(ភ្នំពេញ)៖ ក្នុងសន្និបាតគណបក្សប្រជាជនកម្ពុជា នៅថ្ងៃទី២ ត្រូវនឹងថ្ងៃទី១៩ ខែធ្នូ ឆ្នាំ២០១៨ សម្តេចតេជោ ហ៊ុន សែន បានចេញបញ្ជាឲ្យអគ្គិសនីកម្ពុជា ចុះតបណ្តាញអគ្គិសនី ចូលតាមតូបលក់ដូរ នីមួយៗ នៅក្នុងផ្សារនៅទូទាំងរាជធានីភ្នំពេញ និងបន្តទៅទូទាំងប្រទេស ដោយបញ្ចុះតម្លៃ ទៅតាមតម្លៃរដ្ឋ។ បទបញ្ជារបស់ប្រមុខរាជរដ្ឋាភិបាលដូច្នេះ ដើម្បីប្រជាពលរដ្ឋទាំងអស់ ទទួលបានអត្ថប្រយោជន៍ដូចៗគ្នា។
បទបញ្ជារបស់សម្តេចតេជោ ហ៊ុន សែន ខាងលើនេះ ត្រូវបានបញ្ជាក់ តាមរយៈលោក ហ៊ុយ វណ្ណៈ រដ្ឋលេខាធិការក្រសួងមហាផ្ទៃ និងជាសមាជិកគណៈកម្មាធិការកណ្តាលគណបក្សប្រជាជនកម្ពុជា ដែលលោកបានចូលរួមក្នុងសន្និបាតគណបក្សរយៈពេល ៣ ថ្ងៃ ចាប់ពីថ្ងៃទី១៨-២០ ខែធ្នូ ឆ្នាំ២០១៨ នៅមជ្ឈមណ្ឌលកោះពេជ្រ ក្នុងរាជធានីភ្នំពេញ។
ជាមួយគ្នានោះ សម្ដេចតេជោ ហ៊ុន សែន នាយករដ្ឋមន្ត្រី ក៏បានបញ្ជាក់ថា ថ្លៃប្រើប្រាស់អគ្គិសនី នឹងត្រូវបញ្ចុះ សម្រាប់ពលរដ្ឋនៅទូទាំងប្រទេស ចាប់ពីដើមឆ្នាំ២០១៩តទៅ។ ក្នុងនោះ នៅតាមផ្សារ ក៏ត្រូវចុះថ្លៃដូចគ្នាផងដែរ។
សម្តេចតេជោ ហ៊ុន សែន បានលើកឡើងថា ពលរដ្ឋដែលប្រើប្រាស់អគ្គិសនី នៅតាមផ្ទះ ចាប់ពី ១ ទៅ ១០គីឡូវ៉ាត់ ដែលបច្ចុប្បន្ន ថ្លៃ ៤៨០រៀល នឹងត្រូវបញ្ចុះមកនៅត្រឹម ៣៨០ រៀល នៅឆ្នាំ២០១៩។ ចំពោះពលរដ្ឋ ដែលប្រើប្រាស់ពី ១១ គីឡូវ៉ាត់ដល់ ៥០គីឡូវ៉ា ត់នឹងត្រូវបញ្ចុះពី៦១០ រៀល មកត្រឹម ៤៨០រៀល ក្នុង ១គីឡូវ៉ាត់ម៉ោង។ ចំពោះអ្នកប្រើប្រាស់ចាប់ពី ៥១ ដល់ ២០០ គីឡូវ៉ាត់ បច្ចុប្បន្ន ៧៧០ រៀល នៅភ្នំពេញ និងតាមខេត្ត ៧២០រៀល នឹងចុះត្រឹម ៦១០ រៀល ក្នុង ១គីឡូវ៉ាត់ម៉ោង។ ចំពោះអ្នកប្រើប្រាស់លើសពី ២០០គីឡូវ៉ាត់ម៉ោង នឹងត្រូវចុះមកនៅត្រឹម ៧៤០រៀល ក្នុង ១គីឡូវ៉ាត់ម៉ោង នៅឆ្នាំ២០១៩ និង ៧៣០ រៀល នៅឆ្នាំ២០២០។
សូមរម្លឹកថា ក្នុងរយៈកាលកន្លងមក សម្តេចតេជោ ហ៊ុន សែន ក៏បានបញ្ជាឲ្យមន្ត្រីអគ្គិសនីកម្ពុជា តបណ្តាញអគ្គិសនី ចូលបន្ទប់ជួល និងផ្ទះជួលទាំងអស់ នៅភ្នំពេញ និងនៅទូទាំងប្រទេស ដោយគិតថ្លៃ តាមថ្លៃអគ្គិសនីរដ្ឋ។ កត្តានេះ នាំឲ្យកម្មករកាត់ដេរ និងអ្នកជួលផ្ទះ អាចសន្សំបានថវិកាមួយចំនួន សម្រាប់ដោះស្រាយជីវភាពផងដែរ៕