ភ្នំពេញ៖ បន្ទាប់ពីលោក សម រង្ស៊ី អំពាវនាវឲ្យកសិករខ្មែរងើបឡង ដើម្បីប្រឆាំងទៅនឹង សម្ដេចតេជោ ហ៊ុន សែន នាយករដ្ឋមន្ដ្រីកម្ពុជា អ្នកនាំពាក្យគណបក្សប្រជាជនកម្ពុជា ឯកឧត្តម សុខ ឥសាន បានតបទៅវិញទៅថា ប្រជាពលរដ្ឋ និងប្រជាកសិករខ្មែរ គ្មានអ្នកណាម្នាក់ជឿទៅលើ ការញុះញង់របស់លោក សម រង្ស៊ី ឡើយ ។
លោក សម រង្ស៊ី បានជំរុញ និងញុះញង់ដុតកំហឹងប្រជាកសិករឲ្យបះបោរប្រឆាំង ទៅនឹងរាជរដ្ឋាភិបាលកម្ពុជា ដើម្បីរំដោះខ្លួនចេញពីការ ជំពាក់បំណុលធនាគារ ឬមីក្រូហិរញ្ញវត្ថុ ដោយសារមិនអាចជួយ ជីវភាពកសិករឲ្យល្អប្រសើរ។
ឯកឧត្តម សុខ ឥសាន បានសរសេរក្នុងតេឡេក្រាម នៅថ្ងៃទី៦ ខែកុម្ភៈ ឆ្នាំ២០១៩ថា ការញុះញង់របស់លោក សម រង្ស៊ីដើម្បីយកលេសពី តម្លៃកសិផលចុះថោក ដោយចង់ប្រើដៃ កសិករឲ្យងើបឡើង ផ្ដួលរំលំរាជរដ្ឋាភិបាល យកអំណាចឲ្យខ្លួនដោយ បោកបញ្ឆោតតែប៉ុណ្ណោះ។ លោកថា ជាមួយគ្នានេះ អ្នកវិភាគរត់ចោលស្រុក ក៏បានចូលរួមគាំទ្រគំនិតបំផ្លាញជាតិបំផ្លាញសន្តិភាព ស្ថិរភាពនយោបាយ និងសេចក្តីសុខរបស់ប្រជាជនខ្មែរ។
ឯកឧត្តមមានប្រសាសន៍ថា “ប៉ុន្តែឧបាយកលរបស់ពួកគេមិនទទួលបានការ គាំទ្រពីប្រជាពលរដ្ឋ និងប្រជាកសិករកម្ពុជាយើងឡើយ គ្មានប្រជាកសិករណាម្នាក់ជឿតាមការញុះញង់ របស់ពួករត់ចោលស្រុក ទាំងនេះជាដាច់ខាត”៕
