លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានអនុញ្ញាតឱ្យ ឯកឧត្តម ស្យុង ប៉រ ឯកអគ្គរដ្ឋទូតចិន ដែលបានចប់អាណត្តិ ចូលជួបសម្តែងការគួរសម ជម្រាបលា នៅទីស្តីការក្រសួង ព្រឹកថ្ងៃសុក្រ ៤រោច ខែភទ្របទ ឆ្នាំច សំរិទ្ធិស័ក ព.ស.២៥៦២ ត្រូវនឹងថ្ងៃទី២៨ ខែកញ្ញា ឆ្នាំ២០១៨។
ឯកឧត្តម ណុប ចាន់ណារិន្ទ អ្នកនាំពាក្យ និងជាអនុរដ្ឋលេខាធិការក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានឱ្យដឹងថា ក្នុងរយៈពេល ២ឆ្នាំកន្លងទៅនេះ ឯកឧត្តម ស្យុង ព័រ ឯកអគ្គរដ្ឋទូតចិនប្រចាំកម្ពុជាចប់អាណត្តិ បានធ្វើកិច្ចការងារជាច្រើន ពិសេស ជួយសម្របសម្រួលក្នុងដំណើរទស្សនកិច្ច ឯកឧត្តម ប្រធានាធិបតីចិន ស៊ី ជីនពីង ឯកឧត្តមនាយករដ្ឋមន្ត្រីចិន លី ខឺឈាំង មកកាន់កម្ពុជា ក៏ដូចជាដំណើរទស្សនកិច្ចរបស់សម្ដេចតេជោ ទៅកាន់ប្រទេសចិនផងដែរ។ ឯកឧត្តម ស្យុង ព័រ ក៏បានបន្តទៀតថា គឺបានយកចិត្តទុកដាក់ខ្លាំងនៅក្នុងការជំរុញកិច្ចអភិវឌ្ឍសេដ្ឋកិច្ច នយោបាយផ្លូវមួយ ខ្សែក្រវ៉ាត់មួយ និងកិច្ចសហប្រតិបត្តិការជាច្រើនទៀត ដែលក្នុងនោះ ទទួលបាននូវលទ្ធផលដ៏ត្រចះត្រចង់ ដើម្បីពង្រឹង និងពង្រីក កិច្ចសហប្រតិបត្តិការ និងទំនាក់ទំនងចិន-កម្ពុជា ដល់ចំណុចថ្មីមួយទៀត ។
ជាការឆ្លើយតប លោកជំទាវកិត្តិសង្គហបណ្ឌិត ម៉ែន សំអន ក៏បានថ្លែងអំណរគុណយ៉ាងជ្រាលជ្រៅជាទីបំផុត ចំពោះ ឯកឧត្តម ស្យុង ព័រ និងមន្ត្រីការទូតរបស់ចិនទាំងអស់ ដែលបានខិតខំប្រឹងប្រែងអស់ពីកម្លាំងកាយចិត្ត ធ្វើឲ្យទំនាក់ទំនងរវាងកម្ពុជា និងចិន បានរីកចម្រើនដល់កម្រិតខ្លាំងឡើងថែមទៀត ។
លោកជំទាវ ឧបនាយករដ្ឋមន្ត្រី បន្តទៀតថា ទំនាក់ទំនងរវាងប្រទេសយើងទាំង២បានឈានដល់ចំណុចទី១ គឺកិច្ចសហប្រតិបត្តិការ ភាពជាដៃគូគ្រប់ជ្រុងជ្រោយ ហើយថ្មីៗនេះ ប្រធានាធិបតីចិន ឯកឧត្តម ស៊ី ជីនពីង បានមានប្រសាសន៍ ថា កម្ពុជា-ចិន គឺជាមិត្តដែកថែប ដែលកសាងឡើង ដោយភាពស្មោះត្រង់រវាង មិត្តនិងមិត្ត ។
ជាមួយនេះដែរ លោកជំទាវកិត្តិសង្គហបណ្ឌិត ម៉ែន សំអន បានជំរាបជូនឯកអគ្គរដ្ឋទូតចិនថា៖ ក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានអនុវត្តយ៉ាងល្អប្រសើរ ទៅនឹងអនុស្សារណៈដែលបានចុះហត្ថលេខារួចហើយជាមួយអធិការកិច្ចចិនកន្លងមក ហើយនៅពេលខាងមុខដ៏ខ្លីនេះ ក្រសួងត្រៀមរៀបចំទទួលប្រតិភូអធិការកិច្ចរបស់ប្រទេសចិន ដែលមកទស្សនកិច្ចនៅកម្ពុជា ហើយទស្សនកិច្ចនេះ លោកជំទាវឧបនាយករដ្ឋមន្ត្រីយល់ឃើញថា នឹងនាំមកនូវកិច្ចសហប្រតិបត្តិការថ្មីៗបន្ថែមទៀត លើវិស័យអធិការកិច្ចរវាងប្រទេសទាំងពីរ ។
ក្នុងនាមសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា លោកជំទាវកិតិ្តសង្គហបណ្ឌិត ម៉ែន សំអន បានថ្លែងអំណរគុណជូនចំពោះប្រជាជន រដ្ឋាភិបាលចិនផងដែរ ដែលតែងតែគាំទ្រកម្ពុជារហូតមក និងសូមជូនពរឲ្យឯកឧត្តម បានទទួលជោគជ័យ នៃបេសកកម្មថ្មីថែមទៀត៕