(ខេត្តកំពង់ធំ)៖ ប្រជាពលរដ្ឋក្នុងឃុំម្សាក្រង ស្រុកស្ទោង ខេត្តកំពង់ធំ កំពុងបង្ហាញក្តីរីករាយយ៉ាងខ្លាំង បន្ទាប់ពីស្ពានថ្មថ្មីមួយខ្សែ ដែលជាអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានសាងសង់រួចរាល់ និងត្រៀមដាក់ឱ្យប្រើប្រាស់ជាផ្លូវការ ដើម្បីសម្រួលដល់ការធ្វើដំណើរឆ្លងកាត់ស្ទឹងស្ទោង។
ស្ពានថ្មដ៏រឹងមាំនេះ ស្ថិតនៅភូមិអូរដូង ឃុំម្សាក្រង ដែលត្រូវបានសាងសង់ឡើងតាមរយៈការចង្អុលបង្ហាញយ៉ាងយកចិត្តទុកដាក់ពីសំណាក់សម្ដេចធិបតី ហ៊ុន ម៉ាណែត ដោយមានការដឹកនាំអនុវត្តផ្ទាល់ពីឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ។ គម្រោងនេះក៏ទទួលបានកិច្ចសហការយ៉ាងជិតស្និទ្ធពីក្រសួងអភិវឌ្ឍន៍ជនបទ ក្រសួងធនធានទឹក និងឧតុនិយម ព្រមទាំងរដ្ឋបាលខេត្តកំពង់ធំផងដែរ។
ការលេចចេញជារូបរាងនៃស្ពានថ្មថ្មីនេះ គឺជាការដោះស្រាយបញ្ហាដ៏ចាំបាច់ ដោយមកជំនួសស្ពានឈើចាស់ដែលទ្រុឌទ្រោម និងបង្កការលំបាកដល់ប្រជាពលរដ្ឋ សិស្សានុសិស្ស និងលោកគ្រូអ្នកគ្រូ ជាពិសេសនៅរដូវវស្សា។
សម្រាប់លក្ខណៈបច្ចេកទេស ស្ពានថ្មនេះមានទទឹង ៨ម៉ែត្រ បណ្ដោយ ៦០ម៉ែត្រ និងមានជើងទេផ្លូវបេតុងសងខាងប្រវែង ១៥០ម៉ែត្រ។ ស្ពាននេះមិនត្រឹមតែធានាបាននូវសុវត្ថិភាពខ្ពស់ និងភាពងាយស្រួលក្នុងការធ្វើដំណើរប្រចាំថ្ងៃប៉ុណ្ណោះទេ ប៉ុន្តែវាក៏ជាកាតាលីករដ៏សំខាន់ក្នុងការលើកកម្ពស់សេដ្ឋកិច្ចមូលដ្ឋាន តាមរយៈការសម្រួលដល់ការដឹកជញ្ជូនកសិផល និងទំនិញនានាឱ្យកាន់តែរហ័សទាន់ចិត្តថែមទៀត៕
