រាជធានីភ្នំពេញ ៖ កម្មវិធីពិព័រណ៍ផលិតផលសហគមន៍ខ្ញុំ ត្រូវបានផ្ដួចផ្ដើមធ្វើឡើងជាលើកទី១ ដោយនិស្សិតដែលកំពុងសិក្សានៅមហាវិទ្យាល័យសិក្សាអភិវឌ្ឍន៍ នៃសាកលវិទ្យាល័យភូមិន្ទភ្នំពេញ ក្នុងគោលបំណងឲ្យសារធារណជន ស្វែងយល់ពីផលិតផលសហគមន៍ និងការតាំងបង្ហាញផលិតផល ស្នាដៃ និងការច្នៃប្រឌិតរបស់សហគមន៍មកពី១១ ខេត្តក្រុង។
ពិធីបើកកម្មវិធីពិព័រណ៍ផលិតផលសហគមន៍ខ្ញុំ ត្រូវបានប្រារព្ធឡើងក្រោមអធិបតីភាព ឯកឧត្តមបណ្ឌិត ហង់ ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡា នៅថ្ងៃពុធ ១៤រោច ខែមាឃ ឆ្នាំរកា ព.ស. ២៥៦១ នៅសាកលវិទ្យាល័យភូមិន្ទភ្នំពេញ។
សូមបញ្ជាក់ផងដែរថា កម្មវិធីពិព័រណ៍ផលិតផលសហគមន៍ខ្ញុំ នឹងប្រព្រឹត្តរយៈពេលពីរថ្ងៃ ចាប់ពីថ្ងៃទី១៤ ដល់ថ្ងៃទី១៥ ខែកុម្ភៈ ឆ្នាំ២០១៨។
