(រាជធានីភ្នំពេញ) នៅថ្ងៃទី៩ ខែមីនា ឆ្នាំ២០២៦ ឯកឧត្តមបណ្ឌិត ចាយ បូរិន រដ្ឋមន្រ្តីក្រសួងធម្មការនិងសាសនា និងលោកជំទាវ សូ ភត្រ្តា ប្រធានកិត្តិយសសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ក្រសួងធម្មការនិងសាសនា អញ្ជើញជាអធិបតីក្នុងពិធីអបអរសាទរខួបលើកទី១១៥ ទិវាអន្តរជាតិនារី ៨មីនា ឆ្នាំ២០២៦ ក្រោមមូលបទ «សន្តិភាព និងសន្តិសុខសម្រាប់ស្រ្តី និងគ្រួសារ» ក្រសួងធម្មកានិងសាសនា នៅទីស្តីការក្រសួង។ លោកជំទាវ នួន ប៊ុនណា បានឡើងអាននូវព្រះរាជសារ សម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ក្នុងឱកាសអបអរសាទរខួបលើកទី១១៥ ទិវាអន្តរជាតិនារី ៨មីនា ឆ្នាំ២០២៦ និងលោកជំទាវ មិន ចណ្ឌីណែត រដ្ឋលេខាធិការ និងជាប្រធានប្រតិបត្តិសមាគមនារី ក្រសួងធម្មការនិងសាសនា អាននូវរបាយការណ៍ស្វាគមន៍ ឯកឧត្តមបណ្ឌិតរដ្ឋមន្រ្តី។
នៅក្នុងឱកាសនោះ ឯកឧត្តមបណ្ឌិតរដ្ឋមន្រ្តី បានលើកឡើងអំពីប្រសាសន៍ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន ដែលបានថ្លែងកាលពីពេលកន្លងទៅ គឺ “ស្ត្រីគឺជាឆ្អឹងខ្នងនៃសេដ្ឋកិច្ច និងសន្តិភាព” សម្តេចតែងតែការពារតម្លៃស្ត្រីខ្មែរ និងថ្កោលទោសរាល់ការប្រមាថមើលងាយស្ត្រី ជាពិសេសនៅក្នុងបរិបទនៃការការពារសិទ្ធិ និងសេចក្តីថ្លៃថ្នូររបស់ស្រ្តី។ ដោយឡែក សម្តេចមហាបវរធិបតី ហ៊ុន ម៉ាណែត នាយករដ្ឋ មន្ត្រី នៃព្រះរាជាណាចក្រកម្ពុជា ក៏តែងតែលើកកម្ពស់តម្លៃស្ត្រី ដោយ បានអំពាវនាវឱ្យបញ្ឈប់ជាបន្ទាន់នូវទង្វើរើសអើងគ្រប់ទម្រង់ ដែលជះឥទ្ធិពលអវិជ្ជមានឬធ្វើឱ្យប៉ះពាល់ដល់គុណតម្លៃ របស់ស្ត្រីនៅក្នុងសង្គម តាមរយៈការផ្តល់ការគោរពនិងការការពារសិទ្ធិស្ត្រី។ ក្រោមការចង្អុលបង្ហាញ និងតម្រង់ទិសរបស់ សម្តេចមហាបវរធិបតី រាជរដ្ឋាភិបាល បានកំណត់យក “មនុស្ស” ជាអាទិភាពចម្បង ក្នុងនោះ បញ្ចកោណទី១ ផ្តោតសំខាន់ទៅលើ “ការអភិវឌ្ឍមូលធនមនុស្ស” ដែលគិតគូរទៅលើការលើកកម្ពស់សុខភាព និងសុខុមាលភាព ប្រជាជន និងការពង្រឹងប្រព័ន្ធគាំពារសង្គម។ បញ្ចកោណមុំទី៤.១ ស្តីពី “ការអភិវឌ្ឍប្រកបដោយភាពធន់ ចីរភាព និងបរិយាបន្ន “បានផ្តោតសំខាន់លើការលើកកម្ពស់សមភាពយេនឌ័រ និងបានទប់ស្កាត់ គ្រប់ទម្រង់នៃអំពើហិង្សាទាក់ទងនឹងយេនឌ័រ តាមរយៈការបង្កើនការ វិនិយោគលើយេនឌ័រ ការបង្កើនភាពអង់អាចដល់ស្ត្រីលើគ្រប់វិស័យ បង្កលក្ខណៈអំណោយផលដល់ស្ត្រី ក្នុងការអនុវត្តសិទ្ធិ ភាពជាអ្នកដឹកនាំ ដើម្បីកាត់បន្ថយអំពើហិង្សា ទាក់ទងនឹងយេនឌ័រ ការរៀបអាពាហ៍ ពិពាហ៍នៅវ័យក្មេង ការមានផ្ទៃពោះវ័យជំទង់ ព្រមទាំងលើកកម្ពស់ សុខភាពសាធារណៈ ដូចជាបញ្ហាកង្វះអាហារូបត្ថម្ភនារីនិងកុមារ។
