ឯកឧត្តម កៅ គឹមហួន ផ្ដល់បទសម្ភាសជាមួយទីភ្នាក់ងារសារព័ត៌មានស៊ិនហួររបស់ចិនថា ភាពជាដៃគូយុទ្ធសាស្ត្រគ្រប់ជ្រុងជ្រោយអាស៊ាន-ចិន កើតចេញពីកិច្ចសហប្រតិបត្តិការជាច្រើនឆ្នាំ

(ប៉េកាំង)៖ ឯកឧត្តមបណ្ឌិត កៅ គឹមហួន អគ្គលេខាធិការអាស៊ាន បានផ្តល់កិច្ចសម្ភាសន៍ជាមួយទីភ្នាក់ងារសារព័ត៌មានស៊ិនហួររបស់ចិន នៅថ្ងៃបញ្ចប់វេទិកា Beijing Xiangshan លើកទី១០ នៅព្រឹកថ្ងៃទី ៣១ ខែតុលា ឆ្នាំ២០២៣ ​នៅទីក្រុងប៉េកាំង សាធារណរដ្ឋប្រជាមានិតចិន។

ក្នុងឱកាសនោះ ឯកឧត្តមអគ្គលេខាធិការអាស៊ានបានគូសបញ្ជាក់ពីសារៈសំខាន់នៃភាពជាដៃគូយុទ្ធសាស្ត្រគ្រប់ជ្រុងជ្រោយអាស៊ាន-ចិន ដោយផ្អែកលើកិច្ចសហប្រតិបត្តិការអស់រយៈពេលជាច្រើនឆ្នាំ។ ឯកឧត្តមមានប្រសាសន៍ថា «ភាពជាដៃគូយុទ្ធសាស្ត្រគ្រប់ជ្រុងជ្រោយអាស៊ាន-ចិន កើតចេញពីកិច្ចសហប្រតិបត្តិការជាច្រើនឆ្នាំ»។

បន្ទាប់ពីទស្សនកិច្ចនៅទីក្រុងប៉េកាំងនេះទៅ ឯកឧត្តមបណ្ឌិត កៅ គឹមហួន នឹងបន្តដឹកនាំគណៈប្រតិភូលេខាធិការដ្ឋានអាស៊ានទៅបំពេញទស្សនកិច្ចការងាររយៈពេល៣ថ្ងៃ នៅចក្រភពអង់គ្លេស តបតាមការអញ្ជើញរបស់ក្រសួងការបរទេសចក្រភពអង់គ្លេស ក្នុងគោលបំណងពង្រីកនិងពង្រឹងកិច្ចសហប្រតិបត្តិការរវាងអាស៊ាន និងចក្រភពអង់គ្លេស៕