(ភ្នំពេញ)៖ ឯកឧត្តម បណ្ឌិត គុណ ញឹម រដ្ឋមន្ត្រីប្រិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា នៅព្រឹកថ្ងៃទី១៩ ខែវិច្ឆិកា ឆ្នាំ២០២៥នេះ បានដឹកនាំគណៈប្រតិភូជាន់ខ្ពស់ អញ្ជើញមកបំពេញទស្សនកិច្ច ទីស្នាក់ការកណ្តាលរបស់ធនាគារវីង ដើម្បីសិក្សាស្វែងយល់អំពីការប្រើប្រាស់បច្ចេកវិទ្យាហិរញ្ញវត្ថុឌីជីថល និងប្រព័ន្ធគ្រប់គ្រងហិរញ្ញវត្ថុរបស់ធនាគារវីង។
វត្តមានរបស់ឯកឧត្តមបណ្ឌិត គុណ ញឹម និងគណៈប្រតិភូ ត្រូវបានទទួលស្វាគមន៍យ៉ាងកក់ក្តៅបំផុតពីអ្នកឧកញ៉ា គិត ម៉េង ប្រធានក្រុមប្រឹក្សាភិបាល ធនាគារ វីង និងជាអគ្គនាយកប្រតិបត្តិក្រុមហ៊ុន រ៉ូយ៉ាល់ គ្រុប រួមជាមួយថ្នាក់ដឹកនំាជាន់ខ្ពស់របស់ធនាគារវីង។
ក្នុងអំឡុងពេលទស្សនកិច្ចនេះ តំណាងធនាគារវីង បានធ្វើបទបង្ហាញអំពីប្រវត្តិ និងការធ្វើប្រតិបត្តិការធនាគារឌីជីថលរបស់ខ្លួន ដោយបានបង្ហាញពីដំណោះស្រាយហិរញ្ញវត្ថុប្រកបដោយភាពច្នៃប្រឌិត ដែលត្រូវបានរចនាឡើងដើម្បីផ្តល់សេវាកម្មរហ័ស សុវត្ថិភាព និងងាយស្រួលប្រើប្រាស់ដល់អតិថិជនទូទាំងប្រទេសកម្ពុជា។
ទន្ទឹមនឹងនេះដែរ អគ្គនាយកដ្ឋានគយ និងរដ្ឋាករកម្ពុជា និងធនាគារវីង បានប្រកាសថា ភាគីទាំងពីរមានគម្រោងចុះហត្ថលេខាលើអនុស្សរណៈយោគយល់គ្នា នាពេលខាងមុខនេះ ដើម្បីពង្រឹងកិច្ចសហប្រតិបត្តិការ បង្កើនការធ្វើទំនើបកម្មសេវាកម្មហិរញ្ញវត្ថុ និងលើកកម្ពស់ការអភិវឌ្ឍសេដ្ឋកិច្ចរបស់កម្ពុជាបន្ថែមទៀត។
ធនាគារ វីង ដែលរីកចម្រើនជាមួយកម្ពុជាអស់រយៈពេល ១៧ឆ្នាំ បានក្លាយជាស្ថាប័នហិរញ្ញវត្ថុមួយដែលទទួលបានការជឿជាក់ និងច្នៃប្រឌិតបំផុត ដោយបច្ចុប្បន្នកំពុងគ្រប់គ្រងប្រាក់បញ្ញើជិត ៣ពាន់លានដុល្លារអាម៉េរិក។
បើតាមរបាយការណ៍ធនាគារជាតិនៃកម្ពុជា ឆ្នាំ២០២៤ ធនាគារ វីង ជាប់ចំណាត់ថ្នាក់ទី៥ លើទ្រព្យសកម្មសរុប និងទី៦ ផ្នែកប្រាក់បញ្ញើសរុប និងទី១០ លើការផ្តល់កម្ចីសរុប ដែលវឌ្ឍនភាពនេះឆ្លុះបញ្ចាំងពីភាពរឹងមាំផ្នែកហិរញ្ញវត្ថុរបស់ខ្លួននៅក្នុងវិស័យធនាគារនៅក្នុងប្រទេសកម្ពុជា។
សូមបញ្ជាក់ថា បច្ចុប្បន្ន ធនាគារ វីង មានបណ្តាញប្រតិបត្តិការទូលំទូលាយ រួមមានសាខាធនាគារ ២៧ទីតាំង ភ្នាក់ងារជាង ១២,០០០កន្លែង និងភ្នាក់ងារវីង ម៉ាស្ទ័រ ជិត ២០០កន្លែង នៅទូទាំងប្រទេស។
មកទល់ពេលនេះ ធនាគារ វីង បានបម្រើអតិថិជនជាង ៩.៨លានគណនី ដោយផ្តល់ជូននូវដំណោះស្រាយធនាគារប្រកបដោយសុវត្ថិភាពយ៉ាងពេញលេញ រហ័ស និងងាយស្រួលប្រើប្រាស់សម្រាប់ការរស់នៅប្រចាំថ្ងៃ៕
