(មណ្ឌលគិរី) ៖ ដើម្បីពង្រឹងការដាំដុះស្រូវឲ្យមានប្រសិទ្ឋភាព និងទទួលបានតម្លៃថ្លៃលើទីផ្សារ អាជ្ញាធរខេត្តមណ្ឌលលគិរី បានផ្តល់ពូជស្រូវ ពីរប្រភេទដល់បងប្អូនប្រជាកសិករ រស់នៅស្រុកកោះញែក ដែលជាជង្រុកស្រូវដ៏ធំប្រចាំខេត្ត ពិធីនេះបានធ្វើឡើង នារសៀលថ្ងៃទី២៥ ខែមិថុនា ឆ្នាំ២០២៥ នៅសាលាឃុំអបួនលើ ស្រុកកោះញែក
ឯកឧត្តម ថង សាវុន អភិបាលខេត្តមណ្ឌលគិរី បានជំរុញឲ្យប្រជាកសិករទាំងអស់ ជាពិសេសប្រជាពលរដ្ឋដែលរស់នៅក្នុងស្រុកកោះញែក យកចិត្តទុកដាក់ក្នុងការបង្កបង្កើនផលដំណាំស្រូវ ដោយប្រើប្រាស់ជីធម្មជាតិ ឬរៀនផលិតជីកំប៉ុសខ្លួនឯងសម្រាប់ប្រើប្រាស់ កាត់បន្ថយប្រើជីគីមី ដែលធ្វើឲ្យប៉ះពាល់ដល់សុខភាព មិនត្រឹមប៉ុណ្ណោះក៏បានជួយសន្សំសំចៃលើការចំណាយ។ ក្រៅពីដំណាំស្រូវ ឯកឧត្តម អភិបាលខេត្ត បានលើកទឹកចិត្តដល់បងប្អូនប្រជាពលរដ្ឋ បង្កើនផ្ទៃដីដាំដុះ ចៀសវាងទុកដីទំនេរចោល ដាំដំណាំឈើហូបផ្លែ បន្លែ ចិញ្ចឹមសត្វ សម្រាប់បំពេញតម្រូវការប្រចាំថ្ងៃក្នុងគ្រួសារ ដោយអាចទទួលបានចំណីអាហារសុវត្ថិភាព ហើយក៏អាចជួយឲ្យបងប្អូនប្រជាកសិករ យកផលដំណាំដែលដាំដុះ ហូបមិនអស់លក់បានកម្រៃបន្ថែមសម្រាប់ផ្គត់ផ្គង់ជីវភាព។
លោក សី ទូច អភិបាលស្រុកកោះញែក បានថ្លែងអំណរគុណដល់ឯកឧត្តម អភិបាលខេត្ត ដែលបានគិតគួរពីសុខទុក្ខប្រជាពលរដ្ឋ គ្រប់ច្រកល្ហក ឆ្លៀតពេលដ៏មានតម្លៃ អញ្ជើញចែកពូជស្រូវជូនដល់ប្រជាកសិករនៅ ឃុំអបួនលើនេះ។ លោក បញ្ជាក់ថា ស្រុកកោះញែក បច្ចុប្បន្នមានផ្ទៃដី ដាំដុះស្រូវចំនួន ២៦.៥០៩ហិកតា ក្នុងនោះស្រូវស្រាល មានចំនួន ជាង១ម៉ឺន ៣ពាន់ហិកតា ស្រូវកណ្ដាលជាង ៧ពាន់ហិកតា និងស្រូវធ្ងន់ ជាង ៥ពាន់ហិកតា។
តាមរបាយការណ៍របស់លោក សុង ឃាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី បានឲ្យដឹងថា មន្ទីរកសិកម្មបានសហការជាមួយរដ្ឋបាលខេត្ត រៀបចំចែកពូជស្រូវផ្ការំដួល និងសែនក្រអូប០១ សរុបចំនួន ២៤០០គីឡូក្រាម ដើម្បីចែកជូនដល់ កសិករ ចំនួន ១២០ គ្រួសារ នៅក្នុងឃុំអបួរលើ ស្រុកកោះញែក ដែលក្នុងមួយគ្រួសារ ទទួលបានចំនួន ២០គីឡូក្រាម ចំណែកការងារដាំដុះស្រូវវស្សា អនុវត្តបានសរុបជាង ១ម៉ឺន ៦ពាន់ហិកតា កើនលើសឆ្នាំមុនជាង ៣ពាន់ហិកតា៕
