(ភ្នំពេញ)៖ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន វិស័យដឹកជញ្ជូនតាមផ្លូវទឹក ដើរតួនាទីយ៉ាងសំខាន់ ក្នុងការចូលរួមចំណែកលើកស្ទួយការអភិវឌ្ឍសង្គម-សេដ្ឋកិច្ច និងបង្កើតឱកាសដល់វិនិយោគិនជាតិ និងអន្តរជាតិ បង្កើនការងារជូនដល់ប្រជាពលរដ្ឋ និងលើកកម្ពស់ជីវភាពរស់នៅរបស់ប្រជាជន ជាពិសេសប្រជាជន ដែលរស់នៅតាមតំបន់ឆ្នេរសមុទ្រ និងតំបន់ទន្លេ បឹង ស្ទឹង ព្រែក របស់កម្ពុជា។
ឯកឧត្តម ប៉េង ពោធិ៍នា បានថ្លែងដូចនេះនាថ្ងៃទី២៩ ខែឧសភា ឆ្នាំ២០២៥នេះ នាឱកាសដែលលោក និងលោក ណាហ្គាសេ កេនសឹកេ ភារធារីនៃស្ថានទូតជប៉ុនប្រចាំកម្ពុជា អញ្ជើញជាអធិបតីបើកសិក្ខាសាលាពិគ្រោះយោបល់ លើការកំណត់តំបន់កំពង់ផែនៅកម្ពុជា ក្រោមគម្រោងពង្រឹងសមត្ថភាពសម្រាប់ការគ្រប់គ្រងរដ្ឋបាលកំពង់ផែ ដោយមានការចូលរួមពីលោក សាណីយ កាហ្សីម៉ាសា (SANUI Kazumasa), ប្រធានទីភ្នាក់ងារសហ-ប្រតិបត្តិការអន្តរជាតិជប៉ុន (JICA) ប្រចាំកម្ពុជា រួមទាំងអ្នកពាក់ព័ន្ធជាច្រើនរូបទៀត នៅសណ្ឋាគារ Sun & Moon Riverside។
ឯកឧត្តម ប៉េង ពោធិ៍នា បានបន្ថែមថា វិស័យដឹកជញ្ជូនតាមផ្លូវទឹក និងកំពង់ផែនៅកម្ពុជា មានការរីកចម្រើនយ៉ាង ឆាប់រហ័សគួរឱ្យកត់សម្គាល់, ជាក់ស្តែងគិតរហូតមកដល់ពេលនេះ មានកំពង់ផែរហូតដល់ ១១៩ ក្នុងនោះនៅទំបន់ទន្លេមាន ៨៨កំពង់ផែ និងនៅតំបន់សមុទ្រ មាន៣១កំពង់ផែ។ ក្នុងចំណោមកំពង់ផែទាំងនោះ កំពង់ផែស្វយ័តក្រុងព្រះសីហនុ និងកំពង់ផែស្វយ័តភ្នំពេញ បានកំពុងនិងបំពេញតួនាទីយ៉ាងសំខាន់ និងមិនអាចខ្វះបាន នៅក្នុងការរួមចំណែកទ្រទ្រង់ដល់សេដ្ឋកិច្ចជាតិរបស់កម្ពុជា។
បច្ចុប្បន្ន កំពង់ផែស្វយ័ត ក្រុងព្រះសីហនុ អាចទទួលបានទំនិញឆ្លងកាត់រហូតដល់ ១លានTEUs និងកំពង់ផែស្វយ័តភ្នំពេញ អាចទទួលបានទំនិញឆ្លងកាត់រហូតដល់ ៤៨ម៉ឺនTEUs។ នៅតាមតំបន់សមុទ្រក៏មានកំពង់ផែផ្សេងទៀត ដែលមានសមត្ថភាពបម្រើសេវាឱ្យនាវាដែលធ្វើ នាវាចរណ៍ជាលក្ខណៈអន្តរជាតិ ដូចជា កំពង់ផែពហុបំណងកំពត និងកំពង់ផែទេសចរណ៍ អន្តរជាតិកំពតជាដើម ហើយក៏មានកំពង់ផែដែលស្ថិតនៅតាមដងទន្លេក្នុងប្រទេសអាចធ្វើ ការតភ្ជាប់ការធ្វើនាវាចរណ៍ជាមួយប្រទេសជិតខាង ដើម្បីតភ្ជាប់ការដឹកជញ្ជូនទំនិញដូចជា ជី ចំណីសត្វ ឬគ្រឿងសម្ភារសំណង់មកពីប្រទេសវៀតណាម និងទំនិញជាប្រភេទកសិផល ទៅកាន់ប្រទេសវៀតណាមវិញ ដើម្បីដឹកជញ្ជូនបន្តទៅកាន់បណ្តាប្រទេសផ្សេងទៀតនៅ លើសកលលោក។
