ប្រធានគណបក្សប្រជាជនកម្ពុជាខេត្តរតនគិរី ឯកឧត្តម ថង សាវុន បានថ្លែងទៅកាន់សមាជិកបក្សប្រជាជនកម្ពុជា ស្រុកលំផាត់ និងស្រុកអូរជុំ ក្នុងឱកាសដែលលោកបានចុះជួបសំណេះសំណាល និងពិនិត្យលើស្ថានភាពបក្ស នាថ្ងៃទី២៨ ខែមិថុនា ឆ្នាំ២០១៨នេះ បានគូសបញ្ជាក់ថា ក្នុងនាមជាពលរដ្ឋខ្មែរ យើងត្រូវតែដង្ហែរតាមព្រះរាជសាររបស់ព្រះករុណាជីវិតតម្កល់លើត្បូង គឺទៅបោះឆ្នោតនាថ្ងៃទី២៩ កក្កដា ឆ្នាំ២០១៨ខាងមុខនេះ ។ មិនតែប៉ុណ្ណោះវាក៏ជាកាតព្វកិច្ច និងសិទ្ធិរបស់យើងនៅក្នុងការសម្រេចចិត្តជ្រើសរើសអ្នកដឹកនាំប្រទេសជាតិ ដែលឱកាសនេះមានរយៈពេល ០៤ឆ្នាំម្តង ។
ឯកឧត្តមបន្តថា យើងបានឆ្លងផុតពីដំណាក់កាលសង្គ្រាមរាំរ៉ៃ ក្រោមគុណបំណាច់របស់បុព្វបុរសយើង មានមាតា បិតា សាច់ញាតិ បងប្អូនយើង បានលះបង់នូវឈាមស្រស់សាច់ស្រស់ រំដោះប្រទេសចេញពីភ្លើងសង្គ្រាមដែលយើងគ្រប់គ្នាខំបន់ស្រន់ឲ្យរួចផុត ឥលូវនេះយើងបានផុតទុក្ខ យើងបានលើកកម្ពស់លទ្ធិប្រជាធិបតេយ្យតាមរយៈការបោះឆ្នោត លើកស្ទួយសិទ្ធិសេរីភាពគ្រប់បែបយ៉ាងរបស់ពលរដ្ឋ និងខិតខំកសាងអ្វីៗគ្រប់យ៉ាងដូចបច្ចុប្បន្ននេះគឺសុទ្ធតែជាការចូលរួមចំណែករបស់បងប្អូនប្រជាពលរដ្ឋតាមរយៈការចូលរួមបោះឆ្នោតគ្រប់អាណត្តិកន្លងមក ហើយបងប្អូនបានសម្រេចិត្តដ៏ត្រឹមត្រូវគឺបោះឆ្នោតជូនគណបក្សប្រជាជនកម្ពុជា ដែលរួមរស់ជាមួយបងប្អូនចាប់តាំងពីសម័យសង្ក្រាមរហូតដល់បច្ចុប្បន្ននេះ ។
ឯកឧត្តមអំពាវនាវកុំឲ្យជឿនូវការញ៉ុះញ៉ុង រារាំងមិនឲ្យមានការបោះឆ្នោង ឬរារាំងបងប្អូនមិនឲ្យចេញទៅបោះឆ្នោត ពីជនអគតិមួយចំនួនពិសេសត្រកូលអ្នកក្បត់ជាតិ ប្រសិនមានករណីនេះ ជនដែលរារាំងនឹងត្រូវមានទោសតាមមាត្រានៃច្បាប់បានកំណត់ ។
ឯកឧត្តមបន្ថែមថា ដើម្បីលើកកម្ពស់ប្រជាធិបតេយ្យនៅកម្ពុជាឲ្យបានកាន់តែរឹងមាំរាជរដ្ឋាភិបាលបានខិតខំពុះពារធ្វើយ៉ាងណាឲ្យមានការបោះឆ្នោតមួយដ៏ត្រឹមត្រូវ ប៉ុន្តែអ្នកនយោបាយដែលមិនគោរពឆន្ទៈរាស្ត្រតែងតែមិនទទួលស្គាល់នូវលទ្ធផលបោះឆ្នោត មិនតែប៉ុណ្ណោះបានបំផ្លិចបំផ្លាញសមិទ្ធិផលជាតិ បំផ្លាញដំណើការលទ្ធិប្រជាធិបតេយ្យថែមទៀត ។
ឯកឧត្តម ក៏បានអំពាវនាវឲ្យសមាជិកបក្សប្រជាជនទាំងអស់បន្តធ្វើអំពើល្អឲ្យច្រើនឡើងថែមទៀត និងខិតខំជំរុញប្រជាពលរដ្ឋទៅបោះឆ្នោតឲ្យបានគ្រប់ៗគ្នា ដើម្បីអនាគាតរបស់ជាតិ និងជាសក្ខីភាពនៃការដង្ហែរតាមព្រះរាជសារដ៏ឧត្តុងឧត្តមនៃព្រះករុណាជីវិតតម្កល់លើត្បូង ព្រះមហាក្សត្រ នៃព្រះរាជាណាចក្រកម្ពុជា ។