ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្ដី រដ្ឋមន្រ្តីក្រសួងអប់រំ យុវជន និងកីឡា នៅថ្ងៃទី២៨ ខែសីហា ឆ្នាំ២០២៥នេះ បានបញ្ជាក់ឲ្យដឹងថា ក្នុងរយៈពេល១២ឆ្នាំកន្លងមកនេះ ប្រាក់បៀវត្សគ្រូបង្រៀន កើនជាមធ្យមជិត៣ដង ខណៈសិស្សនិទ្ទេស A B C ប្រមាណ៧៥% បានក្លាយជាគ្រូបង្រៀន។
ការបញ្ជាក់ឲ្យដឹងបែបនេះ ធ្វើឡើងក្នុងឱកាសដែល ឯកឧត្តមឧបនាយករដ្ឋមន្ដ្រី ហង់ជួន ណារ៉ុង អញ្ជើញកាត់វិញ្ញាសារ ដំណើរការប្រឡងបាក់ឌុប នៅវិទ្យាល័យព្រះស៉ីសុវត្ថិ រាជធានីភ្នំពេញ នាព្រឹកថ្ងៃទី២៨ ខែសីហា ឆ្នាំ២០២៥។
ឯកឧត្តមឧបនាយករដ្ឋមន្រ្ដី ហង់ជួន ណារ៉ុន បានបញ្ជាក់យ៉ាងដូច្នេះថា «សម្ដេចតេជោ ហ៊ុន សែន និងសម្ដេចបវរធិបតី ហ៊ុន ម៉ាណែត លោកបានគាំទ្រចំពោះការដំឡើង ប្រាក់បៀវត្សដល់គ្រូបង្រៀន ចឹងក្នុងរយៈពេល១២ឆ្នាំកន្លងទៅនេះ ប្រាក់បៀវត្សគ្រូ គឺកើនឡើងជាមធ្យមប្រមាណជិត៣ដង»។
ទន្ទឹមគ្នានេះ ឯកឧត្តមឧបនាយករដ្ឋមន្រ្ដី ហង់ជួន ណារ៉ុន បានឲ្យដឹងថា សិស្សដែលមាននិទ្ទេស A B C ប្រមាណ៧៥ភាគរយ នាពេលបច្ចុប្បន្ន បានចូលធ្វើជាគ្រូបង្រៀន ដែលបង្ហាញថា ក្រសួងបានទាក់ទាញ អ្នកដែលមានសមត្ថភាព ចូលមកធ្វើជាគ្រូបង្រៀន។
ឯកឧត្តមឧបនាយករដ្ឋមន្រ្ដី ហង់ជួន ណារ៉ុន បានឲ្យដឹងទៀតថា ក្រសួងអប់រំ ក៏បានអនុវត្ដនូវកំណែទម្រង់គ្រឹះស្ថានបណ្ដុះបណ្ដាលគ្រូបង្រៀន ដើម្បីអាចឲ្យបណ្ដុះគ្រូ ឲ្យមានសមត្ថភាពសតវត្សទី២១ ហើយក៏ដូចជាការធ្វើកំណែទម្រង់សាលារៀនផងដែរ។
បើតាមឯកឧត្តមឧបនាយករដ្ឋមន្រ្ដី ហង់ជួន ណារ៉ុន, មកទល់ពេលនេះ អាគារថ្មីៗ ដែលសាងសង់ដោយសម្ដេចតេជោ ហ៊ុន សែន និងសម្ដេចបវរធិបតី ហ៊ុន ម៉ាណែត មានចំនួន៤,៥០០អាគារ រួមទាំងអាគារក្រសួង ក៏ដូចជាដៃគូសាងសង មានជាង១ពាន់អាគារទៀត ក្នុងរយៈពេល១០ឆ្នាំមកនេះ។
ឯកឧត្តមឧបនាយករដ្ឋមន្រ្ដី ហង់ជួន ណារ៉ុន បានលើកឡើងថា ការធ្វើកំណែទម្រង់ ការប្រឡងសញ្ញាបត្រមធ្យមសិក្សាទុតិយភូមិ ផ្ដល់ជាគន្លឹះដើម្បីយកព័ត៌មាននេះ ពង្រឹងវិស័យអប់រំ ហើយដើម្បីធ្វើកំណែទម្រង់វិស័យអប់រំ។
ឯកឧត្តមឧបនាយករដ្ឋមន្រ្ដី ហង់ជួន ណារ៉ុន បានគូសបញ្ជាក់ថា ក្រសួងអប់រំ បានដាក់ចេញកំណែទម្រង់វិស័យអប់រំ ទាំងនៅថ្នាក់កណ្ដាល ការពង្រឹង ការធ្វើអធិការកិច្ច ការរៀបចំឡើងវិញកម្មវិធីសិក្សា សៀវភៅសិក្សាគោលពិនិត្យឡើងវិញ ក៏ដូចជាការអនុវត្ដនូវគោលនយោបាយ គ្រូបង្រៀនផងដែរ។
ជាមួយគ្នានេះ ឯកឧត្តមឧបនាយករដ្ឋមន្រ្ដី ហង់ជួន ណារ៉ុន បានបង្ហាញនូវភាពជឿជាក់ថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ២៨ សីហា ២០២៥ ចំនួនសិស្សនិទ្ទេស A អាចនឹងមានចំនួន ប្រហាក់ប្រហែលឆ្នាំ២០២៤ ឬអាចលើសផងដែរ៕
