មណ្ឌលគិរី ៖ នៅថ្ងៃទី០៤ ខែមិថុនា ឆ្នាំ២០២៦ នេះ ឯកឧត្ដម គង់ គឹមនី អភិបាលនៃគណៈអភិបាលខេត្តមណ្ឌលគិរី បានដឹកនាំក្រុមការងារ រួមមានលោកស្រីអភិបាលរងខេត្ត អាជ្ញាធរក្រុងសែនមនោរម្យ និងអាជ្ញាធរសង្កាត់ស្ពានមានជ័យ ចុះជួបសំណេះសំណាលសួរសុខទុក្ខផ្ទាល់ជាមួយបងប្អូនប្រជាពលរដ្ឋ និងអាជីវករដែលកំពុងប្រកបរបរលក់ដូរនៅក្នុងផ្សារសែនមនោរម្យ។
នៅក្នុងឱកាសចុះសាកសួរសុខទុក្ខនោះ ឯកឧត្ដម គង់ គឹមនី បានសម្តែងនូវការគិតគូរ និងក្តីនឹករលឹកយ៉ាងជ្រាលជ្រៅចំពោះសុខទុក្ខ និងជីវភាពរស់នៅប្រចាំថ្ងៃរបស់បងប្អូនអាជីវករ ក៏ដូចជាប្រជាពលរដ្ឋទាំងអស់។
ជាមួយគ្នានោះដែរ ឯកឧត្ដម អភិបាលខេត្ត បានចំណាយពេលជជែកលេងយ៉ាងស្និទ្ធស្នាល និងស្វែងយល់ពីការលក់ដូរ។ សកម្មភាពនេះទទួលបានការត្រេកអរ និងការគាំទ្រយ៉ាងខ្លាំងពីបងប្អូនអាជីវករ និងប្រជាពលរដ្ឋ ដោយពួកគាត់បានសន្យានឹងចូលរួមសហការជាមួយអាជ្ញាធរគ្រប់លំដាប់ថ្នាក់ ដើម្បីធ្វើឱ្យផ្សារសែនមនោរម្យមានបរិស្ថានស្អាត និងសណ្តាប់ធ្នាប់ល្អជានិច្ច៕
