ក្នុងផែនការឆ្ពោះទៅកាន់ការបោះឆ្នោតក្រុមប្រឹក្សាឃុំ សង្កាត់អាណត្តិទី៦ ឆ្នាំ២០២៧ គណបក្សប្រជាជនកម្ពុជាស្រុកប្រាសាទបល្ល័ង្ក បានត្រៀមខ្លួនរួចរាល់ហើយតាមផែនការគ្រោងដែលបក្សបានដាក់ចេញ។ នៅថ្ងៃសៅរ៍ ទី៣ ខែតុលា ឆ្នាំ២០២៦ គណបក្សតាមឃុំនីមួយៗ បានរៀបចំបោះឆ្នោតស្ទង់មតិ ដើម្បីជ្រើសរើសក្រុមប្រឹក្សាឃុំ ទាំង៧នៅក្នុងស្រុកប្រាសាទបល្ល័ង្ក។
ដំណើរការបោះឆ្នោតបានប្រព្រឹត្តទៅពេញមួយថ្ងៃ ហើយលទ្ធផលក៏រើសបានបេក្ខភាពសម្រាប់ក្រុមប្រឹក្សាឃុំបូកទាំងបេក្ខជនបម្រុងផងនោះ មានចំនួនសរុប១២៣រូប។ នៅថ្ងៃអាទិត្យ ទី៤ ខែតុលា ឆ្នាំ២០២៦នេះ លោកអ្នកឧកញ៉ា ទ្រី ភាព បេសកជនពិសេសសម្តេចតេជោ ហ៊ុន សែន និងជាប្រធានក្រុមការងារបក្សប្រជាជនកម្ពុជា ចុះជួយស្រុកប្រាសាទបល្ល័ង្ក បានអញ្ជើញចុះមកសំណេះសំណាល និងជជែកលើកិច្ចការងារមួយចំនួនជាមួយបេក្ខជនក្រុមប្រឹក្សារបស់បក្សទាំង១២៣រូប។
ក្នុងជំនួបនេះ លោកអ្នកឧកញ៉ា បានអបអរសាទរចំពោះបេក្ខជនក្រុមប្រឹក្សាទាំង៧ឃុំ ក្នុងស្រុកប្រាសាទបល្ល័ង្ក ដែលទទួលបានការគាំទ្រ ព្រមទាំងបាននាំយកនូវប្រសាសន៍ផ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក៏ដូចជាសម្តេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត។
លោកអ្នកឧកញ៉ា ទ្រី ភាព ក៏បានលើកបង្ហាញនូវសមិទ្ធផលមួយចំនួនដែលក្រុមការងារបក្សសម្រេចបានក្នុងរយៈពេលជិតពីរឆ្នាំកន្លងមកនេះ បន្ទាប់ពីគណបក្សបានសម្រេចចាត់តាំងឱ្យចុះមកពង្រឹងការងារក្នុងស្រុកប្រាសាទបល្ល័ង្ក។
លោកអ្នកឧកញ៉ា បានគូសរំលេចថា រយៈពេលជិតពីរឆ្នាំនេះ ក្រុមការងាររបស់លោក បានប្រឹងប្រែងអស់កម្លាំងកាយចិត្ត ដើម្បីរួមចំណែកអភិវឌ្ឍមូលដ្ឋានស្រុកប្រាសាទបល្ល័ង្ក។ ក្នុងក្របខណ្ឌបក្ស ក្រុមការងារបានសាងសង់ទីស្នាក់ការគណបក្សបានរួចរាល់ចំនួន៦ឃុំ នៅសល់តែមួយឃុំទៀតប៉ុណ្ណោះ និងលើកផ្លាកគណបក្សនៅតាមផ្លូវតូចធំក្នុងឃុំទាំង៧។ សម្រាប់ការងារជាប្រយោជន៍សាធារណៈសម្រាប់ប្រជាពលរដ្ឋវិញ មានការសាងសង់ផ្លូវក្រួសក្រហម សាងសង់ស្ពាន ជួសជុលស្ពាន និងបំពាក់ភ្លើងសឡាបំភ្លឺតាមផ្លូវជាដើម។ សមិទ្ធផលទាំងនោះ បានចំណាយថវិកាសរុបជាង ២លាន ៣០ម៉ឺនដុល្លារអាមេរិក។
