ព្រឹកថ្ងៃចន្ទ ៥រោច ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៥ ខែមីនា ឆ្នាំ២០១៩ នៅបន្ទប់ប្រជុំរដ្ឋបាលខេត្ត ឯកឧត្តម ទៀ សីហា អភិបាល នៃគណៈអភិបាលខេត្ត បានអនុញ្ញាតអោយប្រតិភូអង្គការសហប្រជាជាតិដេីម្បីអភិវឌ្ឍឧស្សាហកម្ម（UNRIDO) ជួបពិភាក្សាដេីម្បីប្រឹក្សាយោបល់សម្រាប់ផ្តល់ធាតុចូលក្នុងការសិក្សា ស្តីពីការវិភាគស្ថានភាពខ្សែសង្វាក់ផលិតផលក្នុងស្រុក ក្នុងវិស័យទេសចរណ៍ ដោយមានការចូលរួមពីលោកនាយករដ្ឋបាលខេត្ត លោកប្រធានមន្ទីរទេសចរណ៍ខេត្ត លោកប្រធានមន្ទីរពាណិជ្ជកម្មខេត្ត លោកប្រធានមន្ទីរកសិកម្ម រុក្ខាប្រមាញ់ និងនេសាទខេត្ត លោកប្រធានមន្ទីរវ្បធម៌ និងវិចិត្រសិល្បៈខេត្ត លោកប្រធានមន្ទីរឧស្សាហកម្ម និងសិប្បកម្មខេត្ត និងលោកនាយកទីចាត់ការអន្តវិស័យសាលាខេត្ត។
ការជួបពិភាក្សានេះ ដេីម្បីសិក្សាស្វែងយល់ពីស្ថានភាពទូទៅ វឌ្ឍនភាព បំផុសគំនិតអន្តរាគមន៍ជាក់ស្តែង ក្នុងការពង្រឹងទំនាក់ទំនងរវាងឧស្សាហកម្មម្ហូបអាហារ ឧស្សាហកម្មច្នៃប្រឌិត ប្រកបដោយនិរន្តរភាព ក្នុងការរួមចំណែកធ្វេីឱ្យមានកំណេីនឡេីងនូវការផ្គត់ផ្គង់នូវផលិតផលក្នុងស្រុក ដូចជាត្រី សាច់ បន្លែ ផ្លែឈេី និងផលិតផលក្នុងស្រុកផ្សេងៗ ទៀត ដែលផលិតដោយកសិករខ្មែរយេីង និងរកនូវដំណោះស្រាយ បញ្ហាប្រឈមនានា ដែលពាក់ព័ន្ធនឹងការបង្កេីនការប្រេីប្រាស់ផលិតផលក្នុងស្រុក នៅខ្សែសង្វាក់តម្លៃទេសចរណ៍ ជាពិសេសនៅក្នុងផ្នែកកសិចំណីអាហារ និងឧស្សាហកម្មច្មៃប្រឌិត។
