ខេត្តឧត្តរមានជ័យ ថ្ងៃទី០២ ខែមករា ឆ្នាំ២០១៨ ឯកឧត្តម ស ថាវី អភិបាលខេត្តឧត្តរមានជ័យ ឯកឧត្តម យិន ធិន ប្រធានក្រុមប្រឹក្សាខេត្តឧត្តរមានជ័យ នៃព្រះរាជាណាចក្រកម្ពុជា និងឯកឧត្តម ថាក់វ៉ាត់ រ៉ាក់ស៊ុះបាន អភិបាលខេត្តស៊ីសាកេត នៃព្រះរាជាណាចក្រថៃ បានអញ្ជើញប្រារព្ធពិធីសូត្រមន្តរាប់បាត្រឆ្លងឆ្នាំសកល ឆ្នាំ២០១៧ ឈានចូលឆ្នាំ២០១៨ រួមគ្នានៅច្រកទ្វារអន្តរជាតិជាំសាងំា ក្នុងស្រុកអន្លង់វែង ខេត្តឧត្តរមានជ័យ កាលពីថ្ងៃអង្គារ ១រោជ ខែបុស្ស ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី០២ ខែមករា គស២០១៨ ដោយមានចូលរួមពីមន្ត្រីរាជការ កងកម្លាំងចម្រុះ ព្រមទាំងប្រជាពលរដ្ឋនៃប្រទេសទាំងពីរយ៉ាងច្រើនកុះករ ។
ឯកឧត្តម ស ថាវី បានមានប្រសាសន៍ថា ពិធីនេះជាកិច្ចសហប្រតិបត្តិការឱ្យកាន់តែរឹងមាំបន្ថែមទៀតរវាងខេត្តជាប់ព្រំដែនជាមួយខេត្តឧត្តរមានជ័យ និង ខេត្តស៊ីសាកេតប្រទេសថៃ ។ ខេត្តឧត្តរមានជ័យនៅមានខេត្តបុរីរ៉ាំ ខេត្តសុរិន្ទរ៍ ក៏មានការចូលរួមគ្នាប្រារព្ធវិធីនានាជាប្រពៃណីជាច្រើនដែលបានរៀបចំឡើងជារៀងរាល់ឆ្នាំដែរ ដើម្បីបង្កើនសន្តិភាព សាមគ្គីភាព កាន់តែរឹងមាំរវាងខេត្តជាប់ព្រំដែននៃប្រទេសយើងទាំងពីរ ។
ឯកឧត្តមបន្តថា ខេត្តជាប់ព្រំដែននៃប្រទេសទាំងពីរ មានកិច្ចសហប្រតិបត្តិការបានល្អធ្វើឱ្យព្រំដែនរក្សាបាននូវសុខសន្តិភាព សុវត្ថិភាព សន្តិសុខសណ្តាប់ធ្នាប់ល្អជូនប្រជាពលរដ្ឋដែលកំពុងរស់នៅជាប់បន្ទាត់ព្រំដែននៃប្រទេសទាំងពីរ។ អ្វីៗអស់ទាំងនេះបានមកពីការខិតខំប្រឹងប្រែងរបស់ថ្នាក់ដឹកនាំនៃប្រទេសទាំងពីរ ព្រមជាមួយនឹងអាជ្ញាធរមូលដ្ឋានខេត្តជាប់ព្រំដែនសហការគ្នាបានល្អ ទើបធ្វើឱ្យមានការទំនាក់ទំនងនេះមានការរីកចម្រើនជាបន្តបន្ទាប់ស្ទើរគ្រប់វិស័យរហូតដល់បច្ចុប្បន្ននេះ។ គ្រប់កងកម្លាំងសមត្ថកិច្ចនៃប្រទេសយើងទាំងពីរសហការគ្នា ធ្វើការទប់ស្កាត់បទល្មើសឆ្លងដែនខុសច្បាប់ផ្សេងៗបានជោគជ័យជាបន្តបន្ទាប់ ។
ឯកឧត្តម ថាក់វ៉ាត់ រ៉ាក់សុះបាន អភិបាលខេត្តស៊ីសាកេត បានថ្លែងអំណអរគុណដល់អាជ្ញាធរខេត្តឧត្តរមានជ័យ និង ខេត្តស៊ីសាកេត ដែលសហការគ្នាបានល្អជាប្រចាំជាក់ស្ដែងនៅថ្ងៃនេះយើងប្រារព្ធពិធីរួមគ្នាសម្រេចបានជោគជ័យសម្រាប់ប្រជាពលរដ្ឋដែលរស់នៅជាប់បន្ទាត់ព្រំដែននៃប្រទេសទាំងពីរ ។ ឯកឧត្តម មានប្រសាសន៍ថា ហេតុនេះយើងត្រូវធ្វើជាប្រពៃណីរាងរហូតនូវរាល់គ្រប់សកម្មភាពរបស់ខេត្តយើងទាំងពីរមាន ហើយនឹងខិតខំយកចិត្តទុកដាក់រិះរកវិធីល្អៗបន្ថែមទៀត ដើម្បីយកមកសហការឱ្យបានកាន់តែប្រសើរជាងនេះ ៕