រសៀលថ្ងៃសៅរ៍ ៧រោច ខែចេត្រ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី០៧ ខែមេសា ឆ្នាំ២០១៨ សម្តេចវិបុលសេនាភក្តី សាយ ឈ៉ំ ប្រមុខរដ្ឋស្តីទី នៃព្រះរាជាណាចក្រកម្ពុជា និងលោកជំទាវ ព្រមទាំងក្រុមគ្រួសារ …. បានប្រារព្ធរៀបចំពិធីបុណ្យខួបគម្រប់ខួប១០០ថ្ងៃ ឧទ្ទិសកុសល ដល់ដួងវិញ្ញាណក្ខ័ន្ធ មហាឧបាសក គង់ ខាត់ និងបុណ្យអាយុវឌ្ឍនកម្មពូនភ្នំខ្សាច់មហាឆាក (បុព្វការីជន) ក្នុងឱកាសចូលឆ្នាំថ្មី ប្រពៃណីខ្មែរ ឆ្នាំច សំរឹទ្ធិស័ក ព.ស ២៥៦២ … ក្នុងឱកាសពិធីបុណ្យ ដ៏មហោឡាឫក អធិកអធម្មនេះ សម្តេច លោកជំទាវ ព្រមទាំងក្រុមគ្រួសារ បាននិមន្តព្រះសង្ឃធ្វើបទនមស្សការព្រះរតនត្រៃយ៍ សមាទានសីល ចម្រើនព្រះបរិត្ត និងសម្តែងព្រះធម៌ទេសនា ឧទ្ទិសកុសលជូនដល់ដួងវិញ្ញាណក្ខន្ធមហាឧបាសក គង់ ខាត់ បិតាក្មេករបស់ សម្តេច ដែលបានទទួលមរណភាព កាលពីថ្ងៃអាទិត្យ ៦រោច ខែបុស្ស ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី០៧ ខែមករា ឆ្នាំ២០១៨ ក្នុងជន្មាយុ១០១ ឈានចូល១០២ឆ្នាំ ដោយជរាពាធ …។
ពិធីបុណ្យនេះ រៀបចំឡើង នៅវត្តសុវណ្ណគីរី-ជើងឆ្នុក ដែលស្ថិតក្នុងភូមិជើងឆ្នុក ឃុំតាំងក្រាំង ស្រុកបាធាយ ខេត្តកំពង់ចាម។