រាជធានីភ្នំពេញ៖ នាព្រឹកថ្ងៃទី២៧ ខែកញ្ញា ឆ្នាំ២០១៧ នៅអគាររដ្ឋបាលនៃក្រសួងអប់រំ យុវជន និងកីឡា បានប្រារព្ធកម្មវិធីអប់រំផ្សព្វផ្សាយ និងផ្ដល់អំណោយឈាមដោយស្ម័គ្រចិត្ត ក្រោមអធិបតីភាព ឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា រួមជាមួយឯកឧត្ដម លោកជំទាវ រដ្ឋលេខាធិការ អនុរដ្ឋលេខាធិការ ប្រធាន អនុប្រធាននាយដ្ឋាន និងបុគ្គលិកអប់រំ ប្រមាណ១៥០នាក់។
ក្នុងឱកាសនោះ ឯកឧត្ដមរដ្ឋមន្ត្រីបានមានប្រសាសន៍ថា ការផ្ដល់ឈាមមិនត្រឹមតែជាកាយវិការប្រកបដោយមនុស្សធម៌ ដើម្បីជួយសង្គ្រោះជីវិតមនុស្សប៉ុណ្ណោះទេ ក៏ប៉ុន្តែវាក៏មានគុណប្រយោជន៍សម្រាប់អ្នកផ្ដល់ឈាមផងដែរ។ ឯកឧត្ដមបណ្ឌិត បានបញ្ជាក់ថា ប្រសិនបើគ្មានឈាមទាន់ពេលវេលាទេ ជំងឺមួយចំនួន មិនអាចស្រោចស្រង់បានឡើយ ហើយអាចធ្វើឱ្យអ្នកជំងឺមានគ្រោះថ្នាក់ដល់អាយុជីវិតផងដែរ ការផ្ដល់ឈាមជាការជួយសង្គ្រោះជីវិតមនុស្ស។ ឯកឧត្ដមបានអំពាវនាវ ដល់សិស្សនិស្សិត យុវជន ដើម្បីចូលរួមចំណែកបរិច្ចាគឈាមឱ្យបានកុះករ។ ក្នុងកម្មវិធីនេះក៏មានការចូលរួមចំណែកក្នុងការបរិច្ចាគឈាមដោយស្ម័គ្រចិត្ត ពីសំណាក់មន្ត្រីបុគ្គលិកអប់រំ សម្រាប់អ្នកជំងឺដែលត្រូវការឈាមជាចាំបាច់ដើម្បីសង្គ្រោះជីវិត។
ដោយឡែក វេជ្ជបណ្ឌិត ហុក គឹមចេង ប្រធានមជ្ឈមណ្ឌលជាតិផ្ដល់ឈាមនៃក្រសួងសុខាភិបាលបានឱ្យដឹងថា ការបរិច្ចាគឈាម គ្មានផលប៉ះពាល់ដល់សុខភាពឡើយ។ មនុស្សពេញវ័យអាចបរិច្ចាគឈាមបានប្រមាណ៣ដង(សម្រាប់ស្ត្រី) និង៤ដង(សម្រាប់បុរស)ក្នុង១ឆ្នាំ ដោយសារឈាមនឹងត្រូវបានផលិតឡើងវិញនៅក្នុងខួរឆ្អឹងរបស់មនុស្ស៕
