុំកំពូលពាក់ព័ន្ធ។
ក្នុងជំនួបអាហារពេលព្រឹកការងារនេះ ថ្នាក់ដឹកនាំទាំងបីក៏បានជជែកពិភាក្សាគ្នា យ៉ាងយកចិត្តទុកដាក់ពីបញ្ហាក្នុងការពង្រឹងទំនាក់ទំនងកិច្ចសហប្រតិបត្តិការ រវាងប្រទេសទាំងបីឱ្យយកាន់តែមានភាពល្អប្រសើរបន្ថែមទៀត។
សូមបញ្ជាក់ថា ស្ទើរតែក្លាយទៅជាប្រពៃណីទៅហើយសម្រាប់មេដឹកនាំកម្ពុជា វៀតណាម និងឡាវ រាល់ពេលមានកិច្ចប្រជុំកំពូលអាស៊ាន រួមនឹងកិច្ចប្រជុំដទៃទៀត ដែលមេដឹកនាំប្រទេសទាំង៣អញ្ជើញចូលរួមនោះ គឺតែងតែឆ្លៀតជួបគ្នាពិសាអាហារ និងពិភាក្សាការងារ។
ជំនួបពិសាអាហារ និងពិភាក្សាការងារនេះ ធ្វើឡើងដើម្បីពង្រឹងចំណងមិត្តភាព និងកិច្ចសហប្រតិបត្តិការទាំងឡាយរវាងប្រទេសទាំង៣ ដែលមានព្រំដែនជាប់គ្នា៕
