ភ្នំពេញ ថ្ងៃទី១៨ ខែតុលា ឆ្នាំ២០១៦–សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានផ្តល់អនុសាសន៍ល្អៗ ឱ្យប្រតិភូនាវាយុវជនកម្ពុជា២៩នាក់ ដែលនឹងចេញ ដំណើរទៅចូលរួមកម្មវិធីនាវាយុវជនអាស៊ានជប៉ុន ត្រូវរក្សាឱ្យបាននូវកិត្តិយស និងកេរ្តិ៍ឈ្មោះប្រទេសរបស់ជាតិ។
ក្នុងជំនួបដែលធ្វើនៅវិមានសន្តិភាព នារសៀលថ្ងៃទី១៧តុលានេះ លោក ស៊ាន សុលក្ខណ៍ ប្រធានក្រុមនាវា យុវជនអាស៊ីអាគ្នេយ៍កម្ពុជាបានគោរពរាយការណ៍ ជូនសម្តេចតេជោ នាយករដ្ឋមន្ត្រីថា ប្រតិភូនា កម្ពុជាដែល នឹងត្រូវ ចូលរួមក្នុងកម្មវិធី នាវា យុវជនអាស៊ីអាគ្នេយ៍ និងជប៉ុនលើកទី៤៣មានយុវជនចំនួន ២៩នាក់។ ប្រតិភូ យុវជនកម្ពុជា និងធ្វើដំណើររយៈពេល៥២ថ្ងៃចាប់តាំងពីថ្ងៃទី ២៥តុលា ដល់ថ្ងៃទី ១៥ ធ្នូឆ្នាំ ២០១៦។
កម្មវិធី នេះធ្វើឡើងក្នុងគោលបំណងការបង្កើតមិត្តភាព សាមគ្គីភាព និងការយោគយល់គ្នារវាង យុវជនអាស៊ាន និងយុវជនជប៉ុន, លើកកម្ពស់ស្មារតីនៃកិច្ចសហប្រតិបត្តិការអន្តរជាតិ, ពង្រីក ទស្សនាទាននានារបស់យុវជន លើកិច្ចតំបន់ និងពិភពលោក។ តាមរយៈកម្មវិធីនេះតាមរយៈកម្មវិធីនេះ យុវជននឹងអាចអភិវឌ្ឍន៍ខ្លួនឯងបង្កើត បណ្តាញទំនាក់ទំនង និងពង្រឹងភាពជា អ្នកដឹកនាំ ដើម្បីរួមចំណែកដល់ការកសាងនិងអភិវឌ្ឍន៍សង្គម។
កម្មវិធីនាវាយុវជនអាស៊ីអាគ្នេយ៍ លើកទី៤៣នេះ ប្រតិភូយុវជនទាំង១១ប្រទេសនឹងធ្វើដំណើរទៅជួបជុំគ្នា នៅប្រទេសជប៉ុន បន្ទាប់មកធ្វើដំណើរតាមនាវា ដោយមានកម្មវិធីជាច្រើនឆ្លងកាត់ ប្រទេសអាស៊ានដូចជា វៀតណាម សិង្ហបុរី ឥណ្ឌូនេស៊ី និងត្រលប់ទៅបញ្ចប់កម្មវិធីវិញនៅប្រទេសជប៉ុន។
សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានសំដែងការអបអរសារទរ និង មោទនភាព ចំពោះយុវជនកម្ពុជា ដែលបានសម្រេចជ្រើសរើសនិងការចូលរួមរបស់យុវជន ក្នុងកម្មវិធីនាវា យុវជនអាស៊ីអាគ្នេយ៍ជប៉ុន។សម្តេចតេជោបានបញ្ជាក់ អំពីមូលហេតុដែលកម្ពុជាចូលជាសមាជិក អាស៊ាន រួមមាន ទី១ ដោយសារគោលការណ៍មិនជ្រៀតជ្រែកកិច្ចការងារផ្ទៃក្នុង,ទី២ ស្មារតីសហគមន៍មានន័យថា សមាជិកអាស៊ានទាំងអស់មាន ភាពស្នើភាពនិងស្មើសិទ្ធ ទី៣ ការជំរុញកំណើនសេដ្ឋកិច្ច និងការកសាងសង្គម ដែលយើងអាច ទាញបានអំពីសមាគមន៍អាស៊ាននេះ និងចំណុចទី៤ ដែលជាកត្តាសំខាន់ គឺច្រកការទូតរបស់ កម្ពុជាយើងទៅកាន់បរទេស។ជាមួយគ្នានេះដែលសម្តេច តេជោ នាយករដ្ឋមន្ត្រី ក៏បានផ្តល់អនុសាសន៍ដល់ យុវជនកម្ពុជា ត្រូវកសាងស្នាដៃជាយុវជនគំរូដើម្បីកិត្តិយស និងកេរ្តិ៍ឈ្មោះសម្រាប់ប្រទេសជាតិរបស់យើង ជាពិសេស ត្រូវពង្រឹងកសាងទំនាក់ទំនង សាមគ្គីភាព មិត្តភាព ជាមួយយុវជនដូចគ្នាក្នុងតំបន់អាស៊ាន និង ជប៉ុន ផងដែរ៕
