ឯកឧត្តម ខូយ រីដា អភិបាលខេត្តពោធិ៍សាត់ និងជាប្រធានគណៈបញ្ជាការឯកភាពរដ្ឋបាលខេត្ត នារសៀលថ្ងៃទី១៩ ខែកញ្ញា ឆ្នាំ២០២៥នេះ នៅសាលប្រជុំធំថ្មីសាលាខេត្ត បានដឹកនាំកិច្ចប្រជុំគណៈបញ្ជាការឯកភាពខេត្ត ដោយផ្តោតសំខាន់ លើកិច្ចការងារពង្រឹងសន្ដិសុខ សណ្ដាប់ធ្នាប់សាធារណៈ និងសុវត្ថិភាព ក្នុងភូមិសាស្ដ្រខេត្តពោធិ៍សាត់ ជូនប្រជាពលរដ្ឋឱ្យបានល្អប្រសើរ ពិសេសក្នុងឱកាសបុណ្យកាន់បិណ្ឌ និងភ្ជុំបិណ្ឌ។
ឯកឧត្តម ខូយ រីដា បានថ្លែងការកោតសរសើរ និងវាយតម្លៃខ្ពស់ ចំពោះគណៈបញ្ជាការឯកភាពរដ្ឋបាលខេត្ត និងគណៈបញ្ជាការឯកភាពរដ្ឋបាលក្រុង ស្រុក ព្រមទាំងអាជ្ញាធរមូលដ្ឋាន ដែលកន្លងមកបានយកចិត្តទុកដាក់ខិតខំប្រឹងប្រែង បំពេញការងារប្រកបដោយការទួលខុសត្រូវខ្ពស់ និងទទួលបានលទ្ធផលល្អប្រសើរ ជាពិសេសការបង្កើនប្រសិទ្ធភាពការងារ ក្នុងការផ្តល់សេវាសាធារណៈ ជូនដល់ប្រជាពលរដ្ឋប្រកបដោយសមធម៌ យុត្តិធម៌ តម្លាភាព និងដោះស្រាយបញ្ហាដែលកើតមានឡើង ក៏ដូចជាសំណូមពរនានារបស់ប្រជាជន ស្របទៅនឹងគោលនយោបាយ របស់រាជរដ្ឋាភិបាល។
ឯកឧត្តមបានមានប្រសាសន៍ជម្រុញ និងលើកទឹកចិត្ត ដល់អាជ្ញាធរ និងកងកម្លាំងមានសមត្ថកិច្ចគ្រប់លំដាប់ថ្នាក់ ត្រូវបង្កើនការខិតខំប្រឹងប្រែង យកចិត្តទុកដាក់ បន្តលើការងារថែរក្សាសន្តិសុខ សណ្តាប់ធ្នាប់សង្គម និងពង្រឹងការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព។
ជាមួយគ្នានោះ ឯកឧត្តមបានណែនាំដល់រដ្ឋបាលក្រុងស្រុក មន្ទីរអង្គភាព ត្រូវរៀបចំសម្អាត និងធ្វើការផ្លាស់ប្តូរ រូបសម្តេច ឬរូបឥស្សរជនសំខាន់ៗ ដែលចាស់រហែក ដោយត្រូវដាក់ជំនួសរូបថ្មីវិញ។ ចំពោះបញ្ហាសន្តិសុខ សណ្តាប់ធ្នាប់សាធារណៈ គ្រឿងញៀន និងអនាម័យបរិស្ថាន ត្រូវតែបង្ក្រាប និងធ្វើឱ្យបានស្អាតល្អ ដោយត្រូវដាក់សារបន្ទាន់មួយ ដល់រដ្ឋបាលឃុំសង្កាត់ ក្រោយពីកិច្ចប្រជុំនេះ។
ឯកឧត្តម ខូយ រីដា បានគូសបញ្ជាក់ ផ្អែកលើរបាយការណ៍ពីថ្នាក់ជាតិ បានឱ្យដឹងថា មានទីតាំងល្បែងស៊ីសងយូគី និងឡូតូ ក្នុងមូលដ្ឋានក្រុងពោធិ៍សាត់ ត្រង់ចំណុចនេះត្រូវបន្តទប់ស្កាត់ និងបង្ក្រាបជាបន្ទាន់។ លោកបានបន្ថែមថា ដោយស្ថានភាពព្រំដែនមិនអំណោយផល សម្រាប់ពិធីបុណ្យអំទូកឆ្នាំនេះ រដ្ឋបាលខេត្តពោធិ៍សាត់ មិនបានប្រារព្ធនោះទេ ពោលចំពោះមន្ទីរអង្គភាព ឬវត្តអារាមណា ដែលចង់ប្រារព្ធ ឬប្រណាំងគ្នាលេង អាចបើកឱ្យលេងបានជាធម្មតា។
ឯកឧត្តមក៏សូមស្នើដល់មន្ទីរកសិកម្ម រុក្ខាប្រមាញ់ និងនេសាទខេត្ត ត្រូវបន្តចុះពិនិត្យតាមដាន ការងារបង្កបង្កើនផលស្រូវ របស់កសិករយើង។ ដោយឡែកកងកម្លាំងប្រដាប់អាវុធទាំងបីប្រភេទ ត្រូវត្រៀមកម្លាំងអន្តរាគមន៍ និងត្រៀមប្រុងជើងការ ឱ្យបានជាប់ជាប្រចាំ៕
