សម្តេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា បានឲ្យដឹងថា ប្រជាជនកម្ពុជានាពេលបច្ចុប្បន្ននេះ កំពុងកើនឡើងវណ្ណៈកណ្តាលគួរឲ្យកត់សម្គាល់ដែលបង្កឲ្យពួកគេមានលទ្ធភាពទិញលំនៅដ្ឋានសម្រាប់រស់នៅកាន់តែច្រើន។
សម្តេចតេជោ ហ៊ុន សែន នៅក្នុងក្នុងពិធីប្រគល់សញ្ញាបត្រដល់និស្សិតផ្នែកសុខាភិបាលមកពីសាកលវិទ្យាល័យពុទ្ធិសាស្ត្រសរុបប្រមាណ ១,៣៥៦នាក់ ដែលធ្វើឡើងនៅមជ្ឈមណ្ឌលកោះពេជ្រនៅថ្ងៃទី៦ ខែមិថុនា ឆ្នាំ២០១៩ បានឲ្យដឹងថា ប្រជាពលរដ្ឋមិនត្រឹមតែមានលទ្ធភាពទិញលំនៅដ្ឋានប៉ុណ្ណោះទេ ថែមទាំងមានលទ្ធភាពទិញរថយន្តគ្រប់ប្រភេទជាច្រើនសម្រាប់ជាមធ្យោបាយធ្វើដំណើរទៀតផង ដែលខុសកាលពីមុនមិនមានលទ្ធភាពដូច្នេះទេ។
សម្តេចបន្តថា “ការកសាងបុរី ផ្ទះល្វែង និងលំនៅដ្ឋានផ្សេងៗបាននឹងកំពុងមានការរីកចម្រើនគ្រប់ទីកន្លែង ដើម្បីឆ្លើយតទៅនឹងតម្រូវការរបស់ប្រជាពលរដ្ឋខ្មែរដែលកំពុងកើនឡើងនូវវណ្ណៈកណ្តាលនេះផងដែរ”។
ឯកឧត្តម ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានថ្លែងឲ្យដឹងកាលពីពេលថ្មីៗនេះថា ជាមួយនឹងកំនើនសេដ្ឋកិច្ច នគរូបនីយកម្មក៏បានកើនឡើងយ៉ាងឆាប់រហ័ស ព្រោះតាមការសិក្សារបស់ក្រសួងអំពី ក្របខ័ណ្ឌយុទ្ឋសាស្រ្តអភិវឌ្ឍន៍ទីក្រុងនៅកម្ពុជាបានរកឃើញថា ចំនួនប្រជាជនរស់នៅរាជធានី ក្រុង និងទីប្រជុំជននៅឆ្នាំ២០១៤ មានចំនួន៤,៥លាននាក់ ស្មើនឹង២៧,១ភាគរយ និងបន្តកើនឡើងដល់ ៧,៩២លាននាក់នៅឆ្នាំ២០៣០ ស្មើនឹង ៤៤ភាគរយនៃចំនួនប្រជាជនកម្ពុជាសរុប។
តាមទិន្នន័យនេះបានបង្ហាញឲ្យឃើញថា បើគិតចាប់ពីឆ្នាំ២០១៥ ដល់២០៣០ តម្រូវការលំនៅដ្ឋានសម្រាប់រាជធានី ក្រុង និងទីប្រជុំជនមានប្រមាណ៨០ម៉ឺនលំនៅដ្ឋាន ដែលគិតជាមធ្យមមានតម្រូវការប្រមាណ៥ម៉ឺនលំនៅដ្ឋានក្នុងមួយឆ្នាំ។
លោកច្រឹក សុខនីមអគ្គនាយកក្រុមហ៊ុន Century21 Mekong បានថ្លែងថា ទីផ្សារលំនៅដ្ឋាននៅតែមានភាពល្អប្រសើរ ដោយសារកត្តាសំខាន់ៗមួយចំនួនដូចជា កំនើនប្រាក់ចំណូលរបស់ប្រជាពលរដ្ឋ កំនើនប្រជាសាស្រ្តកើនឡើងក្នុងទីក្រុង ការកើនឡើងនូវតម្លៃដីធ្លី ធ្វើឲ្យអ្នកមានដីធ្លីក្នុងទីក្រុងបានលក់ចេញ ហើយទិញលំនៅដ្ឋាននៅជាយក្រុង ឬតាមបុរីនានា និងការគាំទ្រឥណទានពីធនាគារនានា។
លោកបន្តថា “យើងឃើញថាទីផ្សារលំនៅដ្ឋាននៅតាមបុរីនានា មានសកម្មភាពទិញលក់កើនឡើងជាប្រចាំ ទាំងផ្ទះថ្មី និងផ្ទះទី២ដែលអ្នកទិញលក់យកចំណេញឬលក់ចេញដើម្បីផ្លាស់ប្តូរទីតាំងថ្មី”៕