ក្រុមហ៊ុនចិនចំនួន៤ គ្រោងវិនិយោគទឹកប្រាក់ជិត៣០លានដុល្លារអាមេរិក ដើម្បីបង្កើតរោងចក្រផលិតក្តារប៉ាកេ ក្តារបន្ទះ និងគ្រឿងសង្ហារិម និងគម្រោងបង្កើតរោងចក្រផលិតកាបូប និងវ៉ាលិស នៅតំបន់សេដ្ឋកិច្ចពិសេស ក្រុងព្រះសីហនុ។
យោងតាមសេចក្តីប្រកាសព័ត៌មាន ក្រុមប្រឹក្សាអភិវឌ្ឍន៍កម្ពុជា (CDC) ដែលភ្នាក់ងារព័ត៌មានBTV ទើបទទួលបាន នាព្រឹកថ្ងៃទី២៤ តុលានេះ បានបង្ហាញឲ្យដឹងថា តាមសំណើសុំវិនិយោគរបស់ក្រុមហ៊ុនអភិវឌ្ឍន៍ឯកជន គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រ ចុះបញ្ជីជាស្ថាពរ ជូនដល់ក្រុមហ៊ុនវិនិយោគ លើគម្រោងបង្កើតរោងចក្រផលិតក្តារប៉ាកេ ក្តារបន្ទះ គ្រឿងសង្ហារិម និងគម្រោងបង្កើតរោងចក្រផលិតកាបូប និងវ៉ាលិស ផ្សេងៗគ្នា នៅតំបន់សេដ្ឋកិច្ចពិសេសក្រុងព្រះសីហនុ ក្នុងខេត្តព្រះសីហនុ ដែលត្រូវការកម្លាំងពលកម្មថ្មី បម្រើការងារក្នុងវិស័យនេះ ប្រមាណជាង១២០០កន្លែង។
ក្រុមហ៊ុនដែលទទួលបានវិញ្ញាបនបត្រ ចុះបញ្ជីជាស្ថាពរ នៅលើគម្រោងវិនិយោគនេះ ក្នុងនោះក្រុមហ៊ុនចំនួន៣ រួមមានក្រុមហ៊ុន “INVISTA DECOR CO.,LTD” ក្រុមហ៊ុន “CAMBODIAN TROPIC FLOORING CO.,LTD” និងក្រុមហ៊ុន “COUGAR WOOD INDUSTRY CO.,LTD” គ្រោងបង្កើតរោងចក្រផលិតក្តារប៉ាកេ ក្តារបន្ទះ និងគ្រឿងសង្ហារឹម មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ ខេត្តព្រះសីហនុ ដោយមានទុនវិនិយោគសរុបចំនួនជិត២៣លានដុល្លារអាមេរិក និងត្រូវការកំលាំងពលកម្មថ្មី សម្រាប់ធ្វើការក្នុងវិស័យនេះ ជិត ១ពាន់កន្លែង។
ចំណែកក្រុមហ៊ុន “GLORY ALLIANCE (CAMBODIA) CO.,LTD” គ្រោងបង្កើតរោងចក្រផលិត កាបូប និងវ៉ាលិស មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ ខេត្តព្រះសីហនុដូចគ្នា ក្រុមហ៊ុននេះមានទុនវិនិយោគប្រមាណ ៥,៦៤លានដុល្លារអាមេរិក និងអាចបង្កើតការងារបានចំនួន៣៨០កន្លែងផងដែរ៕
