នៅថ្ងៃពុធ ៤កើត ខែភទ្របទ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៧ ខែសីហា ឆ្នាំ២០២៥នេះ ឯកឧត្តម ចាន់ ស៊ីណាត រដ្ឋលេខាធិការ និងជានាយកគម្រោង ក្នុងនាមតំណាងដ៏ខ្ពង់ខ្ពស់របស់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានដឹកនាំមន្ត្រីអង្គភាពគ្រប់គ្រងនិងអនុវត្តន៍គម្រោង ទីប្រឹក្សាជាតិនិងអន្តរជាតិ និងគណៈប្រតិភូក្រុមបេសកកម្មធនាគារវិនិយោគហេដ្ឋរចនាសម្ព័ន្ធអាស៊ី(AIIB) ដឹកនាំដោយលោក David Ginting ប្រធានក្រុមបេសកកម្ម ចុះត្រួតពិនិត្យស្វែងយល់ការគ្រប់គ្រងវិស័យធនធានទឹកអាងត្រពាំងថ្ម ស្ថិតក្នុងស្រុកភ្នំស្រុក ខេត្តបន្ទាយមានជ័យ និងសំណង់ក្បាលហុង និងសំណង់ចារឹកត្រង់ ស្ថិតក្នុងភូមិសាស្ត្រខេត្តពោធិ៍សាត់ ដើម្បីរៀបចំគម្រោងស្តារឡើងវិញ និងធ្វើទំនើបកម្មនៃប្រព័ន្ធធារាសាស្ត្រគ្រប់ជ្រុងជ្រោយ។
ឯកឧត្តមរដ្ឋលេខាធិកាបានបញ្ជាក់ថា ធនាគារវិនិយោគហេដ្ឋរចនាសម្ព័ន្ធអាស៊ី(AIIB) ពិតជាដៃគូអភិវឌ្ឍន៍ដ៏សំខាន់របស់កម្ពុជា ក្នុងការជួយគិតគូរគ្រប់ជ្រុងជ្រោយដល់ការធ្វើទំនើមកម្មវិស័យធនធានទឹក ព្រមទាំងយ៉ាងធ្វើណាបង្កើនលទ្ធភាព និងសមត្ថភាពស្តុកទឹក ដើម្បីបញ្ចៀសទឹកជំនន់ និងធ្វើឱ្យមានទឹកគ្រប់គ្រាន់សម្រាប់ស្រោចស្រពដំណាំកសិកម្មរបស់បងប្អូនប្រជាពលរដ្ឋប្រើប្រាស់ខួបប្រាំង និងខួបវស្សា៕