ទិវាអន្តរជាតិនារី៨មីនា ខួបលើកទី១១៦ ” ត្រូវបានប្រារព្ធឡើង ដើម្បីរំឭកនៅទូទាំងពិភពលោក ចំពោះសារៈសំខាន់និងគុណតម្លៃនៃការចូលរួមរបស់ស្ត្រី និងសមិទ្ធផលនានា ដែលកើតចេញពីកម្លាំងកាយកម្លាំងចិត្តរបស់ស្ត្រី ដោយពុំរើសអើង បែងចែកជាតិសាសន៍ ពណ៌សម្បុរ វប្បធម៌ អាជីព ស្ថានភាពសេដ្ឋកិច្ច ឬនិន្នាការនយោបាយ ដែលកន្លងមកបានចូលរួមយ៉ាងសកម្ម នៅក្នុងការរួមចំណែក ធ្វើសកម្មភាពមនុស្សធម៌ នៅក្នុងក្រសួង ក៏ដូចជាសង្គមខាងក្រៅ តាមរយៈការស្វែងយល់សុខទុក្ខ មន្រ្តីរាជការដែលជានិវត្តន៍ជននិងចាស់ជរា និងជនងាយរងគ្រោះនានា។ ជាក់ស្តែងមានដូចជា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាជាដើម ដែលប្រជាពលរដ្ឋទូទៅប្រសិទ្ធនាមថា មាតាមនុស្សធម៌ លោកបានលះបង់កម្លាំងកាយ ចិត្ត សតិបញ្ញា និងទ្រព្យធនជាច្រើនជួយដល់សង្គមជាតិ និងស្របទៅនឹងទិសស្លោករបស់លោកជំទាវបណ្ឌិត ពេជ ចន្ទមុនី្នហ៊ុនម៉ាណែត ដែលបានថ្លែងថា “នៅក្នុងផ្ទះ បើមិនមានភរិយាខ្លាំង មិនមានម្តាយល្អ នោះស្វាមី និងឪពុកក៏ពិបាកនឹងមានឱកាសគ្រប់គ្រាន់ ធ្វើរឿងជោគជ័យនៅខាងក្រៅដែរ”។
នៅក្នុងឱកាសដ៏វិសេសវិសាលនេះ ឯកឧត្តមបណ្ឌិតរដ្ឋមន្រ្តី បានផ្តល់អនុសាសន៍ ក្នុងការបន្តជម្រុញការលើកកម្ពស់លើសមភាពយេនឌ័រ មួយចំនួនដូចជា៖
១.ក្នុងយុគសម័យឌីជីថល សន្តិសុខសម្រាប់ស្ត្រី មិនមែនមាននៅ ត្រឹមតែក្នុងពិភពរូបវន្តប៉ុណ្ណោះទេ ប៉ុន្តែ គឺរួមទាំងសុវត្ថិភាពនៅលើ បណ្តាញសង្គមផងដែរ។ ដូច្នេះ យើងត្រូវរួមគ្នាបង្កើនការយល់ដឹង និងទប់ស្កាត់ឱ្យខានតែបាន នូវការបៀតបៀនតាមប្រព័ន្ធអនឡាញ ដើម្បីធានាថា ស្ត្រីនិងក្មេងស្រី អាចប្រើប្រាស់បច្ចេកវិទ្យាដើម្បីអភិវឌ្ឍខ្លួន ដោយគ្មានការគំរាមកំហែង។ ២.សូមឱ្យបងប្អូនស្ត្រីគ្រប់រូប កសាងសមត្ថភាព ចំណេះ ជំនាញ វិជ្ជាជីវៈផ្សេងៗ ពង្រឹងភាពអង់អាចរបស់ខ្លួន ចាប់យកឱកាសការងារ និងធានាបាននូវប្រាក់ចំណូលខ្ពស់ ដើម្បីកសាងគ្រួសាររបស់ខ្លួនឱ្យ រឹងមាំប្រកបដោយសុភមង្គល។ ៣.សូមឱ្យបងប្អូនជាបុរស ដែលជាស្វាមី ជាឪពុក និងជាមិត្តរួម ការងារ ត្រូវធ្វើជាបង្អែកដ៏រឹងមាំ និងជាដៃគូសន្តិភាពមិនអាចខ្វះបាន ក្នុងការផ្តល់តម្លៃ និងការការពារសន្តិសុខសម្រាប់ស្ត្រីនៅក្នុងគ្រួសារ អង្គភាព និងសង្គមជាតិ។ ៤.សូមលើកទឹកចិត្តឱ្យបង ប្អូន ជាស្ត្រីគ្រប់រូប បន្តប្រើប្រាស់ សមត្ថភាពរបស់ខ្លួនចូលរួមអភិវឌ្ឍសង្គមជាតិយើង ឱ្យមានការរីក ចម្រើនបន្ថែមទៀត ។ ៥. សូមលើកទឹកចិត្តឱ្យបង ប្អូន នារី ជាសមាជិកសមាគមនារីកម្ពុជា ដើម្បីសន្តិភាព និអភិវឌ្ឍន៍ក្រសួងធម្មការនិងសាសនា បន្តចុះសួរសុខទុក្ខវីរៈកងទ័ព និងបងប្អូនជនភៀសសឹង ដើម្បីផ្តល់ភាពកក់ក្រៅនិងកំលាំងចិត្ត ក្នុងនាម “ខ្មែរ ស្រលាញ់ ខ្មែរ“ ”ខ្មែជួយខ្មែរ “៕
