កម្ពុជាតាមរយៈក្រសួងព័ត៌មាននឹងធ្វើជាម្ចាស់ផ្ទះរៀបសន្និសីទកំពូលសារព័ត៌មានអាស៊ី លើកទី១៦ នៅខេត្តសៀមរាបដែលផ្តោតលើប្រធានបទ «ប្រព័ន្ធផ្សព្វផ្សាយឌីជីថល-អភិវឌ្ឍន៍ទីផ្សារ» រយៈពេល ២ថ្ងៃ ពោលគឺពីថ្ងៃទី១២-១៣ខែមិថុនាឆ្នាំ២០១៩។
ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មានបានមានប្រសាសន៍នៅក្នុងសិក្ខាសាលាមុនកិច្ចប្រជុំកំពូលនេះ នៅថ្ងៃទី១១ខែមិថុនានេះ ថា ប្រធានបទនៃកិច្ចប្រជុំកំពូលនេះគឺមានភាពល្អប្រសើរដែលអាចផ្តល់ឲ្យវឌ្ឍនភាពថ្មីនៃការអនុម័តបច្ចេកវិទ្យាក្នុងឧស្សាហកម្មប្រព័ន្ធផ្សព្វផ្សាយនៅអាស៊ីប៉ាស៊ីហ្វិក។
ឯកឧត្តមរដ្ឋមន្ត្រីបន្តថា សន្និសីទសារព័ត៌មានអាស៊ីគឺជាព្រឹត្តិការណ៍នៃការផ្សព្វផ្សាយអន្តរជាតិដែលឈានមុខគេដែលផ្តល់ឱកាសដល់អ្នកផ្សាយអ្នកអនុវត្តប្រព័ន្ធផ្សព្វផ្សាយអ្នកដឹកនាំឧស្សាហកម្មអ្នកសិក្សាស្រាវជ្រាវអ្នកជំនាញនិងអ្នកបង្កើតគោលនយោបាយប្រព័ន្ធផ្សព្វផ្សាយនៅទូទាំងពិភពលោកបានជួបនិងពិភាក្សាអំពីរបៀបអភិវឌ្ឍន៍គុណភាពប្រព័ន្ធផ្សព្វផ្សាយក្នុងអំឡុងពេលនៃការប្រកួតប្រជែងដ៏ខ្លាំងក្លាបដិវត្តន៍បច្ចេកវិទ្យាជំនាន់ទី៤។
ឯកឧត្តមរដ្ឋមន្ត្រីបន្ថែមថា សន្និសីទកំពូលសារព័ត៌មានអាស៊ី លើកទី១៦នឹងបើកជាផ្លូវការក្រោមអធិបតីភាពដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជានៅថ្ងៃទី១២ខែមិថុនា ផ្តោតលើបញ្ហាសំខាន់ៗដូចជា៖ ផលប៉ះពាល់នៃវិស័យសារព័ត៌មានក្រោមឥទ្ធិពលបដិវត្តន៍ឧស្សាហកម្មជំនាន់ទី៤ការប្រយុទ្ធប្រឆាំងព័ត៌មានក្លែងក្លាយ ការបង្កើតកម្មវិធីដ៏មានប្រសិទ្ធភាពក្នុងយុគសម័យឌីជីថល និន្នាការនៃបច្ចេកវិទ្យា4K ជាដើម។
សន្និសីទកំពូលសារព័ត៌មានអាស៊ី លើកទី១៦ មានគណៈប្រតិភូជាថ្នាក់ដឹកនាំ និងតំណាងស្ថាប័នរដ្ឋាភិបាល ព្រមទាំងអ្នកសារព័ត៌មានជាតិ និងអន្តរជាតិចូលរួមប្រមាណ៥០០នាក់ មកពីបណ្ដាប្រទេសជាង៤០ នៅក្នុងតំបន់និងពិភពលោកមានដូចជា៖ ថៃ ឡាវមីយ៉ាន់ម៉ា ឥណ្ឌូនេស៊ី កូរ៉េខាងត្បូង សាម៉ៅ ជាដើម។
ក្នុងអំឡុងពេលចូលរួមសន្និសីទកំពូលនេះ គណៈប្រតិភូជាថ្នាក់ដឹកនាំ និងអ្នកសារព័ត៌មាននឹងត្រូវបានអញ្ជើញឲ្យទៅទស្សនាសារៈមន្ទីរសន្តិភាពនៃសម្មភាពកម្ចាត់មីនរបស់ស៊ីម៉ាក់ និងប្រាសាទអង្គរវត្ត ដើម្បីស្វែងយល់ពីកិច្ចខិតខំរបស់កម្ពុជាក្នុងការបោសសំអាតគ្រាប់មីន និងយុទ្ធភណ្ឌមិនទាន់ផ្ទុះដែលបន្សល់ពីសង្គ្រាម និងមរតកវប្បធម៌ដែលបន្សល់ពីបុព្វបុរសខ្មែរ សម្រាប់បម្រើដល់វិស័យទេសចរណ៍របស់កម្ពុជានាពេលបច្ចុប្បន្នផងដែរ៕