លោកអ្នកឧកញ៉ា ទ្រី ភាព បានគូសរំលេចថា ក្រុមការងាររបស់លោកមកពីវិស័យឯកជន តែបានដាក់បេះដូងជួយដល់មូលដ្ឋានស្រុកប្រាសាទបល្ល័ង ដោយមិនចង់បានតួនាទីអ្វីនៅក្នុងរាជការនោះឡើយ។ លោកអ្នកឧកញ៉ា បានបញ្ជាក់ថា ការប្រឹងប្រែងជួយដល់បក្ស ក៏ព្រោះតែក្តីស្រឡាញ់ចំពោះបក្ស ដែលជាគណបក្សនយោបាយមួយដ៏ធំនៅកម្ពុជា មានថ្នាក់ដឹកនាំដូចជាសម្តេចតេជោ ហ៊ុន សែន សម្តេចមហាបវរធិបតី ហ៊ុន ម៉ាណែត មានបេះដូងស្រឡាញ់ជាតិ និងប្រជាជន ហើយមានឆន្ទៈមុតមាំក្នុងកិច្ចកសាង និងអភិវឌ្ឍជាតិមាតុភូមិ ដូចដែលយើងបានឃើញនូវសមិទ្ធផលជាច្រើនត្រូវបានរំលេចឡើងជាភស្តុតាង។
ក្រៅពីលើកបង្ហាញនូវសមិទ្ធផលដែលក្រុមការងារបក្សសម្រេចបានក្នុងរយៈពេលជិតពីរឆ្នាំមកនេះ លោកអ្នកឧកញ៉ា ទ្រី ភាព បេសកជនពិសេសសម្តេចតេជោ ហ៊ុន សែន លើកបង្ហាញពីការត្រៀមជួសជុលឡើងវិញចំពោះហេដ្ឋារចនាសម្ព័ន្ធផ្លូវ និងស្ពាន ដែលរងការខូចខាតក្នុងរដូវវស្សាឆ្នាំនេះ ដើម្បីសម្រួលដល់ការធ្វើដំណើររបស់ប្រជាពលរដ្ឋ។
ក្នុងជំនួបនាព្រឹកថ្ងៃនេះ លោកអ្នកឧកញ៉ា ទ្រី ភាព ក៏បានក្រើនរំលឹកដល់បេក្ខជនក្រុមប្រឹក្សាឃុំទាំង៧ឃុំ ដែលបានជួបជុំគ្នាព្រឹកនេះដែរថា តំណែងតួនាទីរបស់ក្រុមប្រឹក្សាឃុំ គឺបានមកពីប្រជាពលរដ្ឋជាអ្នកផ្តល់ជូនតាមរយៈការបោះឆ្នោត ដូច្នេះត្រូវយកចិត្តទុកដាក់ចំពោះសុខទុក្ខរបស់ប្រជាពលរដ្ឋ ជាពិសេសត្រូវឆ្លើយតបឱ្យបានលឿនរហ័សលើបញ្ហាប្រឈមក្នុងមូលដ្ឋាន ដូចជាការខ្វះខាតក្នុងជីវភាពប្រចាំថ្ងៃជាដើម។
លោកអ្នកឧកញ៉ា បានសង្កត់ធ្ងន់ថា មេឃុំ ក្រុមប្រឹក្សាឃុំ និងមេភូមិ ជាអ្នកនៅកៀកកិតជិតជាមួយប្រជាពលរដ្ឋ ដូច្នេះមិនត្រូវទុកឱ្យពលរដ្ឋមានការលំបាកដោយខ្លួនមិនដឹងនោះឡើយ។ លោកអ្នកឧកញ៉ា បានបញ្ជាក់ថា ពលរដ្ឋដែលជួបការលំបាក និងមានបញ្ហាផ្សេងៗត្រូវរាយការណ៍ឱ្យបានលឿនរហ័សទៅកាន់ក្រុមការងារ ដើម្បីក្រុមការងារដោះស្រាយជូនពួកគាត់៕
