(ភ្នំពេញ)៖ ប្រមុខការទូតកម្ពុជា លោកទេសរដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិកម្ពុជា នៅថ្ងៃទី២៩ ខែវិច្ឆិកា ឆ្នាំ២០១៧នេះ បានអះអាងបញ្ជាក់ប្រាប់ អគ្គរដ្ឋទូត និងតំណាងស្ថានទូតចំនួន៥ យ៉ាងច្បាស់ថា ប្រទេសកម្ពុជា ពុំងាកទៅរករបបឯកបក្ស របបដែលមានអ្នកដឹកនាំតែមួយនោះទេ។
ការបញ្ជាក់ជំហររបស់កម្ពុជារបស់ លោកទេសរដ្ឋមន្រ្តី ប្រាក់ សុខុន បានធ្វើឡើង នៅក្នុងជំនួបជាមួយ អគ្គរដ្ឋទូត និងតំណាងស្ថានទូតចំនួន៥ប្រទេស នៅទីស្តីការក្រសួងការបរទេស នារសៀល ថ្ងៃទី២៩ ខែវិច្ឆិកា ឆ្នាំ២០១៧នេះ។
លោក ជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានថ្លែងប្រាប់ក្រុមអ្នកសារព័ត៌មាន ក្រោយបញ្ចប់ជំនួបនេះថា លោកទេសរដ្ឋមន្រ្តី ប្រាក់ សុខុន បានបញ្ជាក់ច្បាស់ថា រាជរដ្ឋាភិបាលកម្ពុជា បានបេ្ដជ្ញាចិត្តយ៉ាងមុតមាំ ក្នុងការរក្សារបបប្រជាធិបតេយ្យសេរីពហុបក្ស ហើយលោកបានអះអាងយ៉ាងច្បាស់ទៀតថា កម្ពុជាពុំងាកទៅរករបបឯកបក្ស របបដែលមានអ្នកដឹកនាំតែមួយនោះទេ។
ប្រមុខការទូតកម្ពុជា បានបញ្ជាក់បន្ថែមផងដែរ អំពីបច្ចុប្បន្ន ដើម្បីធានាបាននៅរបបពហុបក្សនេះ បន្ទាប់ពីមានការសម្រេចរបស់តុលាការកំពូល ធ្វើការរំលាយគណបក្សសង្គ្រោះជាតិ គឺបានរៀបចំបែបចែកអាសនៈ របស់គណបក្សសង្គ្រោះជាតិ ទៅគណបក្សផ្សេងៗទៀត ដើម្បីធានាបាន នៅក្នុងរដ្ឋសភា ដែលជារដ្ឋសភាពហុបក្ស។ ទេសរដ្ឋមន្រ្តី ប្រាក់ សុខុន បានបន្ដទៀតថា ពាក់ព័ន្ធនឹងការបោះឆ្នោតនៅក្នុងប្រទេសកម្ពុជា នៅឆ្នាំ២០១៨ខាងមុខនេះ ប្រទេសកម្ពុជា គឺមានគណបក្សចំនួន ៣៥គណបក្ស ហើយគណបក្សទាំងអស់ គឺសុទ្ធតែកំពុងត្រៀមរៀបចំខ្លួន ដើម្បីប្រកួតប្រជែងក្នុងការបោះឆ្នោត នៅឆ្នាំ២០១៨ខាងមុខនេះ។
រដ្ឋមន្រ្តីក្រសួងការបរទេស ក៏បានបដិសេធផងដែរ ចំពោះការលើកឡើងរបស់មជ្ឍដ្ឋានមួយចំនួន ដែលបានលើកឡើងថា កម្ពុជាកំពុងតែងាកទៅរក របបដែលមានគណបក្សតែមួយ៕
