ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទនិងកសិកម្ម(ARDB) នាព្រឹកថ្ងៃទី៩ ខែវិច្ឆិកា ឆ្នាំ២០២៥នេះ បានអញ្ជើញជួបសំណេះសំណាលជាមួយលោកគ្រូ អ្នកគ្រូ សិស្សានុសិស្សថ្នាក់ទី១២ នៃវិទ្យាល័យ ហ៊ុន សែន ខ្សាច់កណ្តាល វិទ្យាល័យ ហ៊ុន សែន ROTA ខ្សាច់កណ្តាល និងវិទ្យាល័យ ពុកឫស្សី ខ្សាច់កណ្តាល ព្រមទាំងសិស្សនិទ្ទេស A ២៣ នាក់ ដែលប្រព្រឹត្តិទៅនៅទីស្នាក់ការគណបក្សប្រជាជនស្រុកខ្សាច់កណ្តាល។
ពិធីនេះក៏មានការចូលរួមពីក្រុមការងារចលនាយុវជនថ្នាក់កណ្ដាល គណៈអភិបាលស្រុក សហភាពសហព័ន្ធយុវជនកម្ពុជា(សសយក) លោកនាយក នាយករង លោកគ្រូ អ្នកគ្រូបង្រៀនថ្នាក់ទី១២ សិស្សានុសិស្សថ្នាក់ទី១២ និងសិស្សនិទ្ទេស A សរុបប្រមាណជាង ១ ០០០ នាក់។
ថ្លែងនាឱកាសនោះឯកឧត្តមបណ្ឌិត កៅ ថាច បានមានប្រសាសន៍ជំ រុញលើកទឹកចិត្តដល់សិស្សានុសិស្សទាំងអស់ថា ការសិក្សា គឺជាការផ្តល់អំណាចដល់ខ្លួនឯង ដូច្នេះត្រូវមានសេចក្តីស្រលាញ់និងឱ្យតម្លៃខ្ពស់លើការសិក្សា ទើបមានអនាគតដ៏ត្រចះត្រចង់។ គ្មាននរម្នាក់កេីតវេចសម្ពាយចណេះដឹងមកជាមួយទេ ពោលគឺចំណេះដឹងកេីតមានដោយខិតខំរៀនសូត្រ និងសន្សំបន្តិចម្តងៗក្នុងរយៈពេលយូរ ហេីយក៏បានចែករំលែកនូវបទពិសោធន៍នៃការរៀនសូត្រ ក៏ដូចជាគន្លឹះនៃការសម្រេចបាននូវវិជ្ជាជីវៈដែលខ្លួនស្រលាញ់ពេញចិត្ត។
លើសពីនេះឯកឧត្តមក៏បានណែនាំនូវវិធីសាស្រ្តសិក្សាមួយចំនួនដល់សិស្សានុសិស្សដែលមានដូចជា៖ ត្រូវប្រឹងប្រែងរៀនសូត្រឱ្យបានខ្លាំង លះបង់ពេលវេលាកម្សាន្តខ្លះហើយងាកមកពង្រឹងលើការសិក្សា «ការសិក្សាគឺជាដំណើរការដ៏វែងឆ្ងាយនិងប្រកបដោយការឈឺចាប់» ហេតុដូច្នេះសិស្សានុសិស្សត្រូវមានភាពអំណត់អត់ធន់ខ្ពស់ ការលះបង់ខ្ពស់ ត្រូវមានភាពក្លាហានក្នុងការសិក្សាហ៊ាន សួរលោកគ្រូ អ្នកគ្រូ នូវអ្វីដែលខ្លួនមានភាពស្រពិចស្រពិលដូចសុភាសិតខ្មែរបាន លើកឡើងថា «ចង់ចេះឱ្យសម្លាប់អាចារ្យ ចង់បានផ្លែផ្កាឱ្យយកភ្លើងដុតគល់» និងចុងក្រោយផ្តាំផ្ញេីថា ត្រូវ៖(១) ជឿជាក់លេីខ្លួនឯង, (២) រៀនអោយខ្លាំងជាប់ជារាងរាល់ថ្ងៃ និង(៣)កុំបោះបង់ការសិក្សា ហេីយសិក្សាដោយអនុវត្តតាមពុទ្ធោវាទរបស់ព្រះសមាសាមពុទ្ធនៃយេីងគឺ សុ.ចិ.បុ.លិ. ដែលជាអភិក្រម៤ សម្រាប់អ្នករៀនបានសេចក្ដីថា អ្នករៀនត្រូវប្រកបដោយអង្គ ៤ គឺ ស្ដាប់, គិត, សួរ, និងកត់ត្រាទុក ទើបអាចក្លាយជាអ្នកចេះគ្រប់គ្រាន់បាន។
