ដំណឹងល្អ៖ សម្តេចតេជោនឹងអញ្ជើញបើកការដ្ឋាន​សង់​ផ្លូវ​ល្បឿនលឿន​ភ្នំពេញ​ព្រះសីហនុ​នៅ​ថ្ងៃទី២២ មិនាខាងមុខនេះ


សម្តេច​អគ្គមហាសេនា​បតី​តេជោ​ហ៊ុន​ ​សែន​នាយក​រដ្ឋមន្រ្តី​នៃ​ព្រះរាជាណាចក្រ​កម្ពុជា​នឹង​អញ្ជើញ​ជា​អធិ​តី​ ​ក្នុង​ពិធី​បើក​ការដ្ឋាន​សាងសង់​ផ្លូវ​ល្បឿន​លឿន​ភ្នំពេញ​ ​ខេត្ត​ព្រះសីហនុ​នៅ​ថ្ងៃទី២២​ ​មិនា​ខាងមុខនេះ​ហើយ​។​

អ្នកនាំពាក្យ​ក្រសួងសាធារណការ​ ​និង​ដឹកជញ្ជូន​ ​ឯកឧត្តម ​វ៉ា​ ​ស៊ី​មសូរិ​យា ​បាន​មានប្រសាសន៍​ឲ្យដឹង​តាម​ទូរស័ព្ទ​នា​ព្រឹក​ថ្ងៃទី១​ ​មិនា​នេះ​ថា​ ​សម្តេច​តេជោ​បាន​កំណត់​ថ្ងៃ​បើក​ការដ្ឋាន​សាងសង់​ផ្លូវ​ល្បឿន​លឿន​ភ្នំពេញ​ ​ក្រុង​ព្រះសីហនុ​នៅ​ថ្ងៃទី២២ខាងមុខនេះ​ហើយ​។​ ​

បច្ចុប្បន្ន​ក្រុមការងារ​កំពុងតែ​ដុតដៃដុតជើង​ ​ដើម្បី​រៀបចំ​ការងារ​នេះ​ ​ប៉ុន្តែ​ការ​បើក​ការដ្ឋាន​នៅ​ទីតាំង​ណា​ ​​ឯកឧត្តម​មិនទាន់​អាច​បញ្ជាក់​បាន​នៅឡើយ​ទេ​។​​ឯកឧត្តមបន្ត​ថា​ ​“​ទាល់តែ​ក្រុមការងារ​ខុទ្ទកាល័យ​សម្តេច​ ​ទើប​អាច​ជ្រាប​ពី​រឿង​នេះ​ ​ប៉ុន្តែ​ពេលវេលា​ជាក់លាក់​គឺ​ថ្ងៃទី២២​ ​មិនា​ខាងមុខនេះ​ហើយ​”​។

​ផ្លូវ​ល្បឿន​លឿន​ភ្នំពេញ​ ​ក្រុង​ព្រះសីហនុ​មាន​ប្រវែង​ជាង១៩០គីឡូម៉ែត្រ​ ​ដែល​ចេញពី​ម្តុំ​ផ្លូវ​រទេះភ្លើង​ ​នៃ​តំបន់​ទំនប់​កប់​ស្រូវ​ ​ស្ថិតនៅ​ខាងស្តាំ​ដៃ​ផ្លូវជាតិ​លេខ៤​ ​និង​សាងសង់​ស្របគ្នា​នឹង​ផ្លូវជាតិ​នេះ​ ​រហូត​ជិតដល់​ទីរួមខេត្ត​កំពង់ស្ពឺ​ ​ទើប​ផ្លូវ​នេះ​ឆ្លងកាត់​ផ្លូវជាតិ​លេខ៤​ ​ងាក​មក​ខាងឆ្វេង​ដៃ​វិញ​ ​ហើយ​បន្ត​រហូតដល់​ស្រុក​ព្រៃនប់​ ​ទើប​ផ្លូវ​នេះ​ងាក​មក​ស្តាំ​ដៃ​ ​រហូតដល់​មាត់សមុទ្រ​នៃ​ក្រុង​ព្រះសីហនុ​។​

​ឯកឧត្តម វ៉ា​ស៊ី​ម​ ​សូ​រិយា​បាន​មានប្រសាសន៍​ឲ្យដឹង​ទៀត​ថា​ ​ផ្លូវ​ល្បឿន​លឿន​នេះ​នឹង​មានការ​ធ្វើ​របង​ជុំវិញ​ ​លើកលែងតែ​ចំណុច​ឆ្លងកាត់​មួយចំនួន​ដែល​មាន​ស្ពាន​អាកាស​ ​និង​ស្ថានីយ៍​ឈប់​សំចត​ ​ព្រោះ​វា​ជា​ផ្លូវ​លឿន​ដែល​អាច​បើកបរ​ក្នុង​ល្បឿន​ពី១២០ទៅ១៦០គីឡូម៉ែត្រ​ក្នុង​មួយ​ម៉ោង​ ​ហេតុនេះ​ទើប​ផ្លូវ​នេះ​ ​មិន​តម្រូវឲ្យ​មាន​ចំណុច​ឆ្លងកាត់​ច្រើន​នោះ​ទេ​៕​