ឯកឧត្តម ប៉េង ពោធិ៍នា បានបញ្ជាក់ដែរថា ការកើនឡើងនៃកំពង់ផែទាំងអស់នេះ មិនមែនជារឿងចៃដន្យនោះទេ តែជាគំនិតផ្តួចផ្តើម និងជាកិច្ចខិតខំប្រឹង ប្រែងប្រកបដោយគតិបណ្ឌិតរបស់ សម្តេចតេជោ ហ៊ុន សែន ដែលបច្ចុប្បន្នជាប្រធានព្រឹទ្ធសភានៃកម្ពុជា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ។ ជាក់ស្តែងនៅក្នុងអាណត្តិ ដែលសម្តេចតេជោ បានបំពេញតួនាទី ជានាយករដ្ឋមន្ត្រី ក៏មានការដាក់ចេញនូវគោលនយោបាយជាតិស្តីពីកំពង់ផែ និងប្រព័ន្ធ គ្រប់គ្រងកំពង់ផែផងដែរ។
រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានដាក់ចេញនូវផែនការអាទិភាពក្នុងការពង្រឹង និងលើកកម្ពស់ ការអភិវឌ្ឍវិស័យហេដ្ឋារចនាសម្ព័ន្ធសំខាន់ៗនៅទូទាំងប្រទេស រួមជាមួយនឹងការអភិវឌ្ឍ វិស័យដឹកជញ្ជូនតាមផ្លូវទឹក និងកំពង់ផែផងដែរ តាមរយៈគម្រោងអភិវឌ្ឍន៍សាងសង់ពង្រីក សមត្ថភាពកំពង់ផែ និងការកែទម្រង់ ដើម្បីកាត់បន្ថយតម្លៃឡូជីស្លឹក បង្កើនភាពប្រកួតប្រជែង និងការផ្តល់សេវាប្រកបដោយភាពឆាប់រហ័ស តម្លាភាព និងប្រសិទ្ធភាព។ រាជរដ្ឋាភិបាលអាណត្តិទី៧ ក៏បានបន្តតម្រង់ទិស និងពន្លឿនការរៀបចំនូវច្បាប់ស្តីពីការដឹកជញ្ជូនតាមផ្លូវទឹក រហូតទទួលបានការអនុម័ត និងប្រកាសឱ្យប្រើកាលពីថ្ងៃទី២៣ ខែមីនា ឆ្នាំ២០២៤ កន្លងទៅ ផងដែរ។
ឯកឧត្តមរដ្ឋមន្ត្រី ប៉េង ពោធិ៍នា ក៏បានបញ្ជាក់ដែរថា ក្រសួងសាធារណការ ក៏បាននិងកំពុងរៀបចំសេចក្តីព្រាងផែនការយុទ្ធសាស្ត្រ ស្តីពីការអភិវឌ្ឍវិស័យដឹកជញ្ជូនផ្លូវទឹក និងកំពង់ផែសម្រាប់ឆ្នាំ២០២៦-២០៣៦ ដែលឯកសារនេះនឹងក្លាយជាត្រីវិស័យសម្រាប់ជំរុញការអភិវឌ្ឍ និងគ្រប់គ្រងវិស័យដឹកជញ្ជូនផ្លូវទឹក និងកំពង់ផែរបស់កម្ពុជាឱ្យកាន់តែមានសន្ទុះកើនឡើងបន្ថែមទៀត ក៏ដូចជាជួយពង្រឹង និងពង្រីកតួនាទី និងសមត្ថភាព កម្ពុជាក្នុងការតភ្ជាប់ការដឹកជញ្ជូន ភស្តុភារកម្ម និងការធ្វើពាណិជ្ជកម្មជាមួយតំបន់ និងអន្តរជាតិប្រកបដោយភាពប្រកួតប្រជែង ប្រសិទ្ធភាព និងនិរន្តរភាពផងដែរ៕
