នៅថ្ងៃទី២៩ ខែកុម្ភៈ ឆ្នាំ២០២៤នេះ ឯកឧត្តម ប្រាក់ សុខុន សមាជិកគណៈអចិន្ត្រៃយ៍ និងជាប្រធានគណៈទាក់ទងបរទេសនៃ គណៈកម្មាធិការកណ្តាល គណបក្សប្រជាជនកម្ពុជា បានជួបពិភាក្សាការងារជាមួយ លោក Felix Piedade ប្រធានការិយាល័យប្រតិបត្តិការនៃ Group of Seven Plus (g7+)។
Group of Seven Plus (g7+) គឺជាអង្គការអន្តររដ្ឋាភិបាលនៃរដ្ឋជាសមាជិកចំនួន២០ ដែលកំពុងរងការប៉ះពាល់ដោយជម្លោះ និងក្រោយរួចផុតពីជម្លោះ ត្រូវបានបង្កើតឡើងតាមចក្ខុវិស័យនាយករដ្ឋមន្រ្តីបច្ចុប្បន្នរបស់ប្រទេសទីម័រខាងកើតគឺ ឯកឧត្តម Kay Xanana Gusmáo កាលពីឆ្នាំ ២០១០ ដើម្បីដោះស្រាយចំពោះការកសាងសន្តិភាព ស្ថិរភាព និងការកសាងជាតិ តាមរយៈកិច្ចសហប្រតិបត្តិការត្បូង-ត្បូង។ គោលបំណងរបស់គណប្រតិភូ គឺដើម្បីស្វែងយល់ អំពីនយោបាយឈ្នះ-ឈ្នះ ដំណើរការស្វែងរកសន្តិភាព ជោគជ័យនៃការអភិវឌ្ឍន៍សេដ្ឋកិច្ច សង្គម និងចក្ខុវិស័យរបស់កម្ពុជា ជាង២ទស្សវត្សរ៍កន្លងមកនេះ។
ឯកឧត្តម ប្រាក់ សុខុន បានជម្រាបជូនដោយសង្ខេបអំពីដំណើរការស្វែងរកសន្តិភាព និងសមិទ្ធផលសំខាន់ៗដែលកម្ពុជាសម្រេចបានក្នុងរយៈពេលជាង២ទស្សវត្សរ៍កន្លងមកនេះ ដោយបានគូសបញ្ជាក់ថា ៖តាមរយៈ នយោបាយឈ្នះ-ឈ្នះ របស់សម្តេចតេជោ ហ៊ុនសែន ប្រធានគណបក្សប្រជាជនកម្ពុជា កម្ពុជាទទួលបាន នូវសុខសន្តិភាពពេញលេញ ចាប់តាំងពីចុងឆ្នាំ ១៩៩៨។ កម្ពុជាសម្រេចបានសមិទ្ធផលសំខាន់ៗ ជាច្រើន លើគ្រប់វិស័យ, ទាំងខាងនយោបាយ, សន្តិសុខ, សណ្តាប់ធ្នាប់សង្គម និងទាំងខាងការអភិវឌ្ឍសង្គម-សេដ្ឋកិច្ច ក៏ដូចជោគជ័យក្នុងវិស័យការបរទេសនិងកាទូត ដោយកម្ពុជាបានកសាងទំនាក់ទំនងយ៉ាងជិតស្និទ្ធ និងកិច្ចសហប្រតិបត្តិការដ៏ល្អជាមួយបណ្តាប្រទេសជាច្រើនលើសកលលោក និងបានដើរតួនាទីកាន់តែសកម្ម និង សំខាន់ក្នុងកិច្ចការតំបន់ និង ពិភពលោក៕
