ឯកឧត្តមបណ្ឌិត ងួន ញ៉ិល អញ្ជើញជាអធិបតីដ៏ខ្ពង់ខ្ពស់ ពិធីបុណ្យឆ្លង សម្ពោធឧបដ្ឋានសាលា និងសមិទ្ធិផលនានា ក្នុងវត្តព្រះស្រីឯកោរាមាធិបតី ហៅវត្តដូង

ឯកឧត្តមបណ្ឌិត ងួន ញ៉ិល បានអញ្ជើញមានប្រសាសន៍សំណេះសំណាលចំពោះ ព្រះសង្ឃ មន្ត្រីរាការ ប្រជាជន លោកគ្រូ អ្នកគ្រូ និងក្មួយៗសិស្សានុសិស្ស ដោយបញ្ជាក់ថា ពេលនេះគឺជាលើកទី២ហើយ ដែលឯកឧត្តមបណ្ឌិត មានកិត្តិយសបានមកកាន់វត្តដូងនេះ និង ថ្លែងអំណរគុណចំពោះ ព្រះសង្ឃគ្រប់ព្រះអង្គ មន្ត្រីរាជការ និងសប្បុរសជនទាំងអស់ដែលបាន រួបរួមគ្នាក្នុងការកសាងសមិទ្ធផលដ៏ល្អនេះ ។

ឯកឧត្តមបណ្ឌិត មានប្រសាសន៍លើកឡើងពីការវិវត្តន៍រីកចំរើនក្នុងវិស័យព្រះពុទ្ធសាសនា តាំងពីអតីតកាលរហូតមកបច្ចុប្បន្ន និងការសាបសូន្យក្នុងវិស័យនេះ ក៏ដូចហេដ្ឋារចនាសម្ព័ន្ធសង្គមជាតិ ទាំងមូលក្នុងរបបប្រល័យពូជសាសន៍ ប៉ុល ពត និងការរស់ឡើងវិញ មានការអភិវឌ្ឍទាំងផ្នែកអាណាចក្រ-ពុទ្ធចក្រ ចាប់ពីឆ្នាំ១៩៧៩ រហូតមកដល់បច្ចុប្បន្ន ក្រោមការដឹកនាំរបស់គណបក្សប្រជាជនកម្ពុជា ។

ឯកឧត្តមបណ្ឌិត មានប្រសាសន៍ចំពោះអាជ្ញាធរគ្រប់ជាន់ថ្នាក់ កងកម្លាំងទាំងអស់សហការបំពេញការងារ ធានាឱ្យបាននូវសន្តិសុខ សណ្ឋាប់ធ្នាប់សាធារណៈជូនប្រជាជន ក្នុងឱកាសសប្បាយភាព នៃពិធីបុណ្យចូលឆ្នាំថ្មី ប្រពៃណីជាតិខ្មែរ ក្នុងពេលខាងមុខនេះ ។

ចុងក្រោយ ឯកឧត្តមបណ្ឌិត បានមានប្រសាសន៍បញ្ជាក់ជូនអង្គពិធី អំពីការវិវត្តន៍ និង ព្រឹត្តិការណ៍ថ្មីៗ ដែលបានកើតឡើងនៅក្នុងពិភពលោកទាំងមូល ចំពោះមុខការវិវត្តន៍នៃសភាព ការណ៍ពិភពលោក និងតំបន់បែបនេះ រាជរដ្ឋាភិបាលកម្ពុជា ប្រកាន់ខ្ជាប់នយោបាយការបរទេស អព្យាក្រឹត្យ មិនចូលបក្សសម្ព័ន្ធ សន្តិសហវិជ្ជមាន មិនជ្រៀតជ្រែកចូលកិច្ចការផ្ទៃក្នុងប្រទេសផ្សេងៗទៀត ដែលរួមចំណែកយ៉ាងសកម្មក្នុងការការពារបូរណភាពទឹកដី អធិបតេយ្យ អព្យាក្រឹត្យភាព ផលប្រយោជន៍ជាតិ និងការអភិវឌ្ឍន៍ប្រទេស ។ ក្នុងស្មារតីនេះ កម្ពុជាបានពង្រឹង សហការជាមួយប្រទេសជិតខាង ដើម្បីកំណត់ព្រំដែនខណ្ឌសីមា បោះបង្គោលព្រំដែនឱ្យចប់សព្វ គ្រប់ ប្រែក្លាយប្រទេសជិតខាងទាំងអស់ ឱ្យទៅជាតំបន់សន្តិភាព មិត្តភាព សហប្រតិបត្តិការ និង អភិវឌ្ឍន៍ ។ ជាការសន្និដ្ឋាននៅខាងមុខ ពិភពលោកនឹងបន្តតាមនិន្នាការពហុប៉ូល ព្រមទាំងនិន្នាការសហការផង និងរារាំងផង ។

ពិធីបានបញ្ចប់បន្ទាប់ពី ឯកឧត្តមបណ្ឌិត ងួន ញ៉ិល អញ្ជើញបំពាក់គ្រឿងឥស្សរិយយស មេដាយស្ថាបនាជាតិប្រគេន-ជូន ព្រះសង្ឃ មន្ត្រីររាជការ សប្បុរសជន និងពិធីកាត់ខ្សែបូរណ៍ សម្ពោធដាក់ឱ្យប្រើប្រាស់ជាផ្លូវការ នូវសមិទ្ធផលថ្មីក្នុងវត្តដូងរួចមក ។