សម្តេចតេជោ ហ៊ុន សែន ប្រមុខរដ្ឋស្តីទីនៃកម្ពុជា បានផ្ញើសារលិខិតរំលែកទុក្ខជូនឯកឧត្តម ឡាយ សំកុល អគ្គលេខាធិការនៃអគ្គលេខាធិការដ្ឋានព្រឹទ្ធសភា និងលោកជំទាវ ព្រមទាំងក្រុមគ្រួសារ ចំពោះមរណភាពឧបាសិកាពុទ្ធសាសនូបត្ថម្ភក៍ មាឃ ផល ដែលត្រូវជាម្តាយក្មេករបស់ឯកឧត្តម ដែលបានទទួលមរណភាព វេលាម៉ោង១២:០៩នាទី ថ្ងៃទី២៨ ឆ្លងចូលថ្ងៃទី២៩ ខែកញ្ញា ឆ្នាំ២០២៥ ក្នុងជន្មាយុ៧៩ឆ្នាំ ដោយជរាពាធ។
សារលិខិតរបស់សម្តេចតេជោ ហ៊ុន សែន មានខ្លឹមសារដូច្នេះថា៖ «ខ្ញុំមានសេចក្តីសោកស្តាយ និងស្រណោះជាពន់ពេក ក្រោយពីបានទទួលដំណឹងថា ឧបាសិកាពុទ្ធសាសនូបត្ថម្ភក៏ មាឃ ផល ដែលត្រូវជាម្តាយក្មេក និងម្តាយបង្កើតរបស់ឯកឧត្តម និងលោកជំទាវ បានទទួលអនិច្ចកម្ម នៅថ្ងៃចន្ទ ៧កើត ខែអស្សុជ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៨ ឆ្លងចូល ថ្ងៃទី២៩ ខែកញ្ញា ឆ្នាំ២០២៥ វេលាម៉ោង១២:០៩នាទី ក្នុងជន្មាយុ៧៩ឆ្នាំ ដោយជរាពាធ។
ក្នុងវេលាពោរពេញដោយសមានទុក្ខដ៏ក្រៀមក្រំអាឡោះអាល័យនេះ ក្នុងនាមស្ថាប័ននីតិប្បញ្ញត្តិ នីតិប្រតិបត្តិ ជនរួមជាតិ និងខ្លួនខ្ញុំផ្ទាល់ ខ្ញុំសូមចូលរួមរំលែកទុក្ខជាមួយ ឯកឧត្តម និងលោកជំទាវ ព្រមទាំង ក្រុមគ្រួសារ ចំពោះការបាត់បង់ម្តាយក្មេក ម្តាយបង្កើត ជីដូន និងសមាជិកគ្រួសារ ជាទីគោរពស្រលាញ់ និងមានគុណតម្លៃបំផុត ដែលជានិច្ចកាលខិតខំចិញ្ចឹមបីបាច់ថែរក្សា ផ្តល់ការសិក្សា អប់រំ ទូន្មានបុត្រាបុត្រី និង ចៅៗ ប្រកបដោយសេចក្តីស្រឡាញ់ និងព្រហ្មវិហារធម៌ រហូតក្លាយជាកុលបុត្រ កុលធីតាដ៏ឆ្នើមរបស់សង្គម ជាតិ និងបានបម្រើឧត្តមប្រយោជន៍ជាតិដ៏ធំធេង។
ពេញមួយជីវិត ឧបាសិកាពុទ្ធសាសនូបត្ថម្ភក៏ មាឃ ផល តែងតែគោរពប្រតិបត្តិ ទ្រទ្រង់ និងផ្សព្វផ្សាយព្រះពុទ្ធសាសនា ដែលជាសាសនារបស់រដ្ឋដែលបានលើកស្ទួយ ភាពថ្លៃថ្នូរ និងអប់រំមនុស្សជាតិឱ្យប្រកាន់យកសន្តិភាព និងធ្វើអំពើល្អដែលជាកុសលដ៏ថ្លៃថ្លា។
ខ្ញុំ សូមឧទ្ទិសកុសលបួងសួងដល់ដួងវិញ្ញាណក្ខន្ធ ឧបាសិកាពុទ្ធសាសនូបត្ថម្ភក៏ មាឃ ផល ទទួលបានភាពត្រជាក់ត្រជំនៃតេជះបារមី ព្រះពុទ្ធ ព្រះធម៌ និងព្រះសង្ឃ និងឆាប់បានចាប់បដិសន្ធិក្នុងសុគតិភព កុំបីឃ្លៀងឃ្លាតឡើយ»៕
