នាព្រឹកថ្ងៃអង្គារ ១៤កើត ខែមាឃ ឆ្នាំរកា ព.ស ២៥៦១ ត្រូវនឹងថ្ងៃទី៣០ ខែមករា ឆ្នាំ២០១៨ ក្រុមសមាជិក ព្រឹទ្ធសភាប្រចាំភូមិភាគទី២ដឹកនាំដោយឯកឧត្តម អ៊ុក ប៊ុនឈឿន ប្រធានក្រុម បានអញ្ជើញជួបពិភាក្សាការងារជាមួយអាជ្ញាធរស្រុកបាធាយ ស្រុកស្រីសន្ធរ និងស្រុកជើងព្រៃ ដើម្បីស្វែងយល់អំពី ការអនុវត្តតួនាទី ភារកិច្ចរបស់ក្រុមប្រឹក្សាឃុំ អាណត្តិទី៤ គោលនយោបាយភូមិ ឃុំមានសុវត្ថិភាព ការអនុវត្តគោលនយោបាយវិមជ្ឈការ និងវិសហមជ្ឈការនៅមូលដ្ឋាន និងបញ្ហាប្រឈមនានា ដោយមានការអញ្ជើញចូលរួមពីប្រធានក្រុមប្រឹក្សាស្រុក អភិបាលស្រុក អធិការនគបាលស្រុក នាយប៉ុស្តិ៍រដ្ឋបាលឃុំ ប្រធានសមាគមន៍ និងក្រុមប្រឹក្សាឃុំ នៅសាលប្រជុំសាលាស្រុកបាធាយ ខេត្តកំពង់ចាម។
ក្នុងឱកាសនោះលោក កៅ ប៊ុនណាត អភិបាលនៃគណៈអភិបាលស្រុកបាធាយបានឡើងមានមតិស្វាគមន៍ និងរាយការណ៍អំពីសភាពការភូមិសាស្ត្រ ព្រមទាំងបញ្ហាប្រឈបនានាស្រុកកំពុងដោះស្រាយ និងដោះស្រាយរួច។
បន្ទាប់មកឯកឧត្តម អ៊ុក ប៊ុនឈឿន ប្រធានក្រុមសមាជិកព្រឹទ្ធសភាប្រចាំភូមិភាគទី២ បានមានប្រសាសន៍ថា គោលបំណងដែលក្រុមសមាជិកព្រឹទ្ធសភាចុះមកជួបសំណេះសំណាលនាពេលនេះដើម្បីស្វែងយល់អំពី ការអនុវត្តតួនាទី ភារកិច្ចរបស់ក្រុមប្រឹក្សាឃុំ អាណត្តិទី៤ គោលនយោបាយភូមិ ឃុំមានសុវត្ថិភាព ការអនុវត្តគោលនយោបាយវិមជ្ឈការ និងវិសហមជ្ឈការនៅមូលដ្ឋាន ព្រមទាំងបញ្ហាប្រឈមនានា។
ក្រោយពីបានស្តាប់សេចក្តីរាយណ៍របស់ក្រុមប្រឹក្សាស្រុក និងឃុំរួចមក ឯកឧត្តមបានថ្លែងនូវការកោតសរសើរ និងវាយតម្លៃខ្ពស់ចំពោះអាជ្ញាធរស្រុក និងឃុំ ដែលបានខិតខំប្រឹងប្រែងធ្វើឲ្យមូលដ្ឋាន មានការរីកចម្រើនគួរឲ្យកក់សម្គាល់។ ជាមួយគ្នានេះ ឯកឧត្តម បានកោតសរសើរចំពោះសកម្មភាពមនុស្សធម៌ ការបំរើសេវាសាធារណៈជូនប្រជាពលរដ្ឋ ការងារសង្គមកិច្ច ការដោះស្រាយបញ្ហាប្រឈម និងការអនុវត្តច្បាប់នានា ក៏ដូចជាការខិតខំបង្រ្កាបបាននូវបទល្មើសនានា ដែលធ្វើឲ្យមូលដ្ឋានរក្សាបានសន្តិសុខ សណ្តាប់ធ្នាប់ របៀបរៀបរយ។
ឯកឧត្តម បានបន្តថា ចំពោះបញ្ហាប្រឈមទាំងឡាយដែលអាជ្ញាធរស្រុក មេប៉ុស្តិ៍ និងឃុំ បានលើកឡើង គឺទាមទារយ៉ាងចាំបាច់ឲ្យថ្នាក់ដឹកនាំទាំងអស់ចូលរួមដោះស្រាយជាមួយគ្នា ដើម្បីឲ្យមូលដ្ឋានមានការអភិវឌ្ឍន៍កាន់តែល្អប្រសើរឡើង។
