ថ្នាក់ដឹកនាំក្រុមហ៊ុន OCIC បានមានប្រសាសន៍ឲ្យដឹងថា ក្រុមហ៊ុនពិតជានឹងសាងសង់គំរោងទីក្រុងរណបថ្មីមួយ ស្ថិតនៅតាមដងទន្លេរដោយចាកចេញពីតំបន់កោះនរា ទៅកាន់ស្រុកកៀនស្វាយក្នុងខេត្តកណ្តាល។
អគ្គនាយករងក្រុមហ៊ុន OCIC លោក ទូច សំណាង បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី៨ កុម្ភៈនេះថា បច្ចុប្បន្នក្រុមហ៊ុនកំពុងរៀបចំនិតិវិធីច្បាប់ ដើម្បីស្នើសុំពីរដ្ឋាភិបាលលើគំរោងអភិវឌ្ឍន៍នេះ។ ទោះជាយ៉ាងណាលោកមិនទាន់បញ្ជាក់ឲ្យដឹងពីទុនវិនិយោគលើគំរោងនេះចំនួនប៉ុន្មាន និងចាប់ផ្តើមសាងសង់នៅពេលណានៅឡើយទេ។
លោកបន្តថា “ខ្ញុំអាចបញ្ជាក់បានថាគំរោងនេះពិតជាធ្វើមែនទែន ហើយទំហំផ្ទៃដីនៃទីក្រុងថ្មីនេះមានទំហំជាង១០០ហិកតា”។ លោកបន្តថា “គំរោងនេះនឹងត្រូវរៀបចំអភិវឌ្ឍន៍ដូចទីក្រុងកោះពេជ្រនាពេលបច្ចុប្បន្ននេះ”។
គំរោងទីក្រុងរណបថ្មីនេះ នឹងត្រូវចាក់ខ្សាច់បំពេញនៅតាមជួរមាត់ទន្លេចាប់ពីតំបន់កោះនរា អូសស្របតាមទន្លេតូចឆ្ពោះទៅស្រុកកៀនស្វាយ ខេត្តកណ្តាល។
អ្នកនាំពាក្រសួងរៀបចំដែនដី នគរូបនីយកម្ម និងសំណង់ ឯកឧត្តម សេង ឡូតបានមានប្រសាសន៍ថា ឯកឧត្តមមិនទាន់បានឃើញឯកសារដាក់សំណើរពីក្រុមហ៊ុនមកនៅឡើយទេ ប៉ុន្តែឯកឧត្តមអះអាងថា សម័យបច្ចេកវិទ្យារីកចំរើនបែបនេះ ការសាងសង់ទីក្រុងនៅតាមមាត់ទន្លេបែបនេះ មិនមានអ្វីដែលធ្វើមិនបាននោះទេ សូម្បីតែភ្នំគេអាចចោះដើម្បីធ្វើផ្លូវឆ្លងកាត់បាន៕