ការខិតខំប្រឹងប្រែងសិក្សារៀនសូត្រ ផ្តល់ឱ្យក្មួយៗ (១)មានសិទ្ធិសេរីភាពក្នុងការជ្រើសរើសការងារឬវិជ្ជាជីវៈដែលប្អូនចង់ធ្វេី (២) មានសមត្ថភាពអាចជួយអ្នកដទៃបាន និង (៣)ផ្តល់ឱ្យក្មួយៗរស់នៅប្រកបដោយឥស្សរភាព និងជឿជាក់លេីខ្លួនឯង។ អ្វីដែលមិនភ្លេចលោកក៏បានកោតសរសើរចំពោះលោកគ្រូ អ្នកគ្រូ ដែលជាម៉ាស៊ីនដ៏អស្ចារ្យក្នុងការផ្ទេរចំណេះដឹង ជំនាញក្នុងការកសាងមូលធនមនុស្សដ៏មានគុណភាព និងជំរុញធ្វើយ៉ាងណាបង្កើននូវចំនួនសិស្សនិទ្ទេសAឱ្យបានច្រើនសម្រាប់ឆ្នាំសិក្សា២០២៥-២០២៦នេះ។
ក្នុងឱកាសនោះសិស្សនិទ្ទេសA ចំនួន ៣រូប ក៏បានឡើងចែករំលែកគន្លឹះសំខាន់ៗនៃការរៀនសូត្រដែលនាំឱ្យខ្លួនទទួលបានពិន្ទុ និងនិទ្ទេសល្អជូនដល់គណៈអធិបតីនិងសិស្សប្អូនដែរ មានកត្តាចំនួនបីធំៗដូចជា៖ ១. កត្តាខ្លួនឯង ២. កត្តាគ្រួសារ ៣. កត្តាគ្រូ។ ពិសេសបំផុតសម្រាប់កត្តាខ្លួនឯង គឺសិស្សានុសិស្សត្រូវតែពង្រឹងការគ្រប់គ្រងពេលវេលា សម្រាប់រៀននិងសម្រាប់កម្សាន្តឱ្យបានត្រឹមត្រូវ ស្វ័យសិក្សាជាប្រចាំ និងយកចិត្តទុកដាក់លើបញ្ហាសុខភាព ហូបស្អាត ញាំអាហារដែលនាំឱ្យមានសុខភាពល្អ គេងឱ្យគ្រប់គ្រាន់ ហាត់ប្រាណជាប្រចាំ និងចៀសឱ្យផុតពីគ្រឿងញៀនផ្សេងៗ។
ដើម្បីជាការលើកទឹកចិត្តនិងអរគុណដល់ការខិតខំប្រឹងប្រែងរៀនសូត្រនិងការបង្រៀនឯកឧត្តម បណ្ឌិត កៅ ថាច ក៏បានផ្តល់ប្រាក់ឧបត្ថម្ភដល់សិស្សានុសិស្ស ក៏ដូចជាលោកគ្រូ អ្នកគ្រូ លោកនាយកទាំងបីវិទ្យាល័យផងដែរ ។ មិនតែប៉ុណ្ណោះ ឯកឧត្តមក៏ទទួលយកការស្នើសុំពីឯកឧត្តម ប៉ែន បូណា ដែលជានាយកវិទ្យាល័យចំណេះទូទៅ និងបច្ចេកទេស ហ៊ុន សែន រ៉ូតា ខ្សាច់កណ្ដាល អំពី ការបង្រៀនបំប៉នបន្ថែមម៉ោងដល់សិស្សថ្នាក់ទី១២ ព្រោះវាពិតជាមានគុណប្រយោជន៍ដ៏សំខាន់សម្រាប់ប្រទេសជាតិតាមរយៈការវិនិយោគក្នុងការកសាងមូលធនមនុស្សសម្រាប់សង្គមជាតិ។
ជាចុងបញ្ចប់ឯកឧត្តមបណ្ឌិត កៅ ថាច ក៏បានពាំនាំបណ្តាំផ្ញើសួរសុខទុក្ខពីសំណាក់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈពង្រឹងមូលដ្ឋានក្រុងអរិយក្សត្រ ស្រុកខ្សាច់កណ្តាល ស្រុកមុខកំពូល ស្រុកកៀនស្វាយ ស្រុកល្វាឯម និងស្រុកពញ្ញាឮដល់អង្គពិធីផងដែរ៕
