អ្នកនាំពាក្យក្រសួងសាធារណៈការ និងដឹកជញ្ជូន ឯកឧត្តម វ៉ា ស៊ីមសូរិយា បានឱ្យដឹងថា ការសាងសង់ស្ពានមិត្តភាពកម្ពុជា-ចិនស្ទឹងត្រង់ ក្រូចឆ្មារ នាពេលនេះ ហាក់លឿនហួសពីផែនការបន្តិច ។
ឯកឧត្តមបន្តថា ការសាងសង់ ស្ពានមិត្តភាពកម្ពុជា-ចិនស្ទឹងត្រង់ ក្រូចឆ្មារ រហូតមកដល់ពេលនេះ គឺសម្រេចបានប្រមាណជា ៣៣. ៣ភាគរយ ដោយសារតែក្រុមជាងកំពុងសម្រុកធ្វើយ៉ាងសកម្ម បើតាមផែនការមកដល់ពេលនេះ វាអាចត្រឹមតែ ២៣ភាគរយប៉ុណ្ណោះ ។
ឯកឧត្តមបន្តថា “ជួនកាលវាអាចលឿនតែដំបូងចឹង តែនៅពេលបន្តបន្ទាប់ទៀតវាយឺតវិញក៏ថាបានដែរ។ ខ្ញុំមិនហ៊ានថាយ៉ាងមិចដែរ តែនៅពេលសាងសង់ចប់គឺចប់ហើយ យ៉ាងណាក៏ដោយបើតាមផែនការស្ពាននេះ គ្រោងបញ្ចប់នៅក្នុងឆ្នាំ២០២១ខាងមុនេះ” ។
សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា កាលថ្ងៃទី០៩ ខែកុម្ភៈ ឆ្នាំ២០១៨នេះ បានអញ្ជើញបើកការដ្ឋានសាងសង់នូវ «ស្ពានមិត្តភាពកម្ពុជា-ចិនស្ទឹងត្រង់ ក្រូចឆ្មារ» នេះ ដែលជាស្ពានឆ្លងកាត់ទន្លេមេគង្គថ្មីមួយទៀតតភ្ជាប់ទឹកដីនៃខេត្តកំពង់ចាម ទៅកាន់ទឹកដីនៃខេត្តត្បូងឃ្មុំ ។
ស្ពានដែលបានកំពុងសាងសង់នេះគឺចាប់ផ្តើមពីត្រើយខាងលិចស្ថិតនៅត្រង់ចំណុចភូមិបឹងដែង ឃុំព្រែកកក់ ស្រុកស្ទឹងត្រង់ ខេត្តកំពង់ចាម ឆ្លងកាត់ទន្លេមេគង្គ ទៅត្រើយខាងកើត ស្ថិតនៅភូមិក្តុលលើ ឃុំទ្រា ស្រុកក្រូចឆ្មារ ខេត្តត្បូងឃ្មុំ ស្ពាននេះមានប្រវែងសរុប ១,១៣១ម៉ែត្រ និងទទឹង ១៣,៥០ម៉ែត្រ ជាប្រភេទស្ពានបេតុងសរសៃដែក។
តាមគម្រោងស្ពាននេះ នឹងត្រូវចំណាយគ្រោងចំណាយថវិកាចំនួន ៥៦,៩៩៨លានដុល្លារអាមេរិក ជាហិរញ្ញប្បទានសម្បទានពីរដ្ឋាភិបាលចិន រួមជាមួយថវិកាបដិភាគ របស់រាជរដ្ឋាភិបាលកម្ពុជា សម្រាប់ដោះស្រាយផលប៉ះពាល់ និងបោសសម្អាតយុទ្ធភណ្ឌមិនទាន់ផ្ទុះ៕
