រាជធានីភ្នំពេញ៖ ក្នុងគោលដៅកសាងសមត្ថភាពដើម្បីលើកកម្ពស់គុណភាពរៀន និងបង្រៀន ការធ្វើកំណែទម្រង់វិស័យអប់រំ ក៏ដូចជាលើកកម្ពស់ការធ្វើកិច្ចសហប្រតិបត្តិការលើវិស័យអប់រំ អគ្គនាយកដ្ឋានឧត្ដមសិក្សានៃក្រសួងអប់រំ យុវជន និងកីឡា និងសាកលវិទ្យាល័យអប់រំហុងកុង បានចុះហត្ថលេខាលើអនុស្សរណៈនៃការយោគយល់។
អនុស្សរណៈនេះត្រូវបានចុះហត្ថលេខាដោយឯកឧត្ដម ម៉ក់ ងយ អគ្គនាយកនៃអគ្គនាយកដ្ឋានឧត្ដមសិក្សា និងលោក Allan Walker ព្រឹទ្ធបុរសនៃមហាវិទ្យាល័យអភិវឌ្ឍការអប់រំ និងធនធានមនុស្សដែលជាតំណាងនៃសាកលវិទ្យាល័យអប់រំហុងកុង។ កម្មវិធីបានប្រព្រឹត្តទៅនាព្រឹកថ្ងៃអង្គារ ៤កើត ខែចេត្រ ឆ្នាំច សំរឹទ្ធិស័ក ព.ស.២៥៦២ នៅអគ្គនាយកដ្ឋានឧត្ដមសិក្សា ដោយក្នុងនោះក៏មានការចូលរួមពីសំណាក់គណៈគ្រប់គ្រងនៃគ្រឹះស្ថានឧត្ដមសិក្សានានាក្នុងព្រះរាជាណាចក្រកម្ពុជាផងដែរ៕